31 mar 2011

ACTIVIDADES PROGRAMADAS NO PROXECTO DE APERTURA DE CENTROS EDUCATIVOS FÓRA DO HORARIO LECTIVO

O Concello de Quiroga quere informar da ampliación das actividades programadas no marco do Proxecto de Apertura de Centros Educativos fóra de horario lectivo, cofinanciadas por este Concello e pola Consellería de Educación e Ordenación Universitaria que se están a desenvolver ao longo do ano en colaboración co CEIP DE QUIROGA E O IES DE QUIROGA .

A partir do mes de abril ampliarase esta oferta con dúas novas actividades: Reforzo educativo e Pintura. Ademais comezarase unha nova etapa de teatro.

Para os alumnos/as de E.Infantil:

-Inglés: os mércores de 16.45 h a 17.45 h

-Pintura: sábados de 10.00 h a 12.00 h

-Teatro: sábados de 12.00 h a 13.00 h

Nos meses de xullo e agosto: piscina. De luns a venres, unha hora diaria.

Para os alumnos/as de Primaria:

Inglés: os mércores de 16.45 h a 17.45 h

Reforzo a través das novas tecnoloxías (informática): os martes 17.00 h a 18.00 h

Reforzo en técnicas instrumentais básicas ( matemáticas e lingua) para alumnos/as de 5ºe 6º: os luns e os xoves de 18.00 h a 19.00 h.

Reforzo a través de actividades de comunicación: comprensión e expresión para alumnos/as de 1º a 4º: os luns e os xoves de 17.00 h a 18.00 h.

-Pintura: sábados de 10.00 h a 12.00 h.

-Teatro: sábados de 12.00 h a 13.00 h.

Nos meses de xullo e agosto: piscina. De luns a venres, unha hora diaria.

Para os alumnos/as de 1º e 2º da ESO:

Inglés: os mércores 18.45 h a 19.45 h

Reforzo a través das novas tecnoloxías (informática): os martes 18.00 h a 19.00 h

Reforzo en técnicas instrumentais básicas (matemáticas e lingua) de 18.00h a 19.00 h

-Pintura: sábados de 10.00 h a 12.00 h

-Teatro: sábados de 12.00 h a 13.00 h

Adultos (pais e nais):

Inglés: os mércores de 17.45 h a 18.45 h

A participación nestas actividades é totalmente gratuíta, sendo impartidas por persoas expertas na materia. Para informarse e realizar a inscrición hai que dirixirse á Casa da Cultura (Telf:982435125) .

29 mar 2011

CONTACONTOS " PALABRAS DE CHAPEU.CONTOS PARA XOGAR"


Co gallo da Celebración do Día Internacional do Libro Infantil e Xuvenil o vindeiro sábado día 2 de abril , o Concello de Quiroga organiza unha actividade de CONTACONTOS “PALABRA DE CHAPEAU” a cargo de Helga Méndez de Teatro Patán.

Esta actividade dirixida a público infantil, terá lugar no Salón de Actos da Casa da Cultura o vindeiro sábado ás 19.00 h. e nela poden participar todos os nenos e nenas que o desexen.



25 mar 2011

ÁBRESE O PRAZO PARA PRESENTAR AS SOLICITUDES DA SUBVENCIÓN PARA O REMATE DE FACHADAS E CUBERTAS NO ÁMBITO RURAL

O concello de Quiroga, a través dun bando, informa que se abre o prazo de presentación de solicitudes de axuda para a tramitación da subvención de remate de fachadas e cubertas, rehabilitación e reconstrucción de edificios e vivendas no ámbito rural.

Para máis información ou realizar os trámites da subvención, poden acudir á oficina do Portelo Único de Vivenda, situada na rúa Caurel (antigo cárcere) de Quiroga. No horario de 9:00 a 14:00 de luns a venres ou chamando ao teléfono 982 42 83 97.

22 mar 2011

ESTE MÉRCORES O PROGRAMA DA TVG "A SOLAINA" FARÁ UNHA RETRANSMISIÓN EN DIRECTO DENDE A PRAZA MAIOR

Este mércores día 23, pola tarde, vai ter lugar na Praza Maior a emisión en directo do programa da Televisión de Galicia “A Solaina”. Un programa de variedades que percorre a maioría dos concellos da xeografía galega.

Todas as persoas que queiran asistir a ver a retransmisión poden achegarse mañá mércores a partir das 4 da tarde á Praza Maior.

18 mar 2011

O CONCELLO DE QUIROGA SÚMASE Á CELEBRACIÓN DO DÍA MUNDIAL DA ÁRBORE CUN ACTO INSTITUCIONAL NA XI MOSTRA DO ACEITE DE BENDILLÓ.

Día da árbore en Quiroga.

Domingo, día 20 de marzo
Lugar: Bendilló, no recinto da XI Mostra do Aceite de Quiroga, ás 11:45h.

Para sumarse á conmemoración do día Mundial da Árbore, o Concello de Quiroga organiza un acto que consistirá na plantación de varios oliveiras no contorno do muíño de aceite de Bendilló no lugar das Farrapas dentro do programa de actos preparados para a XI Mostra do Aceite de Quiroga, que será o domingo día 20 de marzo de 2011.

O alcalde de Quiroga, Julio Álvarez Núñez estará acompañado neste acto polo Subdirector Xeral de Espazos Nauturais e Biodiversidade da Xunta de Galicia, Rogelio Fernández Díaz e por representantes da Fundación Xermán Estévez de Santiago de Compostela.

17 mar 2011

O C.I.M. ORGANIZA UN CURSO DE CATA DE VIÑOS PARA MULLERES

O Centro de Información á Muller ten previsto celebrar os días 25 de marzo, 1 e 8 de abril unha cata de viños.

O curso vai dirixido ás mulleres da comarca maiores de idade e celebrarase na sala de catas do Museo Etnográfico de Quiroga.
As interesadas en asistir ao curso pódense anotar no Centro de Información á Muller na Casa do Concello ou chamando aos teléfonos 982 43 89 51 ou  982 42 80 01.

A data límite de inscrición é o 24 de marzo, as prazas son limitadas.

16 mar 2011

O DOMINGO 20 DE MARZO CELEBRASE A XI MOSTRA DO ACEITE

Esta mañá reuníase a comisión organizadora da XI Mostra do Aceite que se celebrará o vindeiro domingo 20 de marzo no lugar das Farrapas en Bendilló.

A mostra inaugurarase ás once da mañá, para media hora despois poñer en funcionamento o muíño no que se realizará unha demostración da elaboración tradicional do aceite. O primeiro paso é moer as olivas, para o que se pon en funcionamento o muiño movido por un burro ata triturar totalmente o froito. A pasta das olivas recóllese do muiño e vaise colocando nos capachos, que son esteiras de esparto, e botáselles auga quente. Os capachos colócanse uns enriba doutros á espera de seren prensados. O líquido sae ao sometelo á forza da prensa, onde pola súa propia densidade se irá separando o aceite da auga.

A novidade deste ano será a recuperación dunha cata que terá lugar ás 12 do mediodía no interior da Capela. Sobre as doce e media está previsto que comecen as actuacións de música e danza tradicional galega que correrán a cargo das agrupacións locais: Banda de gaitas San Martiño, grupo de gaitas O Recanto e o grupo de danzas San Martiño.

No recinto da mostra ademais do produto estrela, o aceite, poderanse ver e mercar produtos típicos da nosa zona. Nesta edición estará á venda o aceite dos cinco colleiteiros habituais neste evento: Inocencio Ogando García, Jesús Bao Mondelo, Luis Vicente Arias Prieto, Guillermo Nogueira Veloso e Manuel Mondelo Rodríguez.

A organización do evento coida ao máximo a súa imaxe, as tarefas de limpeza e mantemento do recinto sucédense ao longo do ano para que se atope nas mellores condicións á hora de instalar a carpa e os stands precisos para o día da mostra. A presentación do produto faise de xeito uniforme, todos os colleiteiros empregan o mesmo tipo de envase, etiqueta e bolsa para a exposición e a venda do produto. Para acadar esta imaxe corporativa a organización achega a todos os produtores os envases, as etiquetaxes e as bolsas. No recinto feiral instalaranse outros postos con todo tipo de producos típicos da zona: mel, viño, castañas, licores, pan etc.

Para facilitar o acceso de todas as persoas ao recinto da feira e ao muíño do aceite, como todos os anos contarase coa colaboración da Garda Civil, Policía Local e dos voluntarios de Protección Civil.

14 mar 2011

ABERTO O PRAZO DE INSCRICIÓN PARA OS CAMPAMENTOS DE VERÁN 2011

O Concello de Quiroga quere informar que está aberto o prazo de inscrición nos campamentos de verán para o ano 2011, ofertados pola Xunta de Galicia. O prazo para presentar as solicitudes rematará o 22 de marzo.

Os participantes deberán ter cumpridos 9 anos no inicio do campamento e non poderán cumprir 18 antes da súa finalización.

Para máis información poden dirixirse á casa da cultura, onde poderán realizar as solicitudes.

10 mar 2011

SESIÓN PLENARIA

Hoxe, á unha do mediodía celebrarase unha nova sesión plenaria con carácter ordinario, na que se tratarán os asuntos que aparecen na orde do día:

- Modificación do contrato de xestión do albergue municipal.
- Moción do grupo municipal do Partido Popular sobre a devolución dos importes resultantes da liquidación da PIE dos exercicios 2008-2009.
- Moción do grupo municipal do Partido Popular sobre a suba do recibo de enerxía eléctrica.
- Creación da Mesa local do comercio.
- Creación da Mesa técnica contra a violencia de xénero.
- Adhesión ao acordo Xunta de Galicia-FEGAMP para a posta en marcha da Administración electrónica nas entidades locais de Galicia.
- Rogos e preguntas.

CONCURSO DE CAMISETAS PARA GRUPOS NA XXIX FEIRA DO VIÑO DE QUIROGA

O Concello de Quiroga convoca, para o día 23 de abril, co gallo da XXIX Feira do Viño de Quiroga un CONCURSO DE CAMISETAS PARA GRUPOS coas seguintes bases:

1º- Poden participar todos os grupos e colectivos que o desexen, a partir de catro integrantes.
2º.- A temática reflectida no deseño e lema das camisetas estará relacionada coa XXIX Feira do Viño de Quiroga.
3º.- Os participantes poden realizar a súas inscricións ata o día 22 na Casa da Cultura ou chamando ao teléfono: 982435125. Tamén o día 23, no recinto da feira, na caseta de Información do Concello ata as 19:00h.
4º.- O xurado será o/a encargado/a de pronunciar o pregón.
5º.- Un representante de cada grupo anotado ao concurso deberá acceder ao lugar do pregón , para expoñer a súa camiseta diante do público e do encargado/a de seleccionar ao gañador.
6º.- Establécese un só premio, que consiste nun lote cinco caixas de viño dos participantes no certame deste ano.
7º.- A participación no concurso supón a aceptación das presentes bases.

9 mar 2011

ABRESE O PRAZO DE PRESENTACIÓN DE SOLICITUDES DE ADMISIÓN DE NOVOS ALUMNOS PARA O CURSO 2011-2012 NO C.E.I.P.

A dirección do CEIP de Quiroga vén de comunicar que: segundo a Orde do día 17 de marzo de 2007, pola que se regula o procedemento para a admisión do alumnado no segundo ciclo de educación infantil, educación primaria, educación secundaria obrigatoria e bacharelato en centros docentes sostidos con fondos públicos, a dirección quere informar que xa se atopa aberto o prazo de presentación de solicitudes de admisión de novos alumnos para o curso 2011-2012 e que estará aberto ata o 31 de marzo deste ano.


Dende a dirección do centro educativo lembran que o horario de secretaría é de luns a venres de 12 a 13.00 h do mediodía.

4 mar 2011

ENTROIDO EN QUIROGA

Esta mañá daba comezo o entroido na vila cos nenos e coas nenas da gardería infantil que celebraban o seu particular entroido. Xa pola tarde farano os nenos e as nenas do colexio de infantil e primaria, co desfile que farán a partir das tres da tarde dende o colexio e ao longo de toda a rúa Real.


Os festexos do entroido 2011 continuarán co desfile de comparsas do domingo que comezará ás cinco da tarde e no que este ano participan un total de ,. Ademais destas comparsas tamén colabora a Asociación de Mulleres San Martiño, achegando unha comparsa composta soamente por mulleres e que non concorre ao concurso senón que participa no desfile.

O percorrido será dende a confluencia da rúa Real coa das piscinas para percorrer toda a rúa principal ata a casa da cultura e rematar diante da casa consistorial.

Unha vez que remate o desfile de comparsas, comezará a festa na rúa amenizada polo dúo local Fondo Tropical e, deseguido, terá lugar a entrega de premios diante do concello.

Ademais do desfile de comparsas, o concello tamén organizou unha festa infantil de disfraces na discoteca Lor, a partir das cinco e media. E o centro social celebrará o seu entroido o martes convidando os seus socios a rosquiñas e sangría e, a continuación, poderán participar nun animado baile de disfraces.

3 mar 2011

ACTOS CONMEMORATIVOS DO DÍA INTERNACIONAL DA MULLER

Entre os actos conmemorativos do Día Internacional da Muller o Concello de Quiroga, a través do centro de información á muller, está a organziar unha exposición de pintura de tres pintoras quiroguesas, tras ofertar esta posibilidade a todas aquelas artistas que o quixesen facer.

A inauguración da exposición terá lugar o venres, día 4 de marzo, ás 19.00 horas na nova sala de exposicións do concello, sita na planta baixa da casa da cultura, e estará aberta ao público ata o vindeiro día 20 de marzo. Con esta exposición inaugurarase, ademais, a citada sala de exposicións.

As pintoras que expoñen as súas obras son Julia Núñez García, natural de Quiroga e residente en Ponferrada (León), Luisa Ferrín Vila, natural de Quiroga, e Pilar González Quiroga, natural de Monforte de Lemos e veciña de Quiroga dende que afincou a súa vida na vila a principios dos anos 70.

A obra pictórica destas tres artistas ten en común a súa variada temática, tendo como referente principal e fonte de inspiración a natureza.

No caso de Julia Núñez é a primeira vez que expón a súa obra, no entanto, Luisa Ferrín e Pilar González xa teñen experiencia pois xa participaron en diversas exposicións tanto na nosa vila como fóra dela (Santiago de Compostela, A Rúa de Petín) e, no caso de Luisa Ferrín, noa ano 82 fopi seleccionada no Premio Valenti de pintura Castelldefels (Barcelona).

CONCURSO DE DEBUXO INFANTIL

O Concello de Quiroga, dende a Área Social, organiza un Concurso de Debuxo Infantil. As bases son as seguintes:

1.-Este concurso está dirixido a nenos de entre 4 e 18 anos.

2.-O debuxo debe ser orixinal e realizado por calquera medio plástico: lapis, tinta, acuarela, acrílico, óleo, colaxe, gravado ou mixtos.

3.-O tamaño mínimo será de formato A4 e o tema do debuxo será libre.

4.-Ao reverso do debuxo irán os datos do autor: nome e apelidos, teléfono e dirección.

5.-O debuxo presentarase na Casa de Cultura dentro dun sobre pechado sen ningunha escritura no seu exterior.

6.-Os traballos serán avaliados en catro categorías:

A: nenos de 4 a 6 anos.

B: nenos de 7 a 10 anos.

C: nenos de 11 a 14 anos.

D: nenos de 15 a 18 anos.

7.-Dentro de cada categoría haberá tres postos premiados e os premios serán “PREMIOS SORPRESA”.

8.-A data límite de presentación é o día 31 de marzo e a entrega de premios será comunicada aos gañadores despois da decisión do xurado.

9.-Os traballos quedarán en propiedade do Concello de Quiroga para posteriores exposicións.

10.-A participación neste concurso supón a aceptación das presentes bases.


PROHIBIDO TIRAR PETARDOS NO ENTROIDO

Aproveitando que estamos no entroido, o concello lembra que está totalmente prohibido o uso de material pirotécnico, incluídos os petardos chamados tronos ou morteiros.

Todo aquel que a policía local vexa tirando este tipo de petardos ou na súa posesión será sancionado e comisaránselle todos os que teñan.