27 ago. 2019

MELLORAS NA INFRAESTRUCTURA TURÍSTICA DO MUNICIPIO


A infraestrutura turística do municipio cos miradoiros municipais de Montefurado, Campodola, Bustelo de Fisteus, A Seara, A Conchada e Castro Dares, ven de ser mellorada polo Concello de Quiroga. Coa axuda da Axencia de Turismo de Galicia da Consellería de Cultura e Turismo da Xunta, realizáronse traballos de mantemento na contorna e nos paneis informativos  dos seis miradoiros.

Este ano para potenciar as infraestruturas coas que conta o territorio do Xeoparque Mundial da UNESCO Montañas do Courel, incorporouse un novo punto de observación na estrada que conduce dende Campos de Vila a Pazos da Serra, á altura de Penas Rubias. Neste lugar pódese gozar dunha menos coñecida vista da gran dobra deitada das Montañas do Courel; lugar de importancia xeolóxica de relevancia internacional dende o ano 1983.

Ademais dos traballos para mellorar e incrementar a rede de miradoiros e puntos de interpretación tamén se substituíron os sinais de área xeográfica que estaban moi deteriorados polo paso do tempo. Estes paneis adaptados ao manual de sinalización turística de Galicia conteñen información por áreas xeográfica de núcleos de poboación, vías de comunicación e puntos de interese de cada unha das áreas do concello: área da montaña do Lor; área da Ermida e Campodola-Leixazós; área do Hospital á Seara; área de Paradaseca, Vilarmel e Bendollo; área de Bendilló e Vilaster e Área de Montefurado. En total substituíronse 9 paneis.

Estas melloras teñen un custo de 15.000 €, dos que 10.000 € foron achegados pola Consellería de Cultura e Turismo da Xunta de Galicia.     


13 ago. 2019

A ORQUESTRA PANORAMA, A FESTA DA COMUNIDADE E O CONCERTO DE SUSANA SEIVANE, O MÁIS CONCURRIDO DAS FESTAS DE VERÁN


Quiroga viviu esta fin de semana as súas festas de verán. Os festexos abríanse o xoves cunha das súas actuacións estrela, a actuación da orquestra Panorama, e que congregou a centos de persoas nas inmediacións do pavillón municipal.

O venres as actividades festivas trasladáronse ata o parque da Constitución, onde se celebraba  a décimo cuarta  Festa da Comunidade. As nove e media da noite abríase o recinto para que o medio milleiro de persoas participantes se foran instalando nas mesas protexidas baixo unha gran carpa.

Esta era a XIV edición dunha festa que naceu como xuntanza e inicio das festas de verán e que cada ano consegue reunir a centos de persoas. Nos últimos anos o menú quedou fixado en paella pola gran acollida. Noutras edicións degustaronse salchichas frescas, panceta ou codillo.

 As entradas para participar nesta cea, cun prezo de 6€, estiveron á venda en diversas cafeterías da vila e no Centro Social, pero aínda se podían adquirir no recinto feiral, opción que escolleu moita xente.

A cea remataría cun animado baile a cargo do Dúo Camelia

O sábado, ás doce do mediodía, apicultores e grupo de goberno, acompañados da música do grupo rexional O Recanto, inauguraban a  XXVIII Mostra do Mel.

Moi boas vendas, moi desigual colleita segundo as zonas do municipio e unha gran proliferación de velutina son as conclusións dos sete apicultores participantes na XXVIII Mostrando Mel de Quiroga.

O mel de Quiroga, coas súas variedades multifloral, de castiñeiro e brezo estivo unha vez máis a altura da gran calidade que o caracteriza. Os colmeares situados nas zonas máis altas do municipio producen mel co predominio do castiñeiro, mentres que os situados nas zonas do val dan mel de brezo, planta moi abondosa e da que Quiroga recibe o seu nome (queiruga); nas zonas intermedias as abellas recollen o pole de castiñeiros e brezo que xuntan con moitas outras flores dando un mel multiflorar. Tres variedades con matices diferentes en canto a cor, textura e sabor pero coa mesma calidade.

Desta gran calidade dan boa fe todas as persoas que se achegaban ata o recinto feiral e que practicamente mercaron todo o mel exposto. Xunto co mel, outros produtos tipicos da zona como aceite, licores ou marmeladas podían adquirirse nesta mostra.

Os apicultores quirogueses están loitando activamente contra a avespa velutina que se está vendo máis ca nunca na comarca. Dende o inicio da primavera están colocando as trampas que lle proporciona a Xunta de Galicia e outras fabricadas por eles mesmos, nas que xa colleron centos de raíñas desta especie tan perxudicial para as abellas. E que segundo eles mesmos recoñecen, está sendo dificil de eliminar.

Tamen este ano, aínda que en menor medida, deixouse ver o paso do oso pardo. Constatouse a súa presenza pero non chegaron a producirse danos nos colmeares, xa que a fundación Oso Pardo proporciona pastores eléctricos aos apicultores que informan do seu paso, o que lles impide achegarse ás colmeas.

As doce do mediodía e as oito do serán, contábase cun espectáculo de maxia ”Petite Caravane”, a cargo da compañía  Animatium na caravana situada na rúa Real. O espectáculo, para todos os públicos, forma parte do programa Cultura no Camiño, organizado polo Concello de Quiroga e a Conselleria de Cultura e Turismo da Xunta de Galicia.

A festa popular corría a cargo do grupo Atenas a partir das dez da noite e as doce e media o concerto da gaiteira galega Susana Seivane, outra das actuacións estrela destas festas de verán. A gaiteira ven de cumprir os vinte anos dende que publicou o su primeiro traballo discográfico e esta actuación enmarcouse dentro desta celebración.


O domingo ás doce e media do mediodía a banda de de Música de Chantada facía unha alborada pola rúa Real e un concerto diante  da Casa do Concello.

Pola  tarde, na Praza España os nenos e nenas poideron participar no  Concurso  Pinta con Xiz no Chan. O seu remate facíase entrega dos premios  aos gañadores do concurso  de Debuxo Infantil e de lambetadas a todos os nenos participantes.

 As oito da tarde, espectáculo infantil de rúa, “ O Folión Zampón” a cargo de Fantoches Baj, ao longo da rúa Real.

A festa popular a cargo dos grupo Nazaret e Limón, poñería o punto final as festas de verán.

Durante estas festas tamén se contou con actividades deportivas: O venres pola tarde celebrábase o quinto Torneo de Street Soccer no parque da Constitución. E aínda que estaba previsto celebrar tamén  o primeiro Torneo de Street Voley, tivo que pospoñerse para o día seguinte, dada a gran participación no Street Soccer.  

E o sábado a partir das seis e media da tarde, no campo do San Martiño tiña lugar a presentación do equipo do Quiroga para esta nova tempada que inicia nunha nova categoría, a segunda autonómica, e o que se enfrontaba ao Trives, no IV Trofeo TourGalia. O encontro rematou cun 1 – 0 favorable para o equipo quirogués.


1 ago. 2019

AMPLO E VARIADO PROGRAMA PARA CELEBRAR AS FESTAS DE VERÁN DE QUIROGA


A  orquestra  Panorama coa súa xira “Number One Tour”e a gaiteira Susana Seivane serán as actuacións estelares das festas de verán de Quiroga.  A actuación  da orquestra Panorama, a primeira das actuacións que esta orquestra realizará na zona sur da provincia.

 O xoves día 8 terá lugar a Festa da Xuventude que incluirá dentro do seu programa a III Edición da Festa da Cervexa Artesá na praza de España. A nota musical correrá a cargo  do DJ Michel dende as seis da tarde, e sobre as once da noite preto da Praza España, comezará a actuación da afamada orquestra PANORAMA.

    O  venres día 9 , a partir das seis da tarde quinto Torneo de Street Soccer no parque da Constitución e o primeiro Torneo de Street Voley.  E pola tarde-noite, nas inmediacións do Parque da Constitución celebrarase a décimo cuarta  Festa da Comunidade. Unha vez que remate a merenda comezará un animado baile a cargo do Dúo Camelia.

      O sábado, día 10, a partir das doce do mediodía, inauguración da XXVIII Mostra do Mel de Quiroga. O grupo de gaitas Os do Recanto serán os encargados de poñer a nota musical no recinto feiral. As doce do mediodía e as oito do serán, contarase cun espectáculo de maxia”PETITE CARAVANE”, a cargo da compañía  Animatium na caravana ubicada na rúa Real.

       A festa popular correrá a cargo do grupo ATENAS a partir das dez da noite e as doce e media o concerto da gaiteira galega SUSANA SEIVANE.

          O domingo ás doce e media do mediodía alborada coa banda de Música de Chantada e a  unha e media do  mediodía concerto da mesma diante  da Casa do Concello. Pola tarde, na Praza España  de novo contaremos co Concurso Pinta con Xiz no Chan, e farase entrega de premios aos gañadores do concurso  de Debuxo Infantil.


         As oito da tarde, espectáculo infantil de rúa, “ O FOLIÓN ZAMPÓN” a cargo de Fantoches Baj, ao longo da rúa Real. A partir das nove e media da noite  festa popular a cargo do grupo NAZARET. E a partir das doce gran verbena a cargo do grupo LIMÓN.



A FESTA DA XUVENTUDE INCLURÁ A III FESTA DA CERVEXA ARTESÁ


xoves día 8 terá lugar a Festa da Xuventude que incluirá dentro do seu programa a III Edición da Festa da Cervexa Artesá na praza de España. A nota musical correrá a cargo  do DJ Michel dende as seis da tarde, e sobre ás once da noite preto da Praza España, comezará a actuación da afamada orquestra PANORAMA.


Dentro das bases para a participación nesta festa está recollido que no  recinto da festa non estrá  permitida a venda de cervexa que non sexa artesá como tampouco ningún outro tipo de bebida alcohólica. O prezo fixado para a caña é de 1,50€.

As persoas interesadas en inscribirse, poden solicitar o formulario de solicitude na casa de cultura ou senón tamén poden chamar o seu número, onde serán informados de todos os detalles da festa. Dado que o número de participantes está limitado a 8 e dando preferencia aos cervexeiros locais, a admisión de participantes farase por orden de rexistro de entrada.

O 9 DE AGOSTO CELÉBRASE A XIV EDICIÓN DA FESTA DA COMUNIDADE


O venres día 9 de agosto e dentro do programa das Festas de Verán de Quiroga, terá lugar a 14ª edición da Festa da Comunidade.

Como xa  é habitual a festa celebrarase nas inmediacións do parque da Constitución a partir das nove e a ela poden acudir todos os veciños ou visitantes. Os asistentes poden previamente mercar os vales que están a venda tanto no Centro Social como nas seguintes  cafeterías e bares da vila; As Plameras, Quiper,Lago.Felix,Zorro, e Ferreiriño, así como tamén se poden adquirir o  mesmo día da cea a un prezo de 6 euros.

O menú que se poderá degustar nesta cea vai ser paella e xeado todo elo acompañado de bebidas.

          A festa da Comunidade dende hai xa catorce anos forma parte dos actos que o Concello organiza para celebrar as súas Festas de Verán, sendo deste xeito un atractivo máis dentro do turismo gastronómico da nosa bisbarra.


E unha vez que remate a merenda-cea, dará comezo un animado baile con música en directo no propio recinto da festa a cargo do Dúo Camelia.



O CONCELLO DE QUIROGA ORGANIZA UN NOVO CONCURSO DE DEBUXO INFANTIL QUE TERÁ COMO TEMA O XEOPARQUE


O Concello de Quiroga, dende a Área de Educación e infancia, organiza novamente  un Concurso de Debuxo Infantil. As bases son as seguintes:

1.-Este concurso está dirixido a nenos de entre 3 e 12 anos.

2.-O debuxo debe ser orixinal e realizado por calquera medio plástico: lapis, tinta, acuarela, acrílico, óleo, colaxe, gravado ou mixtos.

3.-O tamaño mínimo será de formato A4 e o tema do debuxo será Quiroga e o Xeoparque.

4.-Ao reverso do debuxo irán os datos do autor: nome e apelidos, teléfono e dirección.

5.-O debuxo presentarase na Casa de Cultura dentro dun sobre pechado sen ningunha escritura no seu exterior, sendo o último día para entregalos o 8 de agosto.

6.-Os traballos serán avaliados en catro categorías:

A: nenos de 3 a 5 anos.

B: nenos de 6 a 8 anos.

C: nenos de 9 a 12 anos.


7.-Dentro de cada categoría haberá tres postos premiados e os premios serán “PREMIOS SORPRESA”.

8.-Os premios os nenos e nenas gañadores entregaránselles o domingo día 11 de agosto ás oito menos cuarto do serán na Praza España.

9.-Os traballos quedarán en propiedade do Concello de Quiroga para posteriores exposicións.

10.-A participación neste concurso supón a aceptación das presentes bases.



6 jun. 2019

PREMIO DE AGADER PARA A XESTIÓN DO XEOPARQUE MONTAÑAS DO COUREL


A Asociación Montañas de Courel, formada polos concellos de Ribas de Sil, Folgoso do Courel e Quiroga, ven de recibir un premio de AGADER, a Axencia Galega de Desenvolvemento Rural, na modalidade de turismo pola xestión realizada para o Xeoparque Montañas do Courel.

A candidatura obtivo 90 puntos, a máxima puntuación acadada por todas as solicitudes premiadas, un total de 8, en diferentes categorías.

 Estes son os décimos premios de Agader para as iniciativas de desenvolvemento rural. Entregaranse o vindeiro 21 de xuño e consisten nun diploma e unha dotación en metálico de 10.000€.

O xurado encargado de outorgar as iniciativas presentadas estaba formado polos directores xerais de igualdade, de políticas culturais, de turismo, de patrimonio cultural,  de xuventude, de gandaría e agricultura e industrias agroalimentarias; así como o secretario xeral de Agader e o presidente da Fegamp. Este xurado premia a Montañas do Courel como un proxecto global de desenvolvemento turístico.



O CENTRO DE DÍA ABRIRASE EN AGOSTO


O Centro de Día da Ribeira abrirase o día 1 de agosto. Así o anunciou o Concello de Quiroga que xa abriu o prazo de presentación de solicitudes de praza a través das oficinas de servizos sociais municipais.
O centro que se define como xerontolóxico, socio -  terapéutico e de apoio ás familias conta con 25 prazas para persoas maiores con dependencia ou en grave risco de padecela.
Permanecerá aberto todos os días laborables dende ás oito da mañá ata as oito do serán. Dentro deste horario os usuarios poderán ter xornada completa ou media xornada con ou sen comida.
Dentro dos requisitos mínimos para poder ser usuario deste servizo está o de ter cumpridos os 65 anos ou 50 en caso de dependentes con circunstancias persoais.
Estes requisitos foron fixados por unha Comisión de Estudio na que tiveron representación todos os partidos políticos da corporación municipal. Esta comisión tiña como cometido elaborar unha memoria xustificativa  na que se recolleran as condicións máis idóneas para poder abrir este centro.
Unha destas condicións era que a xestión do centro fora indirecta, é dicir que non a xestionase o concello directamente se non que se sacara a concurso para que fora outra entidade quen a xestione, polo que se elaboraron unhas bases de licitación para que este servizo saíra a concurso. 
Tras rematar todos estes trámites agora ábrese o prazo para a solicitude de prazas. As persoas interesadas poden pasar polas oficinas de servizos sociais do concello.
O Centro de Día ocupa a primeira planta do edificio polivalente da Ribeira. Na súa planta baixa atópase o centro social da Ribeira. E contémplase que na segunda planta serva de lugar de acollida temporal para persoas en risco de exclusión social.

O PARO BAIXA EN 20 PERSOAS NO MES DE MAIO


A Consellería de Economía, Emprego e Industria fixo públicos os datos do paro do mes de maio. A comarca de Quiroga baixou o seu número de parados neste mes en 20 persoas, situándose o número de parados en 268.
Segundo datos da Xunta durante este mes de maio, no municipio de Quiroga houbo 179 persoas sen emprego, seis menos que no mes anterior, das que a maioría, 106, buscaban emprego no sector servizos. A moita distancia séguelle o sector da industria con 28 parados, 18 na construción, e 10 en agricultura e gandería.
Tamén se contabilizan 17 persoas que aínda non atoparon o seu primeiro emprego.
A Consellería de Economía, Emprego e Industria tamén fixo públicos que o parados no concello de Ribas de Sil baixaron durante este mes en doce, situándose o número de persoas sen emprego en 49; e en Folgoso do Courel o número de parados diminuíu en dúas persoas quedando en 40 persoas no mes de maio.




30 abr. 2019

RESULTADOS ELECTORAIS DO 28 DE ABRIL


2.098 quirogueses, unha participación moi alta xa que se acadou un 73.82%, acudiron onte ás urnas paras participar nas eleccións xerais, para elixir entre as trece candidaturas que se presentaban para elixir os representantes para o Congreso e o Senado, as dúas cámaras que constitúen as Cortes Xerais.
Unha vez máis a formación política máis votada foi o Partido Popular que con 1.059 votos acadou o 51% das papeletas destinadas á elección da Cámara Alta. Séguelle con 578 votos o PSdeG- PSOE cunha porcentaxe do 27,9%. Podemo-EU-Mareas en Común-Equoa acadou 157 votos, un 7’58 %. Cs 106 votos cun 5,12%. Séguenlle o BNG con 71 votos, VOX con 57, PACMA con 12, En Marea con 10, Compromiso por Galicia con 2 e Recortes Cero-GV con 1 voto.  19 votos foron emitidos en branco e 28 contabilizáronse como nulos.
En canto ás mesas, nestas eleccións constituíanse cinco mesas electorais, unha menos que nos anteriores comicios, xa que a mesa de Vilar de Lor pasou a integrarse na da Casa de Cultura como xa a fixera anteriormente a de Montefurado que se integrou na de Soldón.
 No centro social de Quiroga instaláronse dúas mesas, na mesa A podían votar 645 quirogueses, que teñen os apelidos comprendidos entre as letras A e K. Recolléronse 464 votos, o que se traduce nunha participación do 71,94%. Nesta mesa o PP acadou 222 votos (47,84%), PsdeG-PSOE 123 (26,51%), e a terceira formación máis votada, C’s acadou 34 votos seguida moi de pretos de Podemos que acadou 33 votos. Séguelle BNG con 20 votos e Vox con 13. Nesta mesa tamén se contabilizaron 2 votos en branco e 7 nulos.
Na mesa B do Centro Social na que votaban os veciños da parroquia de Quiroga con apelidos da L ata a Z, votaron 649 persoas, un 74’94% do seu censo. O 43,14% dos votos foron para o PP, 280 votos. A segunda formación máis votada con 185 votos (28,51%) foi o PSdeG-PSOE. Podemos acadou nesta mesa 66 votos, C’s 45, Vox 30 e BNG 19. Houbo 8 votos en branco e 9 nulos.
Na casa da cultura de Quiroga, instalouse a mesa para os veciños das parroquias do Nocedo e a Hermida ademais dos veciños do Lor Alto e do Lor Baixo. Nesta mesa, exerceron o seu dereito a voto 309 veciños dos 416 censados, un 74,28€ de participación. Nesta mesa o PP acadou 175 votos (56,63%), o PSdeG-PSOE 88 (28,48) e Podemos 18 votos. 11 votos foron para o BNG, 5 para C’s e 3 para Vox. Contabilizáronse ademais 7 votos nulos e 1 en branco.
  A mesa situada no muiño de Soldón, onde votaron os veciños da zona de Sequeiros ata Vilarmel e Montefurado, acadou 255 votos, un 71,03% do seu censo. o PSdeG-PSOE con 55 (21,57%) e Podemos con 15 votos. Tamén houbo 9 votos para C’s, 7 para o BNG e 3 para Vox. Recibíronse tamén 3 votos en branco e 2 nulos.
Finalmente, no centro social de Campos de Vila, podían votar as persoas empadroadas dende a Parroquia de Hospital ata a parroquia da Seara. Acudiron as urnas 421 veciños dos 556 censados, o que se traduce na participación máis alta de todas as mesas do municipio, cun 75,72%. Nesta mesa o PP acadou 223 votos (52,97%), o PSdeG-PSOE acadou aquí o seu mellor resultado cun 30,17% dos votos emitidos, 127 votos. Podemos acadou 25 votos, BNG 14, C’s 13 e Vox 8. Foron contabilizados 5 votos en branco e 3 nulos.
Estes eran os votos acadados para o Congreso dos Deputados, a papeleta de cor branco, pero tamén se votou outra papeleta de cor sepia na que se marcaban os nomes dos representantes de cada partido, para elixir  aos 208 senadores. Nestas papeleta aparecía o nome dunha Quiroguesa candidata ao Senado polo PP, a concelleira de xuventude Rosa Mª Arza Rodríguez, que no noso municipio acadou 1.156 votos, o 57,37%. Seguida de José Manuel Barreiro Fernández (PP) con 1.115 votos (55,33), Manuel Lorenzo Varela Rodríguez(PP) con 1.081 (53,65%). Seguido dos representante polo PSOE César Alejandro Mogo Zaro con 519 votos (25,76).

17 abr. 2019

AINDA QUEDAN DOUS DÍAS PARA PARTICIPAR NO QUIROGA DE TAPAS


Continúa a desenvolverse a oitava edición do concurso Quiroga de Tapas organizado polo Concello de Quiroga, xunto coa Asociación Provincial de Hostelería de Lugo.  

Nesta edición do concurso que  se prolongará ata este venres participan 13 establecementos dedicados á restauración coas seguintes tapas:

A Pedra: “Arroz negro con calamares e alioli”.
Adega da María: “Cristal transparente”
Ruxe-Ruxe: “Xatecomo”
Ferreiriño: “Mar e horta”
As Palmeras: “Boliñas”
Casa Torres: “Polo crocante con froitos vermellos”
Chapakuña 3: “Paquetiños de delicias”
O Roxo Vivo: “Pé de porco recheo de boletus con pataca panadeira en salsa de mencía con froitos vermellos”
O Rego Gastrobar: “Courel Mountains”
Quiper: “Nido de pasta”
Taberna: Gambón en salsa de pimenta negra”
Lago: “Turnedor ó queixo de Cabrales”
Félix: “Corazón de pataca con solombo en viño branco acompañada de champiñóns en salsa de cebola caramelizada”.

A tapa presentada ó concurso, estará a disposición do público consumidor nun número suficiente e razoable de unidades ou porcións, en horario de 12:00 a 14:30 e de 19:00 a 22:30 horas.

 Na presente edición hai numerosos premios para as persoas que completen o circuíto e emitan o seu voto á mellor tapa entre todas as participantes. Así poden optar a un premio de  300,00€ en metálico; unha estancia e almorzo para dúas persoas na Hospedería Ferrería de Quintá; unha estancia para catro persoas na Aldea Rural “O Busto” (Pobra de Brollón); varias comidas, ceas  ou almorzos para dúas persoas en diversos establecementos de Quiroga e a comarca; ou un lote de productos  típicos de Caurelor, Lar de Ricobao, Porvide, Deiki, Don Cosme, Atrium Vitis, Cervexa Curriña e o Rego Natura.

Pola súa banda o local gañador da mellor tapa da presente edición recibirá 100,00€ e unha placa conmemorativa.

14 abr. 2019

MONTAÑAS DO COUREL DECLARADO XEOPARQUE MUNDIAL POLA UNESCO


Montañas do Courel é  Xeoparque Mundial. Así o declarou o xoves a Unesco en París nunha xuntanza da executiva deste organismo dependente de Nacións Unidas. E que converte a este territorio no primeiro xeoparque de Galicia e no primeiro de todo o Noroeste peninsular. O alcalde de Quiroga, Julio Álvarez, amosaba a súa gran satisfacción por este recoñecemento mundial, anunciaba tamén que se vai seguir traballando nesta liña e pedía a colaboración da cidadanía para manter este título que a Unesco revisa cada catro anos.

 Un xeoparque é un territorio que presenta un patrimonio xeolóxico notable e que leva a cabo un proxecto de desenvolvemento baseado nunha promoción turística, pero sen ningún tipo de restrición. O pregamento de Campodola – Leixazós, numerosas covas, restos fósiles de flora e fauna extinguidas ou os restos da minería romana avalan o extenso patrimonio xeolóxico deste territorio.

O proxecto comezaba xa no ano 2004 coa inauguración do primeiro miradoiro xeolóxico de Galicia, o miradoiro de Campodola-Leixazós. Desde entón, fóronse realizando numerosas accións conducentes á posta en valor do patrimonio xeolóxico da comarca.

No 2010, continuouse coa dotación de novos miradoiros: o Miradoiro de Fisteus e o Miradoiro de Montefurado. Un ano despois inaugurouse o Museo Xeolóxico de Quiroga, destinado a difundir e poñer en valor os principais recursos xeolóxicos de toda a comarca e que a día de hoxe é un referente en Galicia, recibindo no 2016 o premio da Cámara Mineira de Galicia polo seu labor de divulgación, e tamén un referente dentro do programa Terra do colexio Oficial de Arquitectos de Galicia para as visitas de escolares. Organizáronse as primeiras xornadas sobre xeoloxía da comarca en Quiroga.

Sería no ano 2015 cando os municipios de Quiroga, Folgoso do Courel e Ribas do Sil se unen para  impulsar a creación dun xeoparque que englobaría os principais elementos do patrimonio xeolóxico da zona. A superficie da proposta abarcaba 578 km2, a totalidade dos tres concellos e nos que residen uns 5.720 habitantes.
         
No 2016 formalizan a constitución dunha asociación, denominada Montañas do Courel, coa finalidade de traballar para conseguir o recoñecemento da comarca dentro da categoría Xeoparque Mundial que concede a Unesco. O seguinte paso do proxecto, foi configuración dun comité científico para traballar na elaboración dos documentos técnicos dos recursos da comarca. Doutra banda, apostouse por dispoñer unha estreita relación con todas as universidades galegas e de maneira especial cos investigadores que desenvolven o seu labor científico sobre este territorio.

A candidatura dispuxo de apoio económico dos tres concellos implicados, así como do GDR Ribeira Sacra-Courel, da Deputación Provincial de Lugo e da Xunta de Galicia. Apoiaron a candidatura as asociacións culturais do territorio, clubs deportivos, empresas de turismo, o colexio oficial de arquitectos de Galicia, a Cámara Mineira de Galicia e asociacións e empresarios mineiros da comarca.

O gran paso deste proxecto foi no 2017, cando despois da visita de membros da Comisión de Patrimonio Xeolóxico da Sociedade de Xeoloxía de España, o Comité Nacional Español de Geoparques informaba favorablemente á proposta presentada pola Asociación Montañas do Courel. Este informe era o primeiro filtro que debe superar calquera proposta antes de que a Comisión Nacional de Cooperación coa UNESCO aprobe a carta de apoio, para presentar definitivamente a candidatura oficial a xeoparque.

No mes de xullo do 2018 o territorio Montañas do Courel recibía a visita de dous auditores que se encargarían de avaliar a candidatura deste territorio ao ingreso na rede de parques xeolóxicos amparada pola Unesco. Unha avaliación favorable dada a decisión que ven de tomar agora a Unesco, a Organización das Nacións Unidas para a Educación, a Ciencia e a Cultura, convertendo a Montañas do Courel no 141 Xeoparque do Mundo.


26 mar. 2019

O XOVES ABRESE O PRAZO PARA PARTICIPAR NA XIX MOSTRA DO ACEITE


A  Comisión Organizadora da  Mostra do Aceite de Quiroga fixou o prazo e as condicións para participar na XIX edición desta festa de interese turístico que terá lugar o 12 de maio.
Este xoves día 28 de marzo ábrese o prazo para que os colleiteiros que queiran participar formalicen as súas inscricións nas oficinas xerais da casa consistorial. O prazo permanecerá aberto ata o día 3 de abril.
Tendo en conta que o número de colleiteiros participantes está limitado en seis, a súa selección farase por orde de inscrición no rexistro de entrada das oficinas municipais e obtendo un resultado aceptable no análise químico e organoléptico que realizará un laboratorio especializado do aceite que presenten.
Para poder participar esixirase ter unha colleita mínima de 200 litros de aceite e aboar 100 € de inscrición ou facilitar a cantidade equivalente en aceite.
No momento de formalizar a inscrición é obrigatorio presentar unha mostra de 1 litro en envase de cristal para enviar ao laboratorio que se encargue das análises e outra mostra de 250 cl para a cata previa á mostra que farán expertos na materia.
A Comisión Organizadora tamén se encargará o propio día da Mostra de recoller botellas azar dos aceites participantes para a súa cata.

24 mar. 2019

COMEZAN AS OBRAS DE AMPLIACIÓN DO MUSEO DE XEOLOXÍA E PALEONTOLOXÍA DE QUIROGA


Comezaron as obras de ampliación do Museo de Xeoloxía e Paleontoloxía de Quiroga.  A ampliación permitirá exhibir unha ampla serie de pezas que agora non poden mostrarse ao público por falta de espazo.  As obras permitirán o ensanche do museo polos dous laterais e tamén pola parte traseira, polo que todas as súas salas terán maior amplitude. Ademais crearase unha nova sala que servirá para proxeccións audiovisuais.
O proxecto de ampliación está orzamentado en 71.000 euros, cantidade que será sufragada en gran parte  polos fondos Leader que manexa o GDR Ribeira Sacra-Courel. A parte da obra que comezou e foi supervisada polo alcalde de Quiroga, Julio Álvarez, e polo enxeñeiro municipal, esta a realizala unha empresa local. Outra parte será acometida polos traballadores do obradoiro SilLor.
A primeira das cinco salas do museo está dedicada a formación do territorio de Galicia, coa análise do pregamento de Campodola-Leixazós. O contido desta tamén conta cunha colección de minerais e  rochas procedentes da bisbarra, que pretende ampliarase.

A segunda sala centrase na historia paleontolóxica. Aquí amósanse diferentes fósiles animais todos eles poboadores da nosa serra, entre os que destacan o esqueleto completo dun oso das cavernas. O proxecto de ampliación contempla que acolla a colección de fósiles recollida en diferentes puntos da comarca polo biólogo Manuel García Ávila e cedida ao concello.

 A terceira sala é a da idade dos xeos, representada por cantos de depósitos glaciares recollidos na zona da Lucenza, que se ampliará coa estalagmita da Cova de Arcoia, que permitiu estudar a secuencia climática.

 A cuarta das salas centrase nas primeiras ocupacións humanas da zona. Nesta sala pódense ver dez cranios dos primeiros humanos e ferramentas líticas do Paleolítico e do Neolítico, atopadas na zona da Hermida e na que se contempla albergar a reconstrución da muller prehistórica coñecida como Elba (a pastora do Courel), cuxos restos foron descubertos hai anos nunha cova da serra do Courel.

 Finalmente a última sala, na que se expoñen bloques de distintos minerais collidos na zona, representa a parte da nosa minería, tamén se ampliará.


QUIROGA SOLICITA A DENOMINACIÓN DE ORIXE PROTEXIDA PARA O SEU ACEITE E FIXA A DATA PARA A XIX MOSTRA DO ACEITE


A casa consistorial acolleu unha xuntanza para organizar a XIX Mostra do Aceite. Nesta xuntanza fixouse a data na que se celebrará esta festa de interese turístico, que será o domingo  12 de maio.
Unha vez máis, o 12 de maio, poñerase en funcionamento o muiño de aceite de Bendilló para amosar como era a elaboración tradicional do aceite. Esta demostración, que atrae a persoas de toda Galicia, serve de complemento á venda do aceite elaborado no noso municipio.
En vindeiras xuntanzas da comisión organizadora deste evento daranse a coñecer as demais actividades organizadas para esa xornada e tamén previas o desenvolvemento desta mostra.
A mostra do aceite que se ven celebrando dende hai 19 anos foi o primeiro paso que se deu dende o concello de Quiroga para a recuperación do aceite de oliva do noso municipio. O último paso dado tivo lugar o xoves 14 de marzo cando o alcalde de Quiroga, Julio Álvarez, e un grupo de olivicultores presentou no rexistro da Xunta de Galicia en Lugo a petición de Denominación de Orixe  Protexida (DOP) para o aceite de Quiroga.
Os trámites a seguir a partir de agora será que a Xunta tramite o expediente e o remita ao Ministerio de Agricultura, primeiro, e a Unión Europea despois. Con esta solicitude o concello de Quiroga da un paso importante  na recuperación do aceite de Quiroga, recuperación iniciada no ano 2000 coa celebración da 1ª Mostra do aceite.
O Concello xa ten rexistrado o nome de “Aceite de Quiroga” con dous principais fins: Certificar as características do produto de forma que quen queira utilizar esta marca deberá cumprir certos requisitos tanto na produción e elaboración como comercialización do aceite. E regular e ordenar as plantacións de oliveiras.
Para que os aceites poidan levar a etiqueta co nome de “Aceite de Quiroga” é requisito necesario que a materia prima proceda integramente da zona delimitada pola Comisión e aceptada en última instancia polo propietario da marca. Ademais a súa elaboración tamén se realizará no noso territorio e exclusivamente con oliveiras das variedades aceptadas pola Comisión creada para o seu cumprimento.
Co fin de evitar fraudes o concello leva un rexistro de Plantacións de Oliveiras cos datos do seu titular e da plantación e un rexistro dos muíños existentes que poidan optar ó uso da marca rexistrada.
Para a elaboración do aceite de oliva virxe extra, amparado pola marca de garantía “Aceite de Quiroga” empregaranse olivas das distintas variedades que existen dentro do municipio de Quiroga. Os aceites consideraranse monovarietais cando procedan, a lo menos nun 80%, dunha única variedade de olivas. As variedades que se poden empregar dentro desta marca de garantía son varias: mansa, brava, arbequina, …
 A orixe do rexurdir do aceite galego hai que sitúalo neste val de Quiroga coa recuperación das oliveiras centenarias que hai na comarca, onde se descubriu, grazas ás investigacións do CSIC, que hai variedades autóctonas únicas, como a brava e a mansa, con características organolépticas singulares, que non estaban recollidas no “Banco de Germoplasma Mundial de Variedades de Olivo”, con sede en Granada.
Estas variedades, mansa e brava, son moi abundantes neste val de Quiroga. Según un informe do xeólogo e catedrático emérito da Universidad de A Coruña, Juan Ramón Vidal Romaní, sobre o vínculo das oliveiras de Quiroga coa historia, foron introducidas polos romanos nesta zona, convertida pola historia xeolóxica nun invernadoiro natural. Os romanos plantaron un dos seus cultivos totémicos en terras con sedimentos auríferos,  o que sen dúbida lle da o aceite de Quiroga unha das características distintivas: a súa cor.

11 mar. 2019

QUIROGA XA TEN DEFINITIVAMENTE PLAN XERAL DE ORDENACIÓN MUNICIPAL


Quiroga xa ten definitivamente Plan Xeral de Ordenación Municipal. Esta mañá a conselleira de Medio Ambiente, Territorio e Vivienda, Ángeles Vázquez, e o alcalde de Quiroga, Julio Álvarez Núñez, asinaban a aprobación do Plan de Ordenación de Quiroga.

Tras 13 anos de tramitación, o novo planeamento pon fin ás Normas subsidiarias municipais do ano 1995; e da paso a un plan que en palabras do alcalde de Quiroga está na senda do orden urbanístico, económico e sobre todo ambiental.

A conselleira de Medio Ambiente afirmou que o Pxom representa un novo marco legal para dar resposta á situación do municipio e outorgándolle seguridade xurídica, coherencia coa realidade territorial e un desenvolvemento sostible do  territorio e sobre todo aos máis de 3.200 veciños dun concello que está chamado a crecer.

Con este Plan Xeral de Ordenación Municipal o solo urbano onde se poderá construír directamente auméntase en 368.500 metros cadrados. Amplíase a superficie de solo urbano nas zonas da Campaza e o Regueiral, na recta do Toucedo, na zona do Poboado e nas zonas San Xulián – As Estradas e Carballeira – Hospital. Ademais desaparecen na vila de Quiroga ás Unidades de Xestión (UGAS) que delimitaban a construción.
Para  a elaboración deste plan que comezou no 2006 tivéronse en conta o 90% das alegacións practicadas ou emitidos polos interesados durante o período de información pública, 272 en total.
Sempre que este plan tivo que levarse a sesión plenaria foi aprobado por unanimidade  por todos os grupos políticos con representación municipal. A derradeira aprobación foi na sesión plenaria celebrada no pasado mes de decembro.


22 feb. 2019

SETE INSCRITOS PARA PARTICIPAR NA XXXVII FEIRA DO VIÑO DE QUIROGA


Rematado o prazo de inscrición, sete son os colleiteiros que se anotaron para participar na XXXVII Feira do Viño de Quiroga que se celebrará o 20 e 21 de abril.

Os requisitos mínimos que se lle esixían para poder participar era que os viños tivesen unha graduación alcohólica mínima de 12 º para o viño branco e de 11,5 º  para o viño tinto. E unha acidez volátil máxima de 0,5 gr. acético/l. para o viño branco e de 0,6 gr. acético/l. para o viño tinto.

En canto á cantidade, fixarase unha cantidade mínima de 200 botellas de viño branco e 250 botellas de viño tinto para presentar na feira, e outra cantidade igual ou superior na adega.

Estes sete colleiteiros inscritos deberán aboar a cantidade de 100 € e entregar mostras do viño inscrito que terá que superar dúas probas, unha análise organoléptica e unha cata popular polos membros da Confraría do Viño de Quiroga.


21 feb. 2019

UN FERIDO NUN INCENDIO DECLARADO NA TARDE DE ONTE NUN ALPENDRE


Un incendio declarado na tarde de onte nun alpendre dunha vivenda de San Vitoiro saldouse cun ferido e cuantiosos danos materiais. O ferido queimouse nos brazos e nunha perna mentres tentaba apagar o lume, aínda que sen temer pola súa vida mobilizouse un helicóptero de emerxencias para o seu traslado a un centro hospitalario.

O incendio declarouse sobre as tres da tarde, ao parecer a causa dunhas cinzas mal apagadas que prenderon na leña amoreada no alpendre. Foi unha veciña a que deu a voz de alarma, xa que a propietaria, unha octoxenaria, atopábase dentro da vivenda pegada ao alpendre e non se decatara do lume.

A intensa fumareda mobilizou aos veciños de San Vitoiro que tentaron apagar as lapas mentres avisaban ao 112.  Este núcleo conta con bocas de rego nas súas rúas pero o nerviosismo da situación e a procura de mangueiras complicou un traballo difícil de levar a cabo mentres non chegaron os profesionais.

Ata o lugar desprazáronse os GES de Quiroga e de Folgoso do Courel, os bombeiros de Monforte, axentes da Garda Civil de Quiroga e Policía Local. A pesar do gran despregue foi imposible evitar que ardera o alpendre, remodelado recentemente e que albergaba gran cantidade de leña. Outra das dependencias situada tamén dentro do patio da vivenda viuse afectada aínda que en menor medida.

10 feb. 2019

CELIA DÍAZ PRESENTOU A SÚA ÚLTIMA OBRA EN QUIROGA


A escritora e Filla Adoptiva de Quiroga, Celia Díaz Núñez, escolleu unha vez máis o noso concello para presentar o seu último libro. Nesta ocasión Celia publica unha obra de teatro infantil, galardoada co premio O Facho de Teatro infantil, que leva por título " O castelo de Pena Redonda, o máis tolo da contorna". A casa da cultura acolleu o sábado a presentación desta nova obra de Celia Díaz, que se da a coñecer como dramaturga en 2004 cando publica a súa primeira obra teatral infantil e que dende entón ten publicadas catro novelas, un ensaio, tres obras teatrais infantís e material didáctico para a aprendizaxe da lingua galega.

O acto, aberto ao público, estivo presentado pola directora do CEIP de Quiroga e  tenente de alcalde do Concello de Quiroga, Ana Núñez.; que foi a encargada de dar paso ao ilustrador do libro, Ricardo Cid Paz, e a propia autora, Celia Díaz.


A propia autora foi a que presentou esta obra de teatro infantil e as súas personaxes. Unha obra enmarcada no ano 1250 que se centra en narrar o día a día no Castelo de Pena Redonda, un lugar moi particular no que para os seus habitantes a vida transcorre lenta, moi lenta.


O acto de presentación contou tamén cunha lectura dramatizada de varios capítulos do libro a cargo de Nacho, Natalia, Manuel Antonio e Nadia, alumnos e alumnas de 5º e 6º de primaria do CEIP de Quiroga.


O acto rematou coa firma de libros por parte da autora e do ilustrador.




7 feb. 2019

CONTINÚASE COA REFORMA INTERIOR DO PAVILLÓN MUNICIPAL


Continúase a traballar na reforma interior do pavillón municipal coa ampliación dos vestiarios e o cambio de localización dos baños. Estas obras corren a cargo dos alumnos traballadores do V Obradoiro de Emprego Sil Lor, do que se benefician os concellos de  Ribas de Sil, Folgoso do Courel e Quiroga.

Neste quinto SilLor os 20 alumnos e alumnas dos tres concellos reciben formación teórica e práctica en especialidades relacionadas coa albanelaría e a construción. O obradoiro conta coa especialidade de Operacións auxiliares de albanelaría, de fábricas e cubertas, no que están integradas as  7 persoas do concello de Quiroga.

No pavillón traballase no cambio de baños que estaban situados na planta baixa e que agora se construirán na parte superior, podendo acceder a eles directamente dende as gradas. Aumentarase o espazo da grada na parte superior, onde quedará espazo para unha pequena zona de cafetería. En canto os vestiarios, dotarase duns novos secundarios e nos actuais farase unha profunda reforma co fin de aumentar a superficie e facela máis funcional.

Con estes traballos quérese conseguir que os usuarios deste edificio deportivo non teñan que pasar continuamente pola pista de xogo para poder acceder a vestiarios, baños ou almacén.

Esta mañá directivos do obradoiro e o alcalde de Quiroga achegáronse a supervisar os traballos nos que están a traballar os alumnos deste novo obradoiro.  


QUEIXAS POLO MAL ESTADO DA ESTRADA N-120


O asfalto da N-120 cada vez atópase en peor estado. As choivas do último mes acabaron de esnaquizar un xa de por si desfeito firme e cada vez son máis os condutores que sofren as consecuencias. Rodas e amortiguadores dos vehículos reséntense a diario e os condutores quéixanse continuamente do mal estado desta estrada nacional ao seu paso polo noso municipio.

No mes de decembro a corporación municipal de Quiroga aprobaba unanimemente unha moción do grupo popular pedindo ao Goberno, titular da estrada, o seu arranxo.

O Ministerio de Fomento anunciaba a principios de xaneiro, a través do delegado do Goberno en Galicia, Javier Losada, que se comezaba a reparar o firme do tramo da estrada  N-120 que pasa polo sur de Lugo. Nun paquete de actuacións de emerxencia que o Ministerio de Fomento aprobou  o pasado 13 de decembro, cun orzamento de 1.200.000 euros, incluíase a reparación da estrada  N-120 xunto coa  N-540, que comunica Lugo e Ourense por Chantada, a  N-VI en Lugo e a  N-634 na Mariña.

No caso da  N-120, o tramo para reparar inclúe todo o territorio de Quiroga. É o que comprende entre o quilómetro 480 e o 526, é dicir, dende a límite de Quiroga coa comarca de Valdeorras ata Monforte de Lemos. Trátase de 46 quilómetros que inclúen algún dos tramos en peor estado desta estrada, cuxo asfalto deficiente leva tempo provocado protestas dos condutores que usan habitualmente esta ruta entre Ponferrada e Ourense.

No tramo máis problemático polo número de accidentes, o da subida da Frieira, cambiouse a capa de rodaxe e agora trabállase na zona da Brence. Pero todo o estado da N-120 ao seu paso por Quiroga atópase cheo de fochancas e os centos de condutores que pasan por ela a diario amosan continuamente o seu malestar. Unha estrada cun elevado número de accidentes ao que agora se une o perigo polo seu mal estado, máis acusado cando chove, xa que a auga impide ver os buracos e fochas do firme.