31 mar. 2016

ABERTO O PRAZO PARA PARTICIPAR NA XVI MOSTRA DO ACEITE

O Concello de Quiroga abriu o prazo para os colleiteiros interesados en particiar na  XVI Mostra do Aceite de Quiroga que se celebrará o vindeiro día 8 de maio. Os interesados terán ata o luns 4 de abril para realizar a inscripción na casa consistorial. 
As condicións para poder participar, tendo en conta, que o número de colleiteiros será limitado a 6, son as seguintes:
-Ter unha colleita mínima de 200 litros de aceite.
-Aboar 100 € de inscrición, ou ben facilitar a cantidade equivalente en aceite.
-A Comisión Organizadora recollerá mostras ao azar para a súa cata  o mesmo día da Mostra.
A selección dos participantes farase tendo en conta un rigoroso orde de inscrición nas oficinas municipais por rexistro de entrada; ademais dun resultado aceptable do análise químico e organoléptico que determinará o laboratorio especializado que se dispoña.
No momento de formalizar a inscrición nas oficinas xerais da Casa do Concello é obrigatorio presentar na Casa da Cultura unha mostra de 1 litro  en envase de cristal para o análise correspondente.

A TABERNA, GAÑADORA DA 5ª EDICIÓN DO QUIROGA DE TAPAS

     Na mañá de onte abrironse as urnas nas que estaban depositados os tapacartóns que participaron na 5ª edición do Concurso "Quiroga  de Tapas".  Unha vez feito o reconto o establecemento gañador desta edición foi A Taberna.

          A delegada da zona sur da Asociación de Hostelería da provincia de Lugo, Beatriz Vila, xunto coa concelleira de xuventude, Rosa Arza, os dous departamentos organizadores do certamen, foron as encargadas de abrir as urnas.
      
      Non se contabilizou como válida ningunha cartilla de votación que non contivese selo de todos os establecementos participantes, o seu voto, escrito de forma lixible e un nome, apelidos e teléfono de contacto da persoa que emitía o voto.
     
      Tras o reconto de votos a tapa elaborada polo bar A Taberna foi a que recibíu o maior número de votos, entre os 20 establecementos que competían nesta edición. 100 € en metálico e unha placa conmemorativa foi o agasallo que recibiu.

Nesta edición tamén houbo numerosos premios para as persoas que completaron o circuito e emitiron o seu voto á mellor tapa entre todas as participantes. 18 foron as persoas que resultaron gañadoras no sorteo dos premios, que ían dende premios en metálico, estancias en diversos aloxamentos da zona, ceas para duas persoas ou lotes de productos típicos.

25 mar. 2016

XXXIV FEIRA DO VIÑO DE QUIROGA

     Quiroga comeza a súa Feira do Viño mañá sábado pola mañá cun Encotro Infantil e Certame Celtibérico de Bandas de Gaitas, que terá continuidade nos concellos de  Manzaneda e Ribadavia.
      En total, actuarán cerca de cincocentos músicos, que comenzarán ás once e media da mañá, cun desfile conxunto que partirá dende a Casa da Cultura ata a praza España, onde se desenvolverá o certame, se as condicións meteorolóxicas o permiten. En caso de non ser así, o certame desenvolverase no Auditorio Municipal.
   O certame constará de duas partes, unha participativa para aquelas formacións máis novas e outra competitiva para as bandas xuvenís.
      Os organizadores pretenden que a convocatoria teña continuidade no tempo e que axude a reforzar o atractivo dos tres festexos aos que se asocia.
   O Certame Celtibérico de Bandas de Gaitas de Quiroga rematará coa actuación do gaiterio pontevedrés, Óscar Ibáñez.
    Outra das novidades deste ano será a inauguración da feira, que xa terá lugar ás doce e media do mediodía, non pola tarde como se facía ata o de agora. O encargado de inaugurar a feira desta edición será o Conselleiro de Cultura, Educación e Ordenación Universitaria, Roman Rodríguez González.
      Durante toda a tarde non faltará novaente a música no recinto feiral. A partir das cinco, a banda de Gaitas San Martiño e o grupo Os Palletas, actuarán no recinto. A partir das seis e media as actividades trasladaranse ata o Auditorio Municipal, onde actuará a Coral Polifónica de Quiroga, a Banda de gaitas San Martiño e os grupos de danzas San Martiño e Arume da Queiruga. Tamén se fará entrega  dos premios do certame Cartas de Amor Vila de Quiroga.
      Ás oito e media, no palco terá lugar o pregón a cargo de Kiko Hernández, colaborador do programa Sálvame de Telecinco, que estará presentado polo xornalista e escritor José Luís Blanco Campaña. Ao remate do pregón o propio pregoeiro decidirá quen é o gañador do VI concurso de camisetas.
      O grupo Atenas será o encargado de pechar a festa e a verbena. O domingo a música virá da man do grupo Os do Recanto pola mañá, e pola tarde da Charanga Mecánica.
     A unha menos cuarto do mediodía, nas instalacións do Museo Etnográfico entregaránselle as medallas aos doce colleiteiros participantes na XXXIV Feira do Viño de Quiroga, que son:
  
 Héctor Enríquez Santiso, de Pacios de Mondelo.
          Antonio García Álvarez, de San Xulián de Abaixo.
          Antonio Castro Álvarez, de San Vitoiro.
          Álvaro Rodríguez González, da Toca.
          Gaspar Álvarez Nogueira, das Medas.
          Elías González Mourelo, de Carballo de Hospital.
          Juan Rodríguez Diéguez, de Centeais.
          Antonio Vázquez López, de San Xulián de Abaixo.
          María Oliva Cao, de Bendollo.
          José Luis Rodríguez Lago, de San Xulián de Abaixo.
          Alfonso Nuñez Calvo, dos Novaes.
          Ceferino González Vidal, de Bendilló
  
     Durante as duas xornadas non faltará o viño destes colleiteiros que decidiron manter o prezo como en anos anteriores, así o vaso venderase a 1 €, 5 € a botella de viño e a 12 € o estuche de tres botellas.

24 mar. 2016

450 INSCRITOS NA XII CARREIRA POPULAR FEIRA DO VIÑO

O departamento de deportes do concello organizou un ano máis a Carreira Popular Feira do Viño. A décima segunda edición da carreira que terá lugar mañá venres xa con 450 participantes inscritos.

      Ás catro e cuarto comenzará a carreira na categoría de pitufos, cun recorrido de 100 metros (ata aproximadamente o cruce coa avenida do Caurel). Cinco minutos máis tarde sairán os prebenxamíns e os benxamíns, cun percorrido de 500 metros, é decir unha volta ata a Praza de España. A continuación participará a categoría Alevín cun recorrido de 1.000 metros – 1 volta ata o bar Zorro. E finalmente farano os da categoría Infantil e Cadete, cun recorrido de 2.000 metros, ata as piscinas municipais e volta á meta. Os corredores que participan nestas categorias contan coa posibilidade de inscribirse aínda o mesmo día da proba diante da Casa do Concello.

      Ás cinco da tarde comenzará a Proba Absoluta, cun percorrido de 9.000 metros; e que comprende as categorías xuvenil, senior e veteranos; masculino e feminino. O percorrido consta de dúas partes. Na primeira, os corredores sairán de diante da Casa do Concello para ir ata a zona das piscinas para regresar ó lugar de partida. Neste punto comeza a segunda parte, na que os participantes terán que completar 2 voltas por un tramo do paseo fluvial.

       Este ano a proba de adultos estará novamente controlada a través dun CHIP que se entregará a cada corredor no momento da recollida do dorsal e que se colocará na zapatilla antes da saída da proba.

 Haberá trofeos e medallas para os tres primeiros de cada categoría tanto masculino como feminino, e os tres primeiros locais.

23 mar. 2016

UNHA QUIROGUESA DE 104 ANOS

Unha veciña de Quiroga está hoxe de aniversario. Cumpre nada máis e nada menos que 104 anos.
Obdulia Mourelo Alvarez, naceu o 23 de marzo do 1912. Dos seus seis fillos, actualmente viven tres, ten dez netos e dez bisnetos. Xa viuva ingresou na Residencia de Quiroga  no ano 2.000.
Nesta institución foi onde hoxe celebraron esta data tan sinalada. Obdulia soprou as velas da torta acompañada de familiares, traballadores e residentes. Na celebración non faltou o champán nin a música para os que aínda se atreveron co baile.

A sra Obdulia, ainda que un pouco cansada, disfrutou esta mañá da festa organizada na súa honra e amosouse contenta de chegar a unha idade tan avanzada.

22 mar. 2016

UN CERTAME DE BANDAS DE GAITAS ABRIRÁ A FEIRA DO VIÑO DE QUIROGA

       Quiroga comezará a súa Feira do Viño o sábado pola mañá cun Certame Celtibérico de Bandas de Gaitas, que terá continuidade nos concellos de Manzaneda e Ribadavia. Estes tres concellos, en colaboración coa Escola Provincial de Gaitas da Deputación de Ourense son os que organizan o certame.
      Onte pola mediodía presentouse este certame. Á presentación acuidu o alcalde de Quiroga, Julio Alvarez e o alcalde de Manzaneda, David Rodríguez. No certame tomarán parte dezaseis formacións de Quiroga, Monforte, Chantada, Lugo, Ourense, Vilariño de Conso, Verín, Xinzo, Bande, A Estrada e Ponferrada. En total, actuarán cerca de cincocentos músicos, que comenzarán cun desfile conxunto que partirá dende a Casa da Cultura ata a praza España, onde se desenvolverá o certame, se as condicións meteorolóxicas o permiten. En caso de non ser así, o certame trasladaríase ata o Auditorio Municipal.
    José Luís Foxo, presidente da Real Banda de Gaitas de Ourense, e organizador do certame destacou as duas partes coas que conta o certame, unha participativa para aquelas formacións máis novas e outra competitiva para as bandas xuveniles; xa que está orientado fundamentalmente a estudantes de gaita en idades infantiles e xuveniles.
       Un equipo de profesionais do ensino da gaita ou percusión ofrecerán por escrito informes instructivos enfocados á educación e comportamentos estéticos, tendo en conta o respeto ao público e a disciplina do saber estar.
       Os organizadores pretenden que a convocatoria teña continuidade no tempo e que axude a reforzar o atractivo dos tres festexos aos que se asocia, que son as feiras do viño de Quiroga e Ribadavia e no Certame de Gaitas de Manzaneda.
          O acto de presentación rematou coa actuación de Óscar Ibáñez, gaiteiro que será tamén o encargado de rematar o Certame Celtibérico de Bandas de Gaitas de Quiroga.

18 mar. 2016

KIKO HERNÁNDEZ PREGOEIRO DA FEIRA DO VIÑO

Kiko Hernández será o Pregoeiro da XXXIV Edición da Feira do Viño de Quiroga.
         Francisco Hernández Ruíz naceu en Madrid o 26 de Agosto de 1976. Menor de dous irmáns, cun marcado carácter familiar. Comezou a traballar desde moi temperá idade, e a súa personalidade inquieta e emprendedora propiciou que aos seus 39 anos posúa unha extensa experiencia laboral en diversos proxectos empresariais.
          O 4 de Abril do 2002 Kiko Hernández deu o seu primeiro salto ao mundo da televisión embarcándose nunha aventura que cambiaría radicalmente a súa vida, a súa participación na terceira edición do reality Gran Irmán durante 101 días, en que o quedou como terceiro finalista do concurso.
Tras a súa saída da casa máis famosa de Guadalix de la Sierra, a súa carreira televisiva comezou de maneira inmediata, converténdose nun colaborador indispensable dos programas de televisión de máxima audiencia da grella de Telecinco.
Atrevido, irónico, divertido, sincero, intelixente, polémico, cunha carismática faceta cómica e un sentido do espectáculo sublime. Estas son algunhas das características que fixeron que Kiko Hernández converteuse nun auténtico showman televisivo, un profesional camaleónico cunha traxectoria imparable desde hai xa 11 anos.
      Kiko Hernández é sen dúbida unha cara moi coñecida xa que participou como colaborador en infinidade de programas como El Debate de Gran Hermano, Crónicas Marcianas, A Tu Lado, El Ventilador, El programa de AR, La Noria, Sálvame Golfo, Mira Quién Mira e tamén Sálvame Diario e Sálvame Deluxe.

17 mar. 2016

HOXE COMEZA O CONCURSO DE TAPAS

         Hoxe comeza a 5ª edición do Concurso "Quiroga  de Tapas". A corporación municipal acompañada pola delegada da zona sur da Asociación de Hostelería da provincia de Lugo, Beatriz Vila, abriran hoxe ás sete da tarde no restaurante Dimar, o concurso que se prolongará ata o vindeiro venres 25 de marzo.

As tapas coas que compiten os vinte establecementos participantes son:
Adega de María: As cousas da miña terra.
Palmeras: tabulé
Portón: callos con fabas de Lourenzá.
Raposo: hamburguesa rústica de Quiroga.
Quiper: strogonoff da Eva, tudo junto e mesturado.
A Taberna: Tapa A Taberna.
Ruxe: paneta
         Lago: champiñons recheos, soia e tomates cherry
Félix: mata fame arrollao
      O Roxo Vivo: ensalada de salmón marinado e aguacate con vinagreta de lima.
Casa Torres: escalopines de tenreira en salsa crema, champiñóns, tallarines e verde
      ChapaKuña 3: croquetas de lagostino e xamón ibérico con ensalada de queixo, froitos secos e mel de Quiroga.
O Recuncho de Dino: pasteliño de verduras con salsa de piquillos.
Dimar: roliño recheo de langostinos e grelos con crocante de millo, crema de Arzúa e milfollas de pataca ó forno con aceite de do Val de Quiroga.
Ferreiriño: niño de cogomelos
Escaleira: galician people
         A Barca: montaña de pataca ao queixo.
Vinoteca Quiroga: tosta do mar
         Mesón da Clara: carne mechada ao whisky
Dakar: medallón de solombo ás dúas salsas

   O Concello distribuiu nos locais participantes cartillas de votación “tapacartóns”, a disposición gratuíta do público consumidor, que será quen determine o gañador do concurso. Ademáis, en todos os establecementos participantes, estarán situadas as urnas oficiais de votación.
                
      A tapa presentada ó concurso, deberá estar exposta de forma destacada, así como a disposición do público consumidor, a un precio de venda ó público de 1,50 €.
                    
   Cada vez que un cliente deguste a tapa presentada a concurso, o establecemento participante deberá selarlle, si non o fixera aínda, a cartilla de votación, na casilla correspondente ao seu establecemento, si xa estivera cuberto o tapacartón, o local ten a obriga de darlle outro. Se o establecemento non dispón da tapa no horario do concurso, está obrigado a selar o tapacartón na casilla correspondente e poderá ser penalizado.
       
     Cando o cliente complete a degustación de todas as tapas presentadas a concurso en todos os establecementos participantes, poderá votar a súa tapa favorita utilizando o tapacartón e introducindo o mesmo nas urnas oficiais do concurso, ubicadas en todos os establecementos participantes.
       
      Non será válida ningunha cartilla de votación que non conteña selo de todos os establecementos participantes, o seu voto, escrito de forma lixible e un nome, apelidos e teléfono de contacto da persoa que emita o voto.
       
      O cliente poderá ter en conta, á hora de emitir o seu voto, Presentación e innovación, gusto, sabor, texturas e aromas e calidade dos ingredientes.
     
Na presente edición hai numerosos premios para as persoas que completen o circuito e emitan o seu voto á mellor tapa entre todas as participantes. Así poden optar a un premio de  300,00€ en metálico; un circuito termal, con estancia, almorzo e comida no Balneario de Augas Santas(Pantón) para dúas persoas; unha estancia e almorzo para dúas persoas na Hospedería Ferrería de Quintá; unha estancia para dúas persoas na Aldea Rural “O Busto” (Pobra de Brollón); unha noite para dúas persoas no Hotel Conde de Lemos (Monforte); varias comidas ou ceas para dúas persoas en diversos establecementos; unha visita ás instalacións e degustación de Viño para catro persoas no Centro doViño Ribeira Sacra; ou un lote de productos  típicos de Caurelor, Lar de Ricobao, Porvide e Morriña.
         
    Pola súa banda o local gañador da mellor tapa da presente edición recibirá100 € e unha praca conmemorativa.


16 mar. 2016

O CONCELLO DE QUIROGA TEN NOVA PÁXINA WEB

         O Concello de Quiroga en colaboración coa Axencia de Turismo de Galicia da Consellería de Presidencia da Xunta de Galicia levou a cabo o proxecto denominado "Plan integral de ordenación dos sendeiros do Concello de Quiroga". No marco desta actuación, que comprendía a creación dunha web para ofrecer a máxima información posible sobre os distintos itinerarios de sendeirismo do Concello de Quiroga, aproveitouse para darlle un novo enfoque e aspecto a toda a web oficial do Concello de Quiroga manténdose no seu dominio tradicional http://www.concellodequiroga.com
      Os contidos que se ofrecen están a partir de agora a disposición dos usuarios dun xeito cómodo e sinxelo, aproveitando todas as ferramentas que ofrece a web na actualidade para facelo todo máis preciso e ameno.
     A portada de benvida ofrece un acceso inmediato a todos os contidos organizados en distintos bloques. O centro da páxina de inicio aparecerá sempre ocupado por un bloque de tres noticias que se irán renovando a medida que actualidade as xere. Nesta primeira páxina: información sobre os museos xeolóxico, etnográfico e sendeiros. Un acceso directo o apartado destinado as actividades organizadas polos distintos departamento do Concello  e unha galería de fotos organizada por temáticas. Tendo en conta as novas tendencias de funcionamento da rede, dende a páxina principal, tamén se accede aos perfiles nas redes sociais que mantén activos dende o Concello, así pode accederse facilmente a facebook, twitter e wikiloc.
         No seu interior, ao que se accede dende  as iconas da páxina principal ou dende a barra de menú:
        -Acceso directo coa sede electrónica do Concello de Quiroga, dende onde xa se poden realizar máis dunha vintena de trámites para particulares e empresas; online si se dispón de certificado dixital o DNI electrónico, ou dirixindo os formularios vía correo electrónico.
       -O apartado relacionado coas rutas e sendeiros é un dos puntos destacados da nova web. Dende a páxina principal pode accederse ao perfil de wikiloc do Concello de Quiroga. Ademais dende a propia web tamén se pode descargar a guía de sendeiros completa, a información sobre un sendeiro determinado, así como o track para calquera dispositivo móbil ou fixo de calquera dos itinerarios que ofrece o Concello de Quiroga.
         -Con información precisa e todo tipo de datos para a súa fácil localización, destácanse 13 puntos de interese no territorio de Quiroga. A partir dun mapa que pode consultarse en calquera dispositivo móbil o visitante poderá acceder a calquera destes punto sen ningunha dificultade. Aquí aparecen os recursos tradicionais como o túnel romano de Montefurado ou o Castelo dos Novaes, pero tamén outro puntos de interese que se foron incorporando á oferta turística, como os museos de Quiroga.
      -Ademais dos 13 puntos de interese inicialmente destacados na web, tamén se pode ter a mesma información para acceder aos puntos da rede de miradoiros do Concello de Quiroga.
     -Para facilitar o acceso dende calquera punto da xeografía mundial a calquera punto do Concello de Quiroga, está a disposición dos visitantes unha das ferramentas máis empregadas da rede:  google maps.
      -No apartado servizos, calquera que o necesite dispón de datos básicos sobre todos os servizos que se poden atopar no Concello de Quiroga, ademais de restaurantes, aloxamentos, bares, locais de ocio etc.
      -Sempre e, de xeito cómodo, un acceso directo para contactar directamente co Concello de Quiroga vía correo electrónico.
       A nova páxina web do Concello de Quiroga está aínda en construción nos seus distintos apartados. Preténdese que estes apartados melloren e se incorporen outros novos atendendo as necesidades dos usuarios.
    Mención especial, en canto o período de construción, merece a Sede Electrónica do Concello de Quiroga, que por atoparse  en probas non ofrece aínda toda a información e servizo que se pretende que ofreza nun futuro inmediato.
        Recoméndase aos usuarios refrescar os seus navegadores e incluso borrar os historiais de navegación, tanto nos dispositivos fixos como nos dispositivos móbiles, para non ter problemas durante a navegación nos novos contidos.

13 mar. 2016

O GRUPO MUNICIPAL DE EMERXENCIAS CONTA CUN NOVO VEHÍCULO ANTIINCENDIOS

O Grupo Municipal de Emerxencias conta cun novo vehículo para facilitarlles o seu traballo nas urxencias de incendios. Trátase dun camión motobomba que lles entregou a Xunta de Galicia.
Este camión, xunto co que se lle entregou tamén á brigada forestal da Xunta en Quiroga, forma parte dos 57 vehículos motobomba que a Xunta de Galicia puxo a disposición de varios concellos galegos.
No acto de entrega, que tiña lugar en Silleda, e ao que acudía o concelleiro José Luis Rivera e persoal do GES, participou o presidente da Xunta, Alberto Núñez Feijoo, e a conselleira de Medio Rural, Ángeles Vázquez.
Unha vez que o vehículo chegou a Quiroga, foi o alcalde, Julio Alvarez, quen se encargou de achegarse ata a base do Grupo de Emerxencias para ver o novo vehículo, no que non dubidou en subirse. Trátase dun vehículo totalmente equipado para a loita contra incendios e que ten capacidade para levar a cinco persoas.
Este camión únese ao dispositivo co que conta o equipo de emerxencias, unha carroceta antiincendios e dous vehículos máis lixeiros e de menor tamaño para acudir máis urxentemente, un deles dotado tamén de equipo de excarcelación para accidentes de tráfico.

OS VIÑOS INSCRITOS NA FEIRA DO VIÑO DE QUIROGA RECIBEN A APROBACIÓN DA CONFRARÍA DO VIÑO

        Os doce viños brancos e os doce tintos incritos para participar na XXXIV Feira do Viño de Quiroga, xa teñen a aprobación da Confraría do Viño de Quiroga. Todos eles acadaron a calificación de aptos tras a cata que se levaba a cabo o pasado sábado.

Ás doce e media da mediodía os integrantes da Confraría, tras ser recibidos na casa consistorial polo alcalde de Quiroga, que ostenta o título de Confrade Maior, desfilaron ao longo da rúa  Real, acompañados pola Banda de Gaitas San Martiño, ata o Museo Etnográfico.

Dende o ano 2013, ano no que foi creada a Confraría do Viño para defender e promocionar este certame, os confrades desfilan pola rúa antes de levar a cabo a cata, dándolle vistosidade ao acto por ir ataviados coa vestimenta regulamentaria, capa morada e chapeu negro ribeteado en morado e que este ano estreaba insignia, un racimo de uvas co escudo de Quiroga e tamén co símbolo do Crismón da Ermida.

          Xa na sala de catas do museo levouse a cabo a cata dos viños blancos e tintos participantes na feira.  Como todos os anos os viños inscritos para participar na Feira do Viño de Quiroga, despois das análises realizadas no laboratorio especializado, sométense a un proceso de cata para a súa aprobación definitiva. Este ano os doce colleiterios participantes son:
          Héctor Enríquez Santiso, de Pacios de Mondelo.
          Antonio García Álvarez, de San Xulián de Abaixo.
          Antonio Castro Álvarez, de San Vitoiro.
          Álvaro Rodríguez González, da Toca.
          Gaspar Álvarez Nogueira, das Medas.
          Elías González Mourelo, de Carballo de Hospital.
          Juan Rodríguez Diéguez, de Centeais.
          Antonio Vázquez López, de San Xulián de Abaixo.
          María Oliva Cao, de Bendollo.
          José Luis Rodríguez Lago, de San Xulián de Abaixo.
          Alfonso Nuñez Calvo, dos Novaes.
          Ceferino González Vidal, de Bendilló.
         
Os viños de todos eles acadaron a aprobación tanto dos catadores da Confraría do Viño como dos resultados realizados en laboratorio.

11 mar. 2016

XA SE COÑECEN AS VINTE TAPAS QUE PARTICIPARÁN NO QUIROGA DE TAPAS

          O Concello de Quiroga poñerá en marcha dende o 17 ao 25 de marzo a 5ª edición do Concurso "Quiroga  de Tapas".

Os vinte establecementos participantes presentaron  a tapa coa que van participar .

    Adega de María:As cousas da miña terra.
Palmeras: Tabulé.
Portón: Callos con fabas de Lourenzá.
Raposo: Hamburguesa rústica de Quiroga.
Quiper: Strogonoff da Eva, tudo junto e mesturado.
A Taberna: Tapa A Taberna.
Ruxe: Paneta.
          Lago: Champiñons recheos, soia e tomates cherry
Félix: Mata fame arrollao.
           O Roxo Vivo: Ensalada de salmón marinado e aguacate con vinagreta de lima.
Casa Torres: Escalopines de tenreira en salsa crema, champiñóns, tallarines e verde
           ChapaKuña 3: Croquetas de lagostino e xamón ibérico con ensalada de queixo, froitos secos e mel de Quiroga.
O Recuncho de Dino: Pasteliño de verduras con salsa de piquillos.
Dimar: roliño recheo de langostinos e grelos con crocante de millo, crema de Arzúa e milfollas de pataca ó forno con aceite de do Val de Quiroga.
Ferreiriño: Niño de cogomelos.
Escaleira: Galician people.
          A Barca: Montaña de pataca ao queixo.
Vinoteca Quiroga: Tosta do mar.
          Mesón da Clara: Carne mechada ao whisky.
Dakar: Medallón de solombo ás dúas salsas.
Na presente edición hai numerosos premios para as persoas que completen o circuito e emitan o seu voto á mellor tapa entre todas as participantes. Así poden optar a un premio de  300,00€ en metálico; un circuito termal, con estancia, almorzo e comida no Balneario de Augas Santas(Pantón) para dúas persoas; unha estancia e almorzo para dúas persoas na Hospedería Ferrería de Quintá; unha estancia para dúas persoas na Aldea Rural “O Busto” (Pobra de Brollón); unha noite para dúas persoas no Hotel Conde de Lemos (Monforte); varias comidas ou ceas para dúas persoas en diversos establecementos; unha visita ás instalacións e degustación de Viño para catro persoas no Centro doViño Ribeira Sacra; ou un lote de productos  típicos de Caurelor, Lar de Ricobao, Porvide e Morriña.
         

Pola súa banda o local gañador da mellor tapa da presente edición recibirá100 € e unha praca conmemorativa.

4 mar. 2016

A CONFRARÍA DO VIÑO DE QUIROGA CATARÁ OS VIÑOS PARTICIPANTES NA XXXIV FEIRA DE QUIROGA

      O sábado, 12 de marzo, levarase a cabo a cata dos doce viños participantes na XXXIV Feira do Viño de Quiroga, coincidindo coa reunión anual da Confraría do Viño de Quiroga.

       Ás doce e media da mediodía está previsto que os integrantes da Confraría, tras ser recibidos na casa consistorial polo alcalde de Quiroga, que ostenta o título de Confrade Maior, desfilen ao longo da rúa  Real, acompañados pola Banda de Gaitas San Martiño, ata o Museo Etnográfico.

      Xa na sala de catas do museo levarase a cabo a cata dos viños blancos e tintos participantes na feira.  Como todos os anos os viños inscritos para participar na Feira do Viño de Quiroga, despois das análises realizadas no laboratorio especializado, sométense a un proceso de cata para a súa aprobación definitiva.

Tras a cata, os integrantes da confraría continuarán coa orde do día da súa xuntanza, na que figura o informe do presidente e o estado de contas.