30 mar. 2015

QUIROGA ACOLLE O 9 DE MAIO O "GEOLODÍA" DA PROVINCIA DE LUGO

          O instituto Universitario de Xeoloxía e a Universidade da Coruña, en colaboración co concello de Quiroga, organizan un percorrido xeolóxico pola serra do Caurel, o día 9 de maio. Trátase dunha excursión de campo guiada por xeólogos, totalmente gratuíta e aberta a todo tipo de público. Realízase en lugares interesantes polo seu ámbito xeolóxico, e proporciónase unha información rigorosa a nivel divulgativo. Permite ver estes lugares con "ollos xeolóxicos", e é tamén un xeito de sensibilizar a poboación sobre a importancia e necesidade de protexer o noso patrimonio xeolóxico.
          Estas excursións, que levan o nome de Geolodía, realízanse dende o ano 2011 por provincia, sendo unha iniciativa apoiada pola  Asociación Española para o Ensino das Ciencias da Terra e o Instituto Xeolóxico e Mineiro de España.
          O "Geolodía" deste ano na provincia de Lugo parte do Museo Xeolóxico Municipal de Quiroga para facer un interesante percorrido xeolóxico por toda a Serra do Caurel: miradoiro de Campodola (Sinclinal da Serra do Caurel, Mina da Toca, Cova da Buraca das Choias (Visuña), A Seara...

          Os interesados poden pedir información na Casa de Cultura de Quiroga 982435125 ou anotarse no enderezo electrónico xeaurora@udc.es

23 mar. 2015

O BARRIO DA RIBEIRA XA TEN CENTRO SOCIO CULTURAL

Onte domingo fíxoselle entrega aos veciños da Ribeira do seu novo Centro Social. Nun acto no que acudiron a corporación case ao completo e incluso anteriores concelleiros da zona.
O centro, está pensado principalmente para os veciños da zona, pero o alcalde de Quiroga, Julio Alvarez, asegurou que estará aberto a calquera colectivo do municipio que solicite o seu uso.
O centro sociocultural forma parte da primeira fase do centro. Nesta primeira fase do proxecto quedarán acondicionados uns 200 metros cadrados da edificación, que inclúe o centro sociocultural e a parte exterior do piso tutelado. O piso tutelado, acollerá unhas seis ou sete habitacións que servirán de acollida temporal para persoas con problemas de inserción social así como para as que precisen de aloxamento en ocasións de extrema necesidade.
Nunha seguinte fase acondicionaríanse a parte restante, ata completar uns 400 metros cadrados útiles coa intención de albergar o centro de día. Como recalcou o alcalde na súa intervención o edificio vai ter unha función social moi importante, pero son duas partes distintas e ben diferenciadas.
Os encargados de descubrir a placa da inauguración deste centro foron dous dos concelleiros da zona de anteriores lexislaturas, José Miranda e José Manuel García.               
O párroco da parroquia, Jesús Río, foi o encargado de bendecir o novo centro que estará aberto todas as tardes dende hoxe mesmo, en horario de 4 a sete da tarde. O centro contará con persoal que o atenda e ofrecerá periódico diario.
Como non podía ser doutro xeito, os numerosos veciños que quixeron acudir a este acto aberto para contemplar estas novas instalacións, foron convidados a unhas tapas.   

18 mar. 2015

PRESÉNTASE O PROGRAMA DE ACTOS DA FEIRA DO VIÑO


          Dez colleiteiros inscribíronse para participar na XXXIII Feira do Viño de Quiroga, que terá lugar os días 4 e 5 de abril.        
          Xa se realizaron as análises organolépticos dos caldos participantes. E un ano máis tamén se realizará a cata destes viños. Este sábado, 21 de marzo, será o día na que a confraría do viño de Quiroga desfilará pola rúa Real antes de proceder á cata dos viños presentados á feira.
          Seguindo a tradición, cada ano nun tramo da rúa Real, nesta edición o recinto feiral situarase na parte de arriba da rúa, á altura da casa consistorial. As condicións meteorolóxicas serán as que decidan se se precisa instalar carpa no recinto feiral como xa foi preciso facer en anos anteriores.
         O programa de actos inclúe actividades previas á feira, como o concurso de tapas que se desenvolverá dende o 26 de marzo ao 3 de abril. A carreira popular o venres día 3 de abril, ou a actuación dos grupos que ían participar na festa da xuventude no verán, e que por mor da choiva se tivera que suspender. As actuacións musicais dos grupos David Prado e Bella Dona Band e + Iva, terá lugar a partir das doce e media da noite na zona dos pubs.
          O encargado de inaugurar o feira deste ano, será Severino Monteserín, secretario Xeral de Agader, a Axencia Galega de Desenvolvemento Rural. O acto de inauguración terá lugar ás seis e cuarto da tarde, pero anteriormente os grupo Os do Recanto e a Banda de Gaitas San Martiño, xa farán un pasarrúas polo recinto feiral.
          Ás seis e media as actuacións trasladaranse ata o Auditorio Municipal, onde actuarán a Coral Polifónica de Quiroga, a banda de gaitas San Martiño e os grupos de danzas San Martiño e Arume da Queiruga. Tamén se fará entrega dos premios do certame Cartas de Amor Vila de Quiroga.
        Ás oito e media do serán, xa no palco, terá lugar o momento máis multitudinario da feira que é o pregón. Nesta edición a pregoeira da feira do viño de Quiroga será Rocío Carrasco, coñecida dende sempre por ser filla da cantante Rocío Jurado.
          Tras o pregón farase entrega do premio do concurso de camisetas, para o que os participantes terán que subir ao palco para que sexa a propia pregoeira a que decida quen se merece os 100 € de premio.
          O grupo Mosaico será o encargado da animación nocturna.
          O domingo, a partir das doce e media da mediodía, na casa consistorial, faráselle a entrega de medallas aos colleiteiros participantes. A charanga Madialeva animará o recinto feiral durante toda a xornada.

          Todos estes actos serán os que acompañen a unha feira que ano tras ano recibe a centos de visitantes para disfrutar de Quiroga, pero sobre todo do producto estrela, o viño.

PRESENTADAS AS TAPAS DO CONCURSO "QUIROGA DE TAPAS"

          20 establecementos participarán na 4ª edición do Concurso Quiroga de Tapas, organizado dende a oficina de xuventude, que se levará a cabo entre os días 26 de marzo e 3 de abril.
          Esta mañá dábanse a coñecer as tapas do concurso:
ADEGA DA MARIA: "A fogo lento"
A PEDRA: "Leito de espas con gulas e gambas" 
LAS PALMERAS: "Tosta de champiñóns" 
O PORTÓN: "Arroz con cogomelos, gambas e pementos do piquillo" 
RAPOSO: "Brocheta do val de Quiroga" 
QUIPER: "Duo de mar" 
A TABERNA: "Milfollas de solombo con crema de cogomelos" 
RUXE-RUXE: "Cordón blue primavera" 
LAGO: "Pastel de carne con salsa de cogomelos e crocante de queixo" 
FÉLIX: "Tosta de ovo en flor con chourizo" 
O ROXO VIVO: "Milfollas de berenxena rechea de porco ó romeiro con gratén de queixo de Arzúa" 
CASA TORRES: " Polbo a brasa" 
CHAPAKUÑA 3: "Carrillera estofada con compota de mazá, castaña e pataca crocante" 
O RECUNCHO DE DINO: "Ragut de porco ó viño tinto de Quiroga con verduriñas salteadas" 
FERREIRIÑO: "Reinterpretación do cocido galego" 
ESCALEIRA: "Ovo a baixa temperatura, falsas migas de pan de millo e lisco de porco celta" 
A CASA DA PEDRA: "Pemento recheo de bacallau con crocante de berenxena" 
CAFÉ MONBEL: "Carne con peras ó viño do val" 
A BARCA: "Empanada de lacón con grelos e cebola caramelizada" 
MESÓN DA CLARA: "Carrillera de tenreira en salsa de chocolate"

     O Concello distribuirá nos locais participantes cartillas de votación “tapacartóns”, a disposición gratuíta do público consumidor, que será quen determine o gañador do concurso. Ademáis, en todos os establecementos participantes, estarán situadas as urnas oficiais de votación.
          A tapa presentada ó concurso, deberá estar exposta de forma destacada, así como a disposición do público consumidor nun número suficiente e razoable de unidades ou porcións, do 26 de marzo ao 3 de abril, en horario de 12:00 a 14:30 e de 19:00 a 22:30 horas, a un precio de venda ó público de 1,50 €uros.
           Cada vez que un cliente deguste a tapa presentada a concurso, o establecemento participante deberá selarlle, si non o fixera aínda, a cartilla de votación, na casilla correspondente o seu establecemento, si xa estivera cuberto o tapacartón, o local ten a obriga de darlle outro. Se o establecemento non dispón da tapa no horario do concurso, está obrigado a selar o tapacartón na casilla correspondente e poderá ser penalizado.
          Cando o cliente complete a degustación de todas as tapas presentadas a concurso en todos os establecementos participantes, poderá votar a súa tapa favorita utilizando o tapacartón e introducindo o mesmo nas urnas oficiais do concurso, ubicadas en todos os establecementos participantes. A votación deberá realizarse antes das 15:00 horas do 4 de abril, data na que se recollerán as urnas para o reconto de votos.
          Non será válida ningunha cartilla de votación que non conteña selo de todos os establecementos participantes, o seu voto, escrito de forma lixible e un nome, apelidos e teléfono de contacto da persoa que emita o voto.
          O cliente poderá ter en conta, á hora de emitir o seu voto, Presentación e innovación, Gusto, sabor, texturas e aromas e calidade dos ingredientes.
         O cuarto concurso “Quiroga de Tapas” fallarase o mércores 8 de abril na casa consistorial. O establecemento gañador recibirá un premio en metálico de 100 €uros, así como unha placa honorífica. O resto dos establecementos participantes recibirán un diploma de participación. Ademais, entre as cartillas de votación realizaráse o sorteo público para sete participantes no concurso que gañarán diferentes premios.
- 300 €uros en metálico.
- Circuíto termal, estancia, almorzo e comida no Balneario de Augas Santas para dúas persoas.
- Estancia e almorzo para dúas persoas na Ferrería de Rugando.
- Estancia na Aldea Rural "O Busto", Pobra de Brollón, para dúas persoas .
- Estancia na Casa de Maside, Pantón, para dúas persoas.
- Visita ás instalacións e degustación de viño para catro persoas no Centro do Viño Ribeira Sacra.

- Produtos típicos Caurelor e Porvide.

13 mar. 2015

ROCÍO CARRASCO PREGOEIRA DA XXXIII FEIRA DO VIÑO DE QUIROGA

       
  
    Rocío Carrasco Mohedano, (Madrid, 1977), coñecida presentadora de programas de televisión, será a pregoeira da XXXIII edición da Feira do Viño de Quiroga.

A popularidade da filla da cantante Rocío Jurado e do boxeador Pedro Carrasco, suxiu das súas frecuentes apracións na prensa rosa española e dos seus ocasionais desfiles como modelo. Despois empezou a súa carreira televisiva como copresentadora do programa de Telecinco "Cita con Apeles". De aí pasou a ser colaboradora no programa matinal de María Teresa Campos, "Día a día" (1997-2005).
      É coñecida a súa devoción relixiosa, en parte herdada da súa nai. Rocío Carrasco acudía todos os anos á procesión da Virxe de Regra en Chipiona, ata que faleceu a súa nai.
        Na actualidade presta a súa imaxe a algunhas firmas comerciais e presentou un programa en Canle Sur chamada "Nacidas para cantar" xunto con María Teresa Campos. Dende xullo de 2014 e ata febreiro deste ano foi a presentadora do programa "Hable con ellas" de Telecinco.

O NOVO CURSO DE TECIDO CONFECCIONARÁ UNHA COLCHA NO TEAR

        Dende a área de cultura do Concello, orgnaizase un novo curso de Tecido Tradicional. Trátase da cuarta edición deste curso que se desenvolve nas instalacións do Museo Etnográfico.

O curso que terá unha duración de 40 horas, comezará o día 22 de abril e prolongarase ata o 29 de xuño, desenvolvéndose dous días á semana, os luns e os mércores.

Durante este tempo os alumnos e alumnas aprenderán todo o proceso de elaboración téxtil seguindo as técnicas tradicionais de fiado, urdido e tecido con la de ovella. Pero o traballo no tear centrarase na elaboración dunha colcha. Esta peza realizada polos alumnos pasará a formar parte das instalacións do museo etnográfico.



      As persoas interesadas en participar ou en recibir máis información terán  de prazo ata o día 20 de abril, nas instalcións da Casa da Cultura, persoalmente ou a través do teléfono 982.43.51.25.

12 mar. 2015

DISMINÚE A DELINCUENCIA EN QUIROGA

           A casa consistorial acolleu onte unha reunión ordinaria da xunta local de seguridade. Presidida polo subdelegado do Goberno en Lugo, Ramón Carballo, e o alcalde de Quiroga, Julio Alvarez, na xuntanza díxose unha análise global da situación delincuencial no municipio.
Segundo os datos de denuncias formuladas no 2014, a delincuencia rexitrou un lixeiro descenso en Quiroga con respecto ao ano anterior, sendo máis reseñable a baixada dos delitos contra o patrimonio, que se reduciron case á metade. Mantense deste xeito a tendencia iniciada a comezos do ano 2013.
Os integrantes da xunta de seguridade, representantes da Garda Civil, de Tráfico, da Policía Autonómica e da Policía Local, destacaron ademais o aumento no grao de eficacia acadado na resolución e esclarecemento dos delitos que se rexistraron no municipio, e que atribuiron ao traballo e a colaboración entre os efectivos da Garda Civil e da Policía Local.
Segundo explicou o subdelegado do Goberno, a porcentaxe de delitos esclarecidos subiu lixeiramente en toda Galicia no 2014, pasando do 52 ao 53%, unha porcentaxe superada no concello de Quiroga.
Ramón Carballo informou na xunta sobre o traballo realizado polas Forzas e Corpos de Seguridade do Estado no marco do Plan director para a convivencia e mellora da seguridade escolar nos centros educativos e as súas contornas. O obxetivo deste plan e informar a alumnado, profesorado e Ampa sobre temas como o acoso escolar, o consumo de alcohol e drogas, a violencia de xénero ou os riscos do uso inaxeitado de internet e as redes sociais.
Ao longo do curso 2013/2014, os axentes impartiron 9 charlas nos centros educativos de Quiroga. Para o actual curso, están previstas xa 4 novas charlas no Colexio de Educación Infantil e Primaria, ademais dunha demostración de medios policiais.

A xuntanza rematou falando da seguridade nas festas municipais, comprometendose xa a estreita colaboración da Garda Civil cos axentes da Policía Local nas tarefas de vixiancia preventiva e de contros da orde pública.

6 mar. 2015

20 ESTABLECEMENTOS PARTICIPAN NA 4º CONCURSO QUIROGA DE TAPAS

      20 establecementos participarán na 4ª edición do Concurso Quiroga de Tapas, organizado dende a oficina de xuventude, que se levará a cabo entre os días 26 de marzo e 3 de abril.
          Os establecementos que participan son :Adega da María, Mesón da Clara, Ciber-café A Pedra, Bar Las Palmeras, Bar O Portón, Bar Raposo, Bar Quiper, A Taberna, Café Monbel, Pub Ruxe-Ruxe, Bar Lago, Bar Félix, Restaurante O Roxo Vivo, Casa Torres, Bar Chapakuña3, O Recuncho de Dino, Mesón Ferreiriño, Mesón Escaleira, A casa de Pedra, Parrillada “A Barca”.    
        Cada un destes establecementos elaborará unha única tapa, con ingredientes de libre elección, a un precio de venda ó público de 1,50 €uros. A tapa presentada a concurso faraa pública cada un dos establecementos antes do inicio do concurso.
          Este ano a novidade serán os premios entre os votantes, xa que haberá un total de sete gañadores. Os premios consistirán en:
- 300 €uros en metálico.
- Circuíto termal, estancia, almorzo e comida no Balneario de Augas Santas para dúas persoas.
- Estancia e almorzo para dúas persoas na Ferrería de Rugando.
- Estancia na Aldea Rural "O Busto", Pobra de Brollón, para dúas persoas .
- Estancia na Casa de Maside, Pantón, para dúas persoas.
- Visita ás instalacións e degustación de viño para catro persoas no Centro do Viño Ribeira Sacra.
- Produtos típicos Caurelor e Porvide.
          Neste concurso organizado dende o concello de Quiroga, colaboran Porvide, Caurelor, Centro do Viño Ribeira Sacra, Casa de Maside, Aldea Rural “O Busto”, Ferrería de Rugando, Oca Augas Santas e a Asociación de Empresarios de Hostaleria de Lugo, E para comer Lugo.

QUIROGA RECIBE O TÍTULO DE LOCALIDADE SOLIDARIA CO ALZHEIMER

AFAMON, a Asociación de Familiares de enfermos de Alzheimer e outras demencias de Monforte, fixolle entrega esta mañá da Acreditación de “Localidade Solidaria co Alzheimer” ó Concello de Quiroga.
O Pleno da Corporación do 17 de setembro de 2014, aprobara por unanimidade a proposta feita por AFAMON de declaración á Quiroga como concello Solidario co Alzheimer.

Ser solidario co Alzheimer é unha iniciativa da Confederación Española de Asociaciones de Familiares con personas con Alzheimer y otras demencias, para contribuír a expandir a mensaxe da necesidade dunha Política de Estado sobre o Alzheimer, informar os seus cidadáns sobre a enfermidade e as súas consecuencias, promover as accións relacionadas coas súas Asociacións máis próximas, facilitar a difusión desta mensaxe e concienciar á sociedade sobre a necesidade de conseguir unha Política de Estado sobre o Alzheimer. 

XXXIII FEIRA DO VIÑO DE QUIROGA. 4 e 5 DE ABRIL DE 2015

2 mar. 2015

ABERTO O PRAZO PARA A INSCRIPCIÓN DE ESTABLECEMENTOS PARTICIPANTES NO CONCURSO QUIROGA DE TAPAS

      O Concello de Quiroga, organiza xunto coa Asociación Provincial de Hostelería de Lugo a cuarta edición do concurso: “QUIROGA DE TAPAS”. O concurso ten un ámbito xeográfico circunscrito ós límites do municipio de Quiroga, podendo participar no mesmo calquera establecemento do val adicado á restauración.
          A inscrición no concurso é gratuíta. A data límite de inscrición será o 4 de marzo e poderá realizarse a través do persoal técnico de Xuventude do Concello, que visitará os establecementos de restauración do municipio ou na Casa de Cultura no teléfono 982 435 125.
    Cada establecemento participante deberá elaborar unha única tapa, con ingredientes de libre elección, a un precio de venda ó público de 1,50 €uros. Ademáis, é obrigatorio ofertar o maridaxe cós viños da comarca.
O Concello distribuirá nos locais participantes cartillas de votación “tapacartóns”, a disposición gratuíta do público consumidor, que será quen determine o gañador do concurso. Ademáis, en todos os establecementos participantes, estarán situadas as urnas oficiais de votación.
          A tapa presentada ó concurso, deberá estar anunciada, exposta de forma destacada, así como a disposición do público consumidor nun número suficiente e razoable de unidades ou porcións, do 26 de marzo ao 3 de abril, en horario de 12:00 a 14:30 e de 19:00 a 22:30 horas.
  Cada vez que un cliente deguste a tapa presentada a concurso, o establecemento participante deberá selarlle, si non o fixera aínda, a cartilla de votación, na casilla correspondente o seu establecemento, si xa estivera cuberto o tapacartón, o local ten a obriga de darlle outro. Se o establecemento non dispón da tapa no horario do concurso, está obrigado a selar o tapacartón na casilla correspondente e poderá ser penalizado.
          Cando o cliente complete a degustación de todas as tapas presentadas a concurso en todos os establecementos participantes, poderá votar a súa tapa favorita utilizando o tapacartón e introducindo o mesmo nas urnas oficiais do concurso, ubicadas en todos os establecementos participantes. A votación deberá realizarse antes das 15:00 horas do 4 de abril, data na que se recollerán as urnas para o reconto de votos.
        Non será válida ningunha cartilla de votación que non conteña selo de todos os establecementos participantes, o seu voto, escrito de forma lixible e un nome, apelidos e teléfono de contacto da persoa que emita o voto.
          O cliente poderá ter en conta, á hora de emitir o seu voto, Presentación e innovación, Gusto, sabor, texturas e aromas e calidade dos ingredientes.
          O cuarto concurso “Quiroga de Tapas” fallarase o mércores 8 de abril na casa consistorial. O establecemento gañador recibirá un premio en metálico de 100 €uros, así como unha placa honorífica. O resto dos establecementos participantes recibirán un diploma de participación. Ademais, entre as cartillas de votación realizaráse o sorteo público para cinco participantes no concurso que gañarán diferentes premios.

AMPLIADO O TALLER PARA PERSOAS CON ALZHEIMER A TRES DIAS SEMANAIS

        O concello de Quiroga, a través do departamento de servizos sociais, amplia esta semana o seu taller de estimulación cognitiva, psicomotriz e  da memoria  en persoas maiores que sofren deterioro cognitivo.   
      Este programa ten como obxectivo  a prevención e mellora  de enfermidades cerebrais, especialmente a enfermidade de alzheimer e as caracterizadas pola perda aillada e obxectiva da memoria.
          Tras a boa acollida deste obradoiros e os seus resultados, familiares dos participantes no obradoiro  de “estimulación cognitiva e psicomotriz”, que se desenvolvía en dúas sesións semanais en horario de mañá, pediron a ampliación deste obradoiro un día máis á semana.
          Tras esta petición e coincidindo co inicio deste mes de marzo, o concello ampliou estas sesión, polo que se desenvolverán os luns, mércores e venres, dende as once da mañá ata a unha da mediodía,

          Paralelamente a esta petición, dende o departamento de servizos sociais do concello mantense aberto o prazo de inscripción para novos participantes neste obradoiro que se desenvolve con  persoal da asociación  Afamon, Asociacion de Familiares de Enfermos de Alzheimer de Monforte.