9 dic. 2018

OS CIENTÍFICOS VIDAL ROMANÍ E AURORA GRANDAL VEÑEN COÑECER O PROXECTO DE AMPLIACIÓN DO MUSEO DE XEOLOXÍA E PALEONTOLOXÍA DE QUIROGA


José Ramón Vidal Romaní, director do Instituto Universitario de Geología da Coruña e Aurora Grandal D’Anglade, profesora de paleontoloxía da Universidade da Coruña achegáronse esta mañá ata o Museo Xeolóxico de Quiroga para coñecer o proxecto de ampliación desta edificación. Os dous profesores, implicados dende o primeiro momento co Museo Xeolóxico de Quiroga, apoiaron esta ampliación e aproveitaron a reunión co alcalde, Julio Alvarez, e co director do Museo, Ramón Vila, para aportar ideas e propostas de cómo cubrir os novos espazos.

A ampliación do museo local de Xeoloxía e Paleontoloxía permitirá exhibir unha ampla serie de pezas que agora non poden mostrarse ao público por falta de espazo.  As obras permitirán a ampliación do museo polos dous laterais e tamén pola parte traseira, polo que todas as súas salas terán maior amplitude. Ademais crearase unha nova sala que servirá para proxeccións audiovisuais.

A primeira das cinco salas do museo está dedicada a formación do territorio de Galicia, coa análise do pregamento de Campodola-Leixazós. O contido desta tamén conta cunha colección de minerais e  rochas procedentes da bisbarra, que pretende ampliarase.

A segunda sala centrase na historia paleontolóxica. Aquí amósanse diferentes fósiles animais todos eles poboadores da nosa serra, entre os que destacan o esqueleto completo dun oso das cavernas. O proxecto de ampliación contempla que acolla a colección de fósiles recollida en diferentes puntos da comarca polo biólogo Manuel García Ávila e cedida ao concello.

 A terceira sala é a da idade dos xeos, representada por cantos de depósitos glaciares recollidos na zona da Lucenza, que se ampliará coa estalagmita da Cova de Arcoia, que permitiu estudar a secuencia climática.

 A cuarta das salas centrase nas primeiras ocupacións humanas da zona. Nesta sala pódense ver dez cranios dos primeiros humanos e ferramentas líticas do Paleolítico e do Neolítico, atopadas na zona da Hermida e na que se contempla albergar a reconstrución da muller prehistórica coñecida como Elba (a pastora do Courel), cuxos restos foron descubertos hai anos nunha cova da serra do Courel.

Finalmente a última sala, na que se expoñen bloques de distintos minerais collidos na zona, representa a parte da nosa minería, tamén se ampliará.

O proxecto de ampliación xa está orzamentado en 71.000 euros, cantidade que será sufragada en gran parte  polos fondos Leader que manexa o GDR Ribeira Sacra-Courel. Unha parte da obra estará acometida polos traballadores do obradoiro SilLor.

5 dic. 2018

O BISPADO DE LUGO E O CONCELLO DE QUIROGA ASINAN UN CONVENIO PARA O ARRANXO DE TRES IGREXAS PARROQUIAIS


O Concello de Quiroga e o Bispado de Lugo asinaron onte un convenio para o arranxo de tres igrexas parroquiais no municipio.

Cun importe de 50.470 €, dos que 21.000 € serán aportados polo Concello de Quiroga, arranxaranse as igrexas de San Antón de Vilanuíde, Sta Eulalia de Bendollo e Santiago de Augasmestas.

Tanto o Bispo D. Alfonso Carrasco como o alcalde Julio Alvarez, asinantes do convenio, coincidiron na importancia de conservar estes templos e na intención de seguir colaborando en vindeiras ocasións.

O Bispo de Lugo recordou que as igrexas son a “expresión de cultura vivida nas parroquias e un tesouro prezado para o concello que é bo coidar entre todos”.
  
Pola súa banda, Julio Alvarez, falou da positividade do mantemento destas “xoias arquitectónicas para que non se deteriore o importante patrimonio artístico e arquitectónico que está nas igrexas”.
  
Foi precisamente por esta razón, que o bispo Alfonso Carrasco calificou de “amplitude de miras”, pola que felicitou ao Concello de Quiroga durante a sinatura do convenio.


4 dic. 2018

OS TRABALLADORES DO OBRADOIRO SILLOR COMEZAN A REFORMA INTERIOR DO PAVILLÓN MUNICIPAL


O pasado mes de novembro comezaba a súa andaina un novo Obradoiro de Emprego do que se benefician os concellos de  Ribas de Sil, Folgoso do Courel e Quiroga.
Neste quinto SilLor os 20 alumnos e alumnas dos tres concellos reciben formación teórica e práctica en especialidades relacionadas coa albanelaría e a construción durante os seus nove meses de duración. O obradoiro conta coa especialidade de Operacións auxiliares de albanelaría, de fábricas e cubertas, no que están integradas as  7 persoas do concello de Quiroga.
En Quiroga as obras nas que se traballará son a segunda fase de ampliación do museo xeolóxico e a reforma interior do pavillón polideportivo municipal. A reforma interior do pavillón municipal consistirá na ampliación dos vestiarios e no cambio de localización dos baños.
No pavillón xa se comezou a traballar no cambio de baños que estaban situados na planta baixa e que agora se construirán na parte superior, podendo acceder a eles directamente dende as gradas. Aumentarase o espazo da grada na parte superior, onde quedará espazo para unha pequena zona de cafetería.
En canto os vestiarios, dotarase duns novos secundarios e nos actuais farase unha profunda reforma co fin de aumentar a superficie e facela máis funcional.
Con estes traballos querese conseguir que os usuarios deste edificio deportivo non teñan que pasar continuamente pola pista de xogo para poder acceder a vestuarios, baños ou almacén.
Esta mañá os directivos do obradoiro, o concelleiro de deportes e o alcalde achegáronse a supervisar os traballos nos que están a traballar os alumnos deste novo obradoiro.  

26 nov. 2018

O MUSEO XEOLÓXICO SACA A VENDA PRODUCTOS DE PROMOCIÓN


O Museo Xeolóxico de Quiroga acaba de sacar unha serie de produtos de promoción que xa ten á venda no propio museo. Todos eles levan un logo personalizado, deseñado expresamente para os produtos. Trátase da pegada e da silueta dun oso das cavernas, peza máis emblemática do museo.

O “merchandising”  está composto por camisetas, cuncas, gorras, imáns e mochilas de cordóns, todo a prezos moi accesibles pensando en que os visitantes poidan levar todos os produtos de recordo.  Os prezos oscilan entre os 2’50 € que costa un imán ata os 8€ das camisetas en talla adulto.

Esta fin de semana cumprirase o sétimo aniversario da inauguración do Museo  Municipal  de  Xeoloxía e Paleontoloxía  de  Quiroga no que teñen cabida todos os contidos xeolóxicos máis representativos da zona.  Este Museo recibiu no 2016 un dos premios Santa Bárbara, concedidos pola Cámara Oficial Mineira de Galicia, na categoría de comunicación, por poñer de manifesto a importancia do sector mineiro para o tecido industrial galego e o desenvolvemento da sociedade.
Desde a súa apertura, o centro recibe cada ano un maior número de visitantes, entre os que destacan as visitas escolares. Os percorridos que pasan polo Museo están entre os máis solicitados polos centros educativos que participa no Proxecto Terra,  promovido polo  Colexio Oficial de Arquitectos de Galicia.
O Museo recolle os principais acontecementos xeolóxicos que definen o territorio galego, unha representación da xeoloxía da comarca quiroguesa e unha exposición de restos óseos da fauna cuaternaria da zona; onde chama a atención o esqueleto completo dun oso das cavernas, que serviu de inspiración para crear o logo dos produtos promocionais.

A acción dos xeos glaciares, mostras sobre as primeiras ocupacións humanas da zona, e a actividade mineira dende os romanas ata a actualidade, completan as instalacións do Museo que se vai ampliar con tres novas salas, unha delas acollerá a reconstrución da faciana de  Elba, a primeira pastora mesolítica estudada en España e cuxos restos se atoparon no Courel.

Ademáis de todo esto, o Museo Xeolóxico é o punto de partida do proxecto Xeoparque Montañas do Courel. O sinclinal do Caurel, as zonas mineiras, os vales glaciares da Seara e Vieiros, os restos fósiles e as primeiras testemuñas da presenza humana nesta zona, conforman o futuro Xeoparque.

O museo Xeolóxico abre as súas portas ao público de luns a venres dende ás once e media da mañá ata a unha da mediodía. Os sábados, domingos e festivos o horario de apertura é de doce da mediodía a unha. Aparte conta co servizo de cita previa para visitas guiadas de máis de dez persoas.
.

21 nov. 2018

TERREOS ABANDONADOS DE BENDOLLO PREPARARANSE PARA A PLANTACIÓN DE OLIVEIRAS


Unhas 30 hectáreas de terreos abandonados en Bendollo formarán parte do programa “Propiedade, mobilidade de terras e valorización territorial”, que impulsa a Axencia Galega de Desenvolvemento Rural.

O Subdirector  de  Mobilidade do Banco de Terras de Agader, Alejandro Ignacio Sánchez  de  Dios, foi o encargado de presentarlle este proxecto aos veciños de Bendollo, nunha xuntanza no Centro Social do pobo. Á xuntanza tamén acudían o alcalde de Quiroga, Julio Alvarez, o secretario xeral de Agader, Severino Alvarez Monteserín, e técnicos do concello e de Agader.

Nestas 30 hectáreas, maioritariamente en terreos en man común, o proxecto da Xunta contempla a plantación de oliveiras de variedades autóctonas.

Nun primeiro momento os veciños amosáronse de acordo co proxecto de mobilidade de terras, polo que os técnicos de Agader continuarán coa identificación dos terreos situados en dúas zonas diferentes do núcleo. Unha vez identificadas as fincas comezarase co acoutado dos terreos para posteriormente rozalos, xa que a Xunta encargarase de limpalas fincas antes de poñelas en arrendamento. Tamén se fixará o prazo e o prezo de arrendamento.

O Subdirector  de  Mobilidade do Banco de Terras de Agader remarcoulle aos asistentes á reunión catro puntos importantes para os propietarios dos terreos que entren no banco de terras: a titularidade dos terreos segue sendo dos propietarios, estes terreos dedicaranse exclusivamente á plantación de oliveiras, se o arrendatario non paga a Xunta farase cargo dos pagos e por último, os terreos devolveranse finalizado o prazo fixado de arrendamento en mellores condicións das que se atopaban inicialmente.

O proxecto de mobilidade de terras ten  por obxectivo loitar contra o abandono poñendo en produción terras de cultivo que foron abandonadas á vez que se axuda á loita contra os incendios forestais.

16 nov. 2018

O CONCELLO NON LEVARÁ DIRECTAMENTE A XESTIÓN DO CENTRO DE DÍA


Reuniuse por segunda vez a Comisión de Estudio para poñer en marcha o Centro de Día da Ribeira. A comisión está presidida pola tenente de alcalde, Ana Núñez, e conta con  representantes de todos os partidos políticos da corporación municipal de Quiroga.
No prazo de dous meses dende a súa posta en marcha o 30 de outubro, esta comisión ten que elaborar unha memoria xustificativa  na que se recollan as condicións máis idóneas para poder abrir este centro, como se aprobou por unanimidade na pasada sesión plenaria.
Nesta segunda xuntanza da comisión aprobouse que a xestión do centro sexa indirecta, é dicir que non a xestione o concello directamente se non que se saque a concurso para que sexa outra entidade quen a xestione.
Tras esta decisión agora a comisión traballa na elaboración dun regulamento interno para deixar para o final a elaboración dunhas bases de licitación polas que este servizo poida saír a concurso.  
O Centro de Día ocupa a primeira planta do edificio polivalente da Ribeira. Na súa planta baixa atópase o centro social da Ribeira. E contémplase que na segunda planta serva de lugar de acollida temporal para persoas en risco de exclusión social. O Centro de Día de atención a persoas maiores, ao que poderán ter acceso 25 persoas maiores, está rematado e equipado dende a pasada primavera e agora esta comisión traballa para a súa posta en funcionamento.

9 nov. 2018

UN CONVENIO ENTRE O CONCELLO E A DEPUTACIÓN PERMITIRÁ ARRANXAR O ACCESO A 17 NÚCLEOS DE QUIROGA

O Concello de Quiroga e a Deputación Provincial de Lugo asinaron na mañá de onte un convenio de cooperación para a reparación e a mellora de camiños de acceso a varios núcleos do municipio.
O alcalde, Julio Álvarez, e o Deputado da área de goberno Interior e Relacións Institucionais, Álvaro Santos,  asinaron un convenio de 70.000 € para o arranxo de accesos a 17 núcleos do noso municipio. A finalidade do convenio, en palabras dos asinantes, é axudar aos que viven no rural que son máis desfavorecidos e favorecer a accesibilidade e a mobilidade dos veciños e veciñas destas zonas.

 Tras a firma do convenio achegáronse ata a pista de  Pacios da Serra, un dos camiños que vai ser obxecto das melloras e que nestes momentos é dos que se atopa en peor estado.

Ademais do acceso a Pacios da Serra con este presuposto de 70.000 € tamén se van mellorar os accesos a Vilanuide, San Martiño, Ferreira, Centeais, Montefurado, Aldea, O Ivedo, Vilaster, Chao da Casa, Bendollo, Paradapiñol, Cereixido, A Barca, Penarrubias, A Vergaza e Fisteus. 

7 nov. 2018

CONTINÚASE A TRABALLAR PARA OBTER A MARCA DE CALIDADE PARA O ACEITE DE QUIROGA


Esta semana o alcalde de Quiroga, Julio Álvarez, reuníase co conselleiro do Medio Rural, José González, en Santiago para exporlle as súas demandas e suxestións en relación co agro deste municipio lucense.  Ambos abordaron, entre outras cuestións, a posta en valor da produción de aceite neste concello e a mobilización de terras para a plantación de oliveiras.

Por outra banda o Instituto de Calidade Alimentaria da Xunta, dependente da Consellería de Medio Rural, continúa a traballar co Concello de Quiroga de cara a tentar unha marca distintiva para o aceite de Quiroga. Unha das funcións deste Instituto é promocionar e protexer a calidade diferencial dos produtos alimentarios galegos acollidos aos distintos indicativos de calidade.

Nestes momentos o  Concello xa ten rexistrado o nome de “Aceite de Quiroga” con dous principais fins: Certificar as características do produto de forma que quen queira utilizar esta marca deberá cumprir certos requisitos tanto na produción e elaboración como comercialización do aceite. E regular e ordenar as plantacións de oliveiras.

Para que os aceites poidan levar a etiqueta co nome de “Aceite de Quiroga” é requisito necesario que a materia prima proceda integramente da zona delimitada pola Comisión e aceptada en última instancia polo propietario da marca. Ademais a súa elaboración tamén se realizará no noso territorio e exclusivamente con oliveiras das variedades aceptadas pola Comisión creada para o seu cumprimento.

Co fin de evitar fraudes o concello leva un rexistro de Plantacións de Oliveiras cos datos do seu titular e da plantación e un rexistro dos muíños existentes que poidan optar ó uso da marca rexistrada.

Dende o concello séguese a pelexar por un aceite único e xenuíno e trabállase co Instituto de Calidade Alimentaria en colaboración cos olivicultores da zona para acadar a marca de calidade para o aceite e incluso poder chegar a unha denominación de orixe.



5 nov. 2018

PRESENTADO O OBRADOIRO DE EMPREGO SILLOR V


Hoxe comezou un novo Obradoiro de Emprego do que se benefician os concellos de  Ribas de Sil, Folgoso do Courel e Quiroga.
O quinto obradoiro Sil Lor, financiado pola Consellería de Economía con 290.000 €, foi presentado esta mañá polo delegado territorial, José Manuel Balseiro,  en San Clodio. Á presentación acudiron representantes municipais dos tres concellos implicados.
20 alumnos comezan neste obradoiro que se prolongará durante nove meses e no que recibirán formación teórica e práctica en especialidades relacionadas coa albanelaría e a construción.
O obradoiro terá a súa sede no Concello de Ribas de Sil e contará con dúas especialidades: Operacións auxiliares de revestimentos continuos en construción, con 7 alumnos/-as no concello de Folgoso do Courel; e Operacións auxiliares de albanelaría, de fábricas e cubertas, no que estarán 6 persoas do concello de Ribas do Sil e 7 persoas do concello de Quiroga.
Este proxecto Sil Lor V contempla varias obras a realizar nos tres concellos implicados. En Ribas de Sil construirase o Museo da Minaría Romana. En Folgoso do Courel rehabilitaranse as escolas de A Teixeira e O Carballal e os seus espazos dianteiros para centros sociais e remataranse os interiores do centro social de Sobredo.
En Quiroga as obras nas que se traballará son a segunda fase de ampliación do museo xeolóxico e a reforma interior do pavillón polideportivo municipal. No caso do museo xeolóxico construiranse dúas novas salas. A reforma interior do pavillón municipal consistirá na ampliación dos vestiarios e no cambio de localización dos baños.

2 nov. 2018

BIONDAS E NOVO ASFALTO NO TRAMO MÁIS PERIGOSO DA ESTRADA DE PONTE BARREIRO - VILARBACÚ


Estase a traballar na rexeneración da estrada LU-P-5001, dende Ponte Barreiro ata Vilarbacú. Nesta estrada estase a votar un novo aglomerado en quente no tramo de un km aproximadamente á altura do Val de Seceira, na zona de máis curvas da estrada.
Neste tramo tamén se colocarán “biondas” ou “quita medos” para dar maior seguridade á esta vía. No resto da estrada estanse tapando fochancas. Unha vez rematados estes traballos pintarase novamente o firme da estrada.
Na tarde de onte o alcalde de Quiroga, Julio Álvarez, achegouse ata esta zona para comprobar a marcha dos traballos que están subvencionados pola Deputación Provincial de Lugo, titular da vía, con 88.000 €.

31 oct. 2018

CREASE A COMISIÓN DE ESTUDIO PARA POÑER EN MARCHA O CENTRO DE DÍA


Na tarde de onte celebrouse a primeira xuntanza da Comisión de Estudio para poñer en marcha o Centro de Día da Ribeira. A comisión, presidida polo alcalde e conta con  representantes de todos os partidos políticos da corporación municipal de Quiroga, ten como obxetivo poder abrir canto antes este servizo.

No prazo de dous meses esta comisión terá que elaborar unha memoria xustificativa  na que se recollan as condicións máis idóneas para poder abrir este centro, como se aprobou por unanimidade na pasada sesión plenaria.

Este centro ocupa a primeira planta do edificio polivalente da Ribeira. Na súa planta baixa atópase o centro social da Ribeira. E contémplase que na segunda planta serva de lugar de acollida temporal para persoas en risco de exclusión social. O centro de día de atención a persoas maiores, ao que poderán ter acceso 25 persoas maiores, está rematado e equipado dende a pasada primavera.

DIVERSOS USOS PARA A ZONA QUE OCUPARON AS ANTIGAS CASAS DOS MESTRES


      Comezaron as obras  nos  terreos  lindeiros co  albergue municipal, onde estiveron asentadas as antigas vivendas dos mestres

Limparanse e acondicionaranse os máis de 1800 metros cadrados cos que conta a parcela, e levarase a cabo a construción dunha gabia con pavimentación.  Este espazo terá dúas partes diferenciadas, unha zona de céspede e outra pavimentada de grava.

A zona de grava servirá para  múltiples usos, utilizándose habitualmente como aparcadoiro. A parte de céspede dotarase  de mobiliario público urbano, bancos e papeleiras.

O acondicionamento da zona rematarase coa colocación dunha varanda de ferro forxado na parte de acceso o aparcadoiro dos buses escolares.

Na xornada de onte o rexedor local, Julio Álvarez,  xunto coa arquitecta do concello, achegouse  á praza para comprobar a marcha destas obras que forman parte do Plan Único 2018 da Deputación Provincial de Lugo e conta tamén cunha axuda económica da Consellería de Vicepresidencia, Administracións Públicas e Xustiza.

29 oct. 2018

OS BOIS DE MARIO NOGUEIRA NO LUAR DA TVG


A gandería de Mario Nogueira é cada vez máis “famosa” e volve conquistar popularidade na pequena e gran pantalla. Os seus  bois apareceron agora no programa Luar da TVG. Bonito e Boneco, estes tranquilos exemplares de 800 kilos volveron a pasearse por un estudio de televisión.
Estes  impoñentes exemplares xa están máis que acostumados aos focos e as cámaras non en van participaron na rodaxe da serie “Al final del Camino”, interviñeron nun capítulo de serie “Doutor  Who” e, na película “Elisa e  Marcela”, da directora Isabel Coixet. Ademais da campaña publicitaria de  Gucci.
Tamén ten vacas nesa explotación e tamén saíu algunha famosa como “Juanita”, a vaca do concurso televisivo de Gran Hermano de Tele5. Ademais a súa dona Cristina Gómez recibiu o premio a mellor manexadora de bois no pasado mes de agosto en Chantada.
Mario Nogueira é posiblemente o home que máis bois move hoxe en España, na súa explotación de Chao da Casa conta actualmente cuns 60 exemplares. Algunhas parellas destes bois participan en romarías, outros destínanse a carne e outro grupo vendese ao País Vasco para o deporte de Arrastre.
Estes animais que viven ceibes nos montes de Chao da Casa, poden chegar a comer uns 10 quilos diarios de pienso, ademais de fariñas e forraxes.

26 oct. 2018

XORNADAS DIVULGATIVAS SOBRE OS GLACIARES

O  GDR Ribeira Sacra  desenvolveu a pasada fin de semana unhas xornadas de divulgación sobre os efectos dos glaciares no relevo e a paisaxe.
50 persoas participaron nun programa de actividades que comprendía tres conferencias e incluían unha visita guiada a lugares da serra do Courel onde se aprecian as pegadas dos antigos glaciares, especialmente visibles en paraxes como a lagoa de Lucenza e o val da Seara.
As conferencias corrían a cargo de Augusto Pérez Alberti, profesor de xeografía física da  Universidade de Santiago e que  trataba sobre «Glaciarismo e  periglaciarismo das montañas do Courel».
Outro relatorio abordaba as pegadas dos glaciares na cordilleira Cantábrica e estaba impartido por Jesús Ruiz Fernández, investigador da Universidade de Oviedo. A terceira conferencia corría a cargo de Marc Olivas, investigador da  Universitat de Barcelona e versaba sobre os glaciares de Sierra Nevada.
Augusto Pérez Alberti aproveitou a conferencia para presentar o seu libro “Xeomorfoloxías das Montañas do Courel” co que se agasallou a todos os participantes. No libro, dirixido a todos os públicos, detállase o mapa xeomorfolóxico da Serra. Case metro a metro, explícase como se chegou a formar a paisaxe da que podemos gozar hoxe en día ao percorrer O Courel.  Devesas, antigos glaciares, pregamentos de centos de millóns de anos e un patrimonio cultural que agora opta a converterse en Xeoparque Mundial da Unesco.
O autor, que participou no informe presentado á Unesco no proxecto do Xeoparque Montañas do Courel, recoñece que o mapa é un traballo de moito detalle, posiblemente o máis detallado que se fixo ata agora non só no Courel, senón en toda Galicia. Non se inclúe só a xeomorfoloxía, tamén está toda a toponimia que existe na serra: os regos, os regatos ou os lugares

ALUMNOS DO IES DE QUIROGA PARTICIPAN NA RODAXE DUN SPOT PROMOCIONAL


Os alumnos e alumnas de quinto e sexto tiveron a oportunidade de participar na rodaxe dunha película de exaltación do noso concello, que se desenvolveu no museo etnográfico de Quiroga. A rodaxe da película forma parte dun taller de audiovisuais organizado dende o GDR Ribeira Sacra.

A produtora Némesis está levando a cabo esta actividade que conta co financiamento do GDR Ribeira Sacra. Os rapaces e rapazas son os encargados de facer o traballo, poñéndose diante e detrás das cámaras durante catro días de gravación.

Este taller dirixido as nenos e nenas de 12 a 16 anos dos seis concellos da comarca de Lemos ten como obxectivo achegar unha actividade lúdica e cultural coas novas tecnoloxías ata as zonas do rural e que a súa vez serva de promoción estes territorios.

A idea do proxecto é que unha vez feito o vídeo sirva de publicidade nas páxinas web de cada concello.

23 oct. 2018

ÚLTIMOS DÍAS PARA SOLUCIONAR GRATUITAMENTE AS INTERFERENCIAS DO SERVIZOS MÓBILES 4G NA TDT


           Quiroga  conta  dende o pasado mes de  maio  co  servizo 4 G de telefonía móbil. Este  servizo pode producir  afectacións  na recepción dá Televisión  Dixital Terrestre (TDT) polo que  é posible que a recepción do sinal de televisión poida verse afectada nalgúns edificios ou vivendas moi próximos ás estacións de telefonía móbil.

Esta nova tecnoloxía permite alcanzar conexións móbiles de moi alta velocidade, mellorar a cobertura no interior dos edificios e conseguir maiores niveis de penetración xeográfica, en particular ás zonas rurais. Pero, os servizos móbiles 4G  utilizan a frecuencia 800 MHz que antes utilizaba a televisión dixital terrestre (TDT), polo que podería ocorrer que o sinal de TV véxase afectada por interferencias.  Pode aparecer pixelado, bloqueo de imaxes ou perda do sinal.

Para evitar estas interferencias puxose en marcha  unha  entidade xestora que se encarga de solucionar calquera afectación que suceda na recepción da TDT motivada polas emisións da tecnoloxía 4G para asegurar a continuidade do servizo de TV. Unha actuación totalmente gratuíta para o usuario durante os primeiros seis meses tras o inicio das emisións 4G.

O 31 de outubro, finaliza definitivamente en zonas de Quiroga ese prazo para solicitar as actuacións por parte dos usuarios de TDT a través da  entidade CHEGA800, polo que as persoas que se viron afectadas soamente terán ata ese prazo para poder subsanar as interferencias de forma gratuita.

Os telespectadores que vexan a TV a través de fibra óptica, satélite ou Internet non teñen interferencias.

18 oct. 2018

O CONCELLO DE QUIROGA CONTINÚA A TRABALLAR NO AFORRO ENERXÉTICO


O Concello de Quiroga está a dar un paso máis no aforro enerxético, nesta ocasión nos edificios da Casa de Cultura e o Centro Social. Trátase da colocación dunha caldeira de biomasa, que abastecerá a estes dous edificios, os de maior consumo dos edificios municipais, e coa que o concello pretende aforrar un 65% en gasto.

A caldeira é de condensación de  pellets de 125  kw, para calefacción por biomasa e rendemento superior ao 105%. O combustible almacenarase nun depósito de 20  m3 de capacidade.

Para a instalación desta caldeira foi preciso acometer reformas no lugar no que estaba a anterior caldeira de gasoil. Estas reformas e a instalación da nova caldeira remataranse previsiblemente esta semana, como lle informaba o encargado dos traballos ao alcalde de Quiroga, Julio Álvarez, que na tarde de onte se achegaba ata os baixos da casa da cultura onde se instala a nova caldeira.

Coa caldeira de Biomasa para abastecer as necesidades térmicas dos edificios da Casa de Cultura e Centro Social o  Concello segue na liña de eficiencia e aforro enerxético iniciada no ano 2013, cando instalou paneis solares fotovoltaicos en edificios municipais (Auditorio municipal, Casa Cultura, CEIP, Pavillón Polideportivo, Gardería e estación Depuradora de auga potable e residual).

17 oct. 2018

UN EQUIPO DE FUN POLO AIRE DA TVG GRAVA EN QUIROGA


Un equipo do programa da TVG “Fun polo Aire” desprazouse na tarde de onte ata Quiroga para falar con Ósgar González, o neno que vai enviar ao hospital madrileño 12 de Octubre nove bonecos que representan aos personaxes principais da serie de debuxos animados  Pj  Masks.

Os bonecos, feitos con carton pedra e xornais, foron o agasallo que os país do neno, Tamara de la Viuda e Óscar González, lle fixeron polo seu cuarto cumpreanos. Tras disfrutar do seu agasallo, Ósgar, que coñece ben os hospitais por ser multialérxico, decidiu envíalos a un hospital no que houbese nenos ingresados.

Esta é a segunda vez que esta familia envía bonecos a un hospital madrileño, xa que o pasado ano enviara os persoaxes da Patrulla Canina. Pero antes de chegar o seu destiño, Ósgar disfrutou un día máis cos seus bonecos na gravación que fixo a TVG na praza de España.

O programa “Fun polo Aire”, emitese de luns a venres ás cinco e media da tarde. Trátase dun magazine de proximidade onde os verdadeiros protagonistas son os galegos e galegas de a pé contándolles aos espectadores todo o que sucede nas vilas da nosa comunidade. O programa gravado onte aínda non ten data fixada para a súa emisión, pero será nuns días.


16 oct. 2018

ITV PARA AS MÁQUINAS SULFATADORAS


A Unidade Móbil de Inspección Técnica de Máquinas de Fitosanitarios  desprazarase ata Quiroga para realizar a ITV a todas as máquinas sulfatadoras que o precisen.
        O día para realizar a inspección será este venres 19 de outubro, de nove a unha pola mañá ou de tres a oito pola tarde e terá lugar nos talleres Rofer de Quiroga. A reserva poderase facer chamando ao teléfono 982 42 86 53.
Desde o ano 2016, as  sulfatadoras están obrigadas a pasar a súa propia ITV. Non cumprir a normativa ambiental europea leva sancións: os equipos que traballen con produtos  fitosaniarios sen superar a inspección técnica enfróntanse a multas de entre 300 a 3.000 euros.
O exhaustivo exame afecta a máquinas de máis de 100 litros de capacidade e que superen os cinco anos de antigüidade. Quedan excluídos da revisión os equipos fitosanitarios que son  pulverizadores de mochila e os de arrastre manual (mochilas) con depósito de ata 100 litros.
No caso dos equipos novos, a inspección deberá realizarse no primeiros cinco anos tras a súa compra. Unha vez feita a primeira ITV fitosanitaria, pasaranse cada cinco anos; fóra dos que prestan servizos a terceiros que deberán facerse cada tres anos. A partir do ano 2020, a periodicidade dos controis acúrtase e terán que repetirse cada tres anos.
        Os requisitos principais da inspección son presentar a cartilla do Rexistro Oficial de Maquinaria Agrícola (ROMA), manter o número de bastidor visible e ter o equipo limpo, tanto por dentro como por fóra, e sen fugas en circuítos, bombas e depósitos.
Pasar este exame, supón a entrega dun adhesivo oficial da Xunta, parecido ao dos vehículos cando pasan a ITV, ademais do certificado correspondente de inspección.

15 oct. 2018

NOVO PREMIO PARA A SUMILLER QUIROGUESA MÓNICA FERNÁNDEZ


A sumiller quiroguesa Mónica Fernández, foi galardoada co  Premio á Mellor Dirección de Sala 2018 polo xurado da III edición dos Premios de Gastronomía da Comunidade de Madrid. Estes premios, creados pola Academia Madrileña de Gastronomía en colaboración coa Comunidad de Madrid, recoñecen aos profesionais e empresas que realizaron un maior esforzo por potenciar a gastronomía na capital española.
A traxectoria profesional de Mónica Fernández , nada en Quiroga, e catadora e  Maître titulada pola Cámara de Comercio de Madrid, estivo ligada a Grupo Bambú desde a apertura do seu primeiro restaurante, no ano 2005. Durante estes trece anos, converteuse nunha das persoas craves na organización do grupo. Na actualidade é directora de grupo, directora de sala e catadora dos sete restaurantes do Grupo Bambú.
Entre as súas funcións atópanse a formación e supervisión dos equipos de sala de todos os locais, así como o deseño das cartas de viño. Ademais, como destacada catadora, Mónica participa habitualmente en acontecementos relacionados co mundo do viño e forma parte do comité de cata da coñecida Guía de Viños Gourmets.
Ao longo da súa carreira profesional, Mónica Fernández obtivo diferentes galardóns, entre os que destaca o  Premio ao Sumiller da Academia Internacional de Gastronomía 2017, o  Premio Nacional de Gastronomía 2015 ao Mellor Director Sala, e o Premio á “Excelencia Turística de Madrid”, outorgado no ano 2009 pola Cámara de Comercio de Madrid.
Como recoñecemento a esta traxectoria profesional, Mónica Fernández foi nomeada “Filla predilecta de Quiroga”, o pasado ano.

14 oct. 2018

A GARDA CIVIL CELEBROU A SÚA FESTIVIDADE


A Garda Civil de Quiroga acolleu o venres os actos de celebración da súa patrona, a Virxe do Pilar.
O acto central foi a celebración dunha misa na igrexa parroquial de San Martiño de Quiroga oficiada polo Vicario de Pastoral de Lugo, Luis Manuel Rodríguez Pérez. A igrexa parroquial estaba presidida por unha engalanada imaxe da Virxe do Pilar e pola bandeira de España.
O cuartel de Quiroga celebra cada 12 de outubro, ao igual que todos os acuartelamentos de España dende o ano 1913, a súa gran festa.
No ano 1864, nomeouse patrona do Colegio de Guardias Jóvenes á Virxe do Pilar. Co tempo, os guardas procedentes do Colexio foron extendendo a devoción á Pilarica por toda a xeografía nacional. Esta circunstancia foi determinante para que o Rei Alfonso XIII asinara a proclamación da Virxe como Patrona da Garda Civil 1913.
Os membros da Benemérita de Quiroga ataviados co seu uniforme de gala achegáronse ata a igrexa parroquial onde estaban convidados autoridades, familiares e amigos para acompañalos nesta celebración como marca unha Orden Xeral da Garda Civil daquel ano. A orde indicaba cómo se debía celebrar a primera festa da Patrona. Entre outras disposicións decía que “en todos os postos vestiríase de gala, izándose a bandeira nas casas-cuartel”. A elo sumábase a celebración relixiosa, á que se invitaría ás autoridades e demais corpos do Exército, para oficiar unha misa polos compañeiros do Corpo falecidos. Estas disposicións seguen manténdose na actualidade.
Á saída dos actos relixiosos todos os convidados se achegaron ata os gardas para felicitalos no seu día e acompañalos posteriormente a degustación dun viño español. No que non faltaron os “Vivas” a España e á Garda Civil.

11 oct. 2018

A SELECCIÓN GALEGA DE VOLEIBOL CONCENTRARASE EN QUIROGA


O Concello de Quiroga asinou esta mañá un convenio de colaboración coa Federación Galega de Voleibol para a celebración das actividades de tecnificación e supervisión e control que realiza a Federación se leven a cabo en Quiroga.

A firma levouse a cabo esta mañá no salón de plenos da casa consistorial onde se realizou unha posterior rolda de prensa, na que estiveron presentes o alcalde de Quiroga, Julio Álvarez, o presidente da Federación Galega de Voleibol, José Angel Luna Bargo e o concelleiro de Deportes, Andrés Novoa.

O concelleiro de deportes afirmou que os obxetivos deste convenio de colaboración que surxiu fai seis meses, son primeiramente a promoción turística do noso municipio e segundo a promoción deste deporte. En Quiroga actualmente unha vintena de rapazas participan nesta actividade deportiva que se engloba dentro das Escolas Deportivas Municipais e que conta xa coa colaboración do club Ribeira Sacra.
Este convenio terá unha vixencia de dous anos, período no que se farán xornadas de tecnificación de voleibol, tanto na categoría infantil como na de cadete. Durante o ano realizaranse catro xornadas dun único día de duración, no que xogadores e entrenadores, en torno a 70 persoas, desprazaranse ata Quiroga para realizar actividades para ver posibles xogadores para a selección.
A maiores durante o Entroido e a Semana Santa faranse concentracións de dous días, con pernocta en Quiroga, nas que os xogadores seleccionados realizarán a preparación dos campionatos de España.
Segundo palabras do presidente da Federación Galega de Voleibol, ademais de centrar o plan de tecnificación da Federación en Quiroga tamén se disputarán os encontros coas selección portuguesas. A Federación Galega ten un convenio coa Federación do Norte de Portugal polo que se realiza un “bilateral”, no que as seleccións galegas xogan en Braga e posteriormente as seleccións portuguesas xogan en Galicia. Tras o convenio asinado co noso concello, estes encontros disputaranse en Quiroga.
A Federación Galega destaca a importancia deste tipo de colaboración xa que lle permitirá facer máis actividade e traballar con máis rapaces.
É destacable a importancia que ten este deporte na nosa zona, xa que de aquí sairon xogadoras tan importantes como Jenifer Mendoza e actualmente Carolina Camino e Sofía Carballedo.

20 sept. 2018

A ÁREA DE EDUCACIÓN PON DE NOVO EN MARCHA A LUDOTECA DE INVERNO


A área de Educación e Infancia do Concello de Quiroga vai poñer en marcha un anao máis a ludoteca de inverno dirixida a nenos e nenas de 3 a 12 anos de idade. Esta prolongarase ata o mes de xuño do 2019, coincidindo co remate do curso escolar, desenvolvéndose todos os martes e xoves das cinco ás oito do serán.

Todo aquel que desexe participar deberá formalizar as inscricións na Casa da Cultura, ben persoalmente ou ben a través do teléfono 982 43 51 25.

A ludoteca abrirá as súas portas o vindeiro martes día 2 de outubro.


O CENTRO SOCIAL OFERTA UN VARIADO PROGRAMA DE ACTIVIDADES LÚDICO-FORMATIVAS PARA O DERRADEIRO TRIMESTRE DO ANO


A dirección do Centro Social de Quiroga retoma tras a época estival o seu programa de actividades lúdico-formativas previstas para o derradeiro trimestre do ano.

Por unha banda, retómanse as que xa estaban en curso como é o obradoiro de actividades físicas para persoas maiores, ximnasia de mantemento, estiramentos e relaxación. Esta actividade terá lugar os martes e os xoves de cinco a seis da tarde no salón multiusos. Outra das actividades en marcha é o obradoiro de manualidades que terá lugar todos os luns de cinco e media a seis e media da tarde. Do mesmo xeito continua o taller de memoria os martes de catro a seis da tarde así como o curso de estimulación cognitiva durante os luns e os xoves no horario de dez e media a unha e media da mañá.

Por outra banda, estréanse as seguintes actividades durante os meses de outubro, novembro e decembro. Así o xoves 4 de outubro realizarase unha xornada de animación e convivencia social coa celebración do Día Internacional das Persoas Maiores que contará cunha invitación a chocolate con churros a partir das cinco da tarde na cafetería do centro e, de seguido, os asistentes rematarán a xornada cun animado baile. O venres cinco de outubro terá lugar a primeira viaxe do trimestre onde os socios e socias poderán asistir ás festas do San Froilán incluíndo unha visita ao Museo Diocesano e xantar nun restaurante da zona.

O día 18 de novembro celebrarase un magosto popular a partir das seis da tarde con invitación a todos os socios e socias onde se poderá degustar castañas asadas acompañadas de viño novo. A xornada poñerá punto e final cun baile.

No mes de decembro realizarase un campionato de tute os días tres e catro de decembro con iscrición gratuíta. O día 14 poderase asistir a un bingo de nadal a partir das cinco da tarde e xa o día 20, ás sete da tarde, terá lugar unha das acitivades máis concurridas, a tradicional cea de nadal onde se fará a entrega dos premios aos gañadores ou gañadoras dos bingos e campeonato de tute.

Todo aquel que desexe anotarse ou recibir máis información sobre estas actividades pode achegarse á cafetería do centro.


CONTINUAN EN MARCHA AS CLASES DE MÚSICA


Continuan  en  marcha todos os  martes    as clases  de  música e movemento, guitarra, piano e instrumentos de vento metal  ofertadas  polas  áreas de  Educación  e  Xuventude do Concello de Quiroga.

Os horarios nos que se desenvolverán estas  clases serán os martes de 18.30 h. a 19.30 h. para nenos e nenas así mesmo, no caso do  alumnado de guitarra nivel 1 o  horario de 19.30 h. ata as 20.30 h. mentres que os alumnos e alumnas de guitarra nivel  2 acudirá ás aulas en horario de 20.30 h. a 21.30 h.

Todas as persoas que estean interesadas nesta actividade poden chamar ao teléfono 982 435 125 tanto para inscribirse como para recibir máis información. Unha vez máis o profesor Antonio García Lago será o encargado de impartir estas clases.


A VOLTA CICLISTA A GALICIA PASARÁ POR QUIROGA


A Federación Galega de Ciclismo está a ultimar os preparativos para a realización da Volta Ciclista a Galicia 2018.
Quiroga tamén terá protagonismo na gran rolda galega. A rúa Real quiroguesa acollerá a meta volante da cuarta etapa, con saída e chegada en Monforte de Lemos, que terá lugar o vindeiro domingo 23 de setembro. Está previsto que o pelotón chegue a Quiroga pasadas as 12.00 h. con preto de 100 km. nas pernas.
O presidente da Federación Galega de Ciclismo, Juan Carlos Muñiz, trasladou a importancia de difundir un evento como a Volta que ano tras ano logrou gañar á afección galega que segue as evolucións do pelotón elite e sub 23 participantes na proba, a auténtica antesala do ciclismo profesional.
A Volta Ciclista a Galicia alcanza con esta a súa edición número 17 desde que adquiriu o formato amateur. Este ano contará con dezanove equipos que disputarán catro etapas entre os días 20 e 24 de setembro. Verín acollerá a espectacular contrareloxo por equipos inicial mentres que Sanxenxo, Boiro e Monforte de Lemos completarán o calendario de competición da carreira.

20 ago. 2018

O 1 DE SETEMBRO TERÁ LUGAR O XX ENCONTRO DE POETAS NO VAL DE QUIROGA


O Concello de Quiroga organiza o XX Encontro de Poetas no Val de Quiroga que terá lugar o 1 de setembro na Casa de Cultura de Quiroga.

O encontro contará cun recital poético, actuacións musicais e entrega de medallas aos participantes; desenvolverase a partir das sete e media da tarde no salón de actos Anxel Fole da Casa de Cultura.

As persoas interesadas en participar neste recital poden anotarse na Casa de Cultura ata o día 30 de agosto, ben persoalmente ou no teléfono 982.43.51.25.

17 ago. 2018

O PÁRROCO JESÚS RÍO RAMILO PRESENTA A SEGUNDA EDICIÓN DO LIBRO "TIERRAS DE QUIROGA.NOTAS PARA LA HISTORIA DE LA COMARCA"


A  Igrexa  Parroquial  de Santa  María  da  Ermida, acollerá o sábado 25 de agosto, a partir das oito do serán,  a presentación da segunda edición do libro
 “ Tierras de Quiroga. Notas para la historia de la Comarca” de Jesús Río Ramilo.

A obra recolle un estudo da comarca que inclue os municipios de Folgoso de Caurel, Ribas de Sil e Quiroga. Neste tomo o autor, o párroco Jesús Río, fai un percorrido polas súas xentes e os productos da comarca.

A obra iniciase cunha  análise  da evolución da poboación dende a Idade Media ata a actualidade e continúa cun estudo da produción agrícola e gandeira. Neste punto fai fincapé nos productos da zona, como o viño e o aceite. Así como doutros máis exóticos como a seda. Tamén se abordan as feiras nas que estes artículos se adquirían.

O autor tamén  repasa os ríos e as montañas como fonte de recursos de pesca e hidroeléctrica. Fálase ademais dos minerais como o ferro, a lousa e metais preciosos como o ouro e a prata.

16 ago. 2018

O VINDEIRO 20 DE AGOSTO ORGANIZASE UNHA XORNADA DE DIFUSIÓN DO PATRIMONIO XEOLÓXICO E DO PATRIMONIO GASTRONÓMICO DENTRO DO PROXECTO XEOPARQUE MUNDIAL DA UNESCO MONTAÑAS DO COUREL


Dentro do Proxecto do Xeoparque Mundial da Unesco Montañas do Courel, organízase unha xornada de difusión do patrimonio xeolóxico e gastronómico que terá lugar o vindeiro luns día 20 de agosto na Casa de Cultura de Quiroga.

O acto comezará a partir das oito do serán coa intervención de Enrique Díaz Martínez, quen falará de que é, para que serve e onde atopar o patrimonio xeolóxico. Deseguido será o investigador Daniel Ballesteros quen tratará As rochas das Montañas do Courel, os nosos recursos máis sólidos.

As nove e media terá lugar a presentación do libro Las Montañas de o Courel: una geología muy humana. A xornada rematará cunha cata de viños xeolóxica.


Todo aquel que desexe  participar nesta xornada pode  anotarse canto antes, xa que o límite de prazas está pechado a 50 persoas. As inscricións poderanse facer no correo grupogdr8@yahoo.es ou tamén no número de WhatsApp 609 81 49 25.




OS VECIÑOS DE MARGARIDE CELEBRAN A SÚA VIII FESTA DO OURO


 Margaride do Lor celebra a súa VIII Festa do Ouro que organiza a Asociación de veciñ@s de Margaride.

 Os actos comezarán ás 12 cunha visita ás adegas romanas, ás dúas  haberá unha misa en latín que dará paso ao xantar no campamento castrexo-romano, cun menú composto por polbo e máis churrasco.

 Xa pola tarde haberá xogos infantís e ás 19h a festa contará coa presenza de José Epinosa, presidente de AMIAQUIGAL e profesor titular de Bioloxía e Xeoloxía que ofrecerá unha conferencia sobre a Traxectoria e evolución da olivicultura en Quiroga.

 Para pechar o programa haberá festa, unha cea no campamento ás 22h e verbena a medianoite; ás once da noite  realizaranse rituais celtas como o da boa sorte, sacrificio humano, ruta seguindo as estrelas, queimada e voda e bautizo.

QUIROGA ACOLLE ESTE SÁBADO O V QUI-ROMA, ¡¡¡ VOLTA O ESPECTÁCULO!!!



Quiroga acollerá mañá  sábado 18 de agosto a V Festa Castrexo Romana, o Qui-Roma.
       
  Este ano contarase de novo coa  "II Ruta de Cabalos Qui-roma", organizada polos Cabaleiros do Val, que comezará ás dez da mañá. Ás once abrirase o mercado Qui-romano. A partir das once e media comezarán os desfiles a cargo da Garda romana  Lucus  Equites e dos castrexos Wyrdamur  pola rúa Real. As doce en punto do mediodía dará comezo unha alborada a cargo dos gaiteiros romanos Os Palletas na Praza Maior.

      Como todos os anos haberá   paseos en burro para os nenos e nenas  ao  longo de toda a mañá e tamén se contará con demostracións artesanais en coiro.

     Pola  tarde haberá escola de gladiadores para os máis pequenos con loitas e xogos tantos infantís como para adultos.

Sobre as seis dará comezo unha gran batucada a cargo de XITUME de Xinzo de Limia que animarán o V Qui-Roma.

As oito e media está previsto o desfile Quiromano a cargo de ARDE LOUCOS ao longo de toda a rúa Real e o seu remate a loita de gladiadores. E tras a cea-castrexo-romana, sobre as once e media dará comezo un espectáculo nocturno a cargo de Wyrdamur chegados dende Murcia. Unha vez que rematen comezará a festa animada pola Disco-móvil FABRIK.