26 dic. 2012

A OFICINA DE XUVENTUDE ORGANIZA OS CAMPIONATOS DE NADAL NOS PUBS

Comenzaron os campionatos de Nadal nos pubs organizados dende a  oficina de xuventude.
O primeiro deles comenzou o pasado sábado no Pub Tic Tac e foi de futbolín.
Esta noite no Pub Bunny disputarase un campionato de dardos, mañá no Pub Ruxe-Ruxe o campionato será de póker; e o venres o Disco-Pub Yoya acollerá o campionato de futbolín.
A vinderia semana, o xoves día 3 no Pub Taj Mahal disputarase novamente un campionato de futbolín; e o venres día 4 no Goya Music Bar de chupito veloz.
Todos os campionatos comenzarán a partir da media noite e os gañadores levarán os seguintes premios:
1º PREMIO: Ceas para dúas persoas no Hostal Marcos.
2º PREMIO: Vales de 20 €uros para a tenda Evolution Sport.
3º PREMIO: Cesta navideña.

18 dic. 2012

O AUDITORIO MUNICIPAL ACOLLE ESTE SÁBADO UN CONCERTO DE NADAL


            A área de Cultura do concello organizou para este sábado o seu tradicional concerto de Nadal.
No concerto actuará a Coral Polifónica de Quiroga, o grupo de danzas San Martiño e a banda de gaitas do mesmo nome.
Ademais realizarase o sorteo benéfico dunha cesta con produtos típicos en beneficio de Uxía.
O concerto comezará a partir das sete da tarde no Auditorio Municipal.

13 dic. 2012

NUMEROSAS ACTIVIDADES PARA AS FESTAS DE NADAL


O concello de Quiroga organizou un amplo número de actividades para este mes de decembro e para as festas de Nadal.

Dende a área de cultura oganizouse un certame de posesía infantil, a visita de Papá Noel ao telecentro, en colaboración co Colexio de Educación Infantil e Primaria, o tradicional concerto de Nadal, no que participarán a banda de gaitas San Martiño, o grupo de danzas San Martiño e a Coral Polifónica de Quiroga. A proxección da película O Apóstolo e un concerto de canto e piano a cargo de Josep Ramos.

Dende a área de educación organizouse a Ludoteca de Nadal e un concurso de postais en colaboración coa área de Xuventude. Esta última a súa vez organizou os campionatos nos diferentes pubs da vila, este ano haberá campionatos de fútbolín, dardos, poker e do chupito veloz.

O centro social organizou unha xornada de celebración de Nadal, baixo o nome de Xuntos celebramos o Nadal, así como o sorteo dunha cesta de nadal e un baile especial de despedida de ano.

A área de deportes ten organizada a participación das Escolas Deportivas Municipais no torneo Azkar, nas categorías alevín e infantil e un torneo de fútbol sala de Nadal.

Todas estas actividades rematarán o día 5 de xaneiro, coa Cabalgata de Reis.

7 dic. 2012

XUVENTUDE ORGANIZA UN CURSO DE INGLÉS


Dende a oficina de xuventude, organízase un curso de inglés dirixido á preparación do exame “First Certificate”. Este exame correspóndese co Nivel B2 do Marco de Referencia Europeo.
 
Aas clases terán o seu comezo o mércores día 19, e realizaranse todos os mércores durante unha hora, dende as cinco da tarde ata as seis, na casa de cultura.
 
As persoas interesadas en participar no curso deben de inscribirse na casa de cultura ou no teléfono 982 435 125.

 

VIDEOCONFERENCIA CON PAPÁ NOEL


Os nenos de Quiroga poderán atoparse un ano máis con Papá Noel a través de videoconferencia. A iniciativa parte da Rede de Centros para a Modernización e a Inclusión Tecnolóxica (Cemit), na que está incluído o noso municipio.
 
O programa que conectará aos escolares que o desexen con Papá Noel permitiralle os nenos de Quiroga comunicarse con este persoaxe de Nadal o martes, 18 de decembro.
 
Con este tipo de actividade, a rede pretende converter as aulas multimedia integradas dende varios municipios de toda a comunidade autónoma en puntos de encontro. A videoconferencia en tempo real con Papá Noel servirá para dar a coñecer as posibilidades que ofrecen estes espazos de comunicación e as tecnoloxías das que dispoñen.

4 dic. 2012

A XIII MOSTRA DO ACEITE XA TEN DATA PARA A SÚA CELEBRACIÓN


Onte  tivo lugar no Concello Quiroga  a primeira reunión da Comisión Organizadora da  Mostra do Aceite, presidida polo Alcalde e coa asistencia dos colleiteiros e persoal da organización.
 Nesta primeira reunión  a Comisión Organizadora  realizou unha  análise e avaliación  da pasada edición,  con ánimo de   mellorar  aqueles aspectos  que se poida para  facer que a vindeira mostra, a  XIII Mostra do ACceite de Quiroga,  supere a tódalas anteriores.
A data escollida pola organización para a celebración da XIII  Mostra do Aceite, no muiño de Bendilló, foi o  domingo, 24 de febreiro.
Previo a esta data, concretamentente o sábado día 16  de febreiro, desenvolveranse unha xornadas técnicas sobre o cultivo e a presenza na gastronomía  do aceite  de Quiroga, contando con persoas expertas na materia.

27 nov. 2012

XA SE PODE VISITAR A EXPOSICIÓN "O NOSO MUNDO, O NOSO FUTURO, A NOSA OPCIÓN"


A sala de exposicións da casa da cultura acollerá a partir do vindeiro martes a exposición “O noso mundo, o noso futuro, a nosa opción”. Trátase dunha iniciativa da Consellería de Medio Ambiente, Territorio e Infraestruturas que, contando coa colaboración do Concello de Quiroga, poderase visitar ata o día 10 de decembro.
 
A idea base que fundamenta a exposición “O noso mundo, o noso futuro, a nosa opción” é a de sensibilizar e fomentar a participación da cidadanía no desenvolvemento de medidas efectivas para loitar contra os efectos do cambio climático.
 
A exposición está composta de paneis informativos, un documental sobre o cambio climático, varios módulos como exemplo de solucións a nivel indiviudal para reducir as emisións de CO2 e de enerxias renovables e finalmante, un caderno de actividades didácticas.
 
Os días 28 e 30, terá lugar unha visita guiada na que participarán alumnos e alumnas dos centros escolares do pobo. Esta visita permite tratar de xeito mais ameno e distendido os contidos dos paneis. Trátase de que os participantes avancen ao longo da exposición cubrindo un cuestionario que posteriormente lles será útil para traballar co caderno de actividades.

21 nov. 2012

EN MARCHA A CAMPAÑA SOLIDARIA DE RECOLLIDA DE TAPÓNS PARA UXÍA


Uxía López Cobo é unha pequeniña de 9 meses que naceu sen a súa man esquerda. A súa nai, Nuria Cobo está levando a cabo unha campaña de recolección de tapóns de plástico para costear a operación de implante dunha man para a pequena.
 
Na actualidade existen no mercado moitas mais posibilidades de reconstrución dunha man, cheegando ao implante conectado ás terminacións nerviosas da nena, de forma que pode mobilizalo segundo os seus desexos.

          A dia de hoxe, o SERGAS non cobre o gasto que inclúe o tipo de man totalmente funcional e similar a unha man humana que hai dispoñible no mercado, e que realmente se que cumpre a ausencia coxénita da man que ten Uxia.

 Os recursos economicos dos pais son limitados, e non son suficientes para facer fronte a todos os gastos que vai xerar a colocacion dunha man destas caracteristicas,
         
Coa intencion de facer un chamamento á solidariedade entre todos, a nai esta actualmente cunha ONG, para que se encargue da recolle e dos bens que sexan achegados. Como primeiro paso paso, que non supón desembolso e é facil de realizar, pensouse na recollida de tapóns de plastico. A plataforma Tod@s con Uxía é a encargada de supervisar a campaña de recollida de tapóns que puxeron en marcha os pais da nena.
 
A familia de Uxía López agradeceu o apoio recibido por decenas de persoas desde que o caso saltou aos medios de comunicación. A familia da nena está a loitar para que poida ser intervida polo doutor Pedro Cavadas. Ademais, habilitaron un número de conta para as persoas que queiran colaborar que é o 2080 0138 91 3000079737.

O C.I.M. ORGANIZA ACTIVIDADES CON MOTIVO DO DÍA INTERNACIONAL CONTRA A VIOLENCIA DE XÉNERO


O Centro de Información á Muller do Concello vai levar a cabo diversas actividades con motivo da celebración este domingo do día Internacional contra a Violencia de Xénero.
 
Con motivo desta celebración o C.I.M. vai repartir nos diferentes establecementos da vila, folletos explicativos sobre os distintos tipos de violencia e o recursos dos que se dispón para combatelos. Estes folletos, pero adáptados a nenos máis pequenos, repartiranse tamén no colexio de educación infantil e primaria de Quiroga.
 
Outra das actividades que se levará a cabo será a colocación dun libro blanco no concello, o venres dende as dez da mañá ata a unha da mediodía. Neste libro todos os veciños poderán plasmar o que queiran con motivo desta lacra social.
 
Finalmente, levarán a cabo outras duas actividades relacionadas con este medio informativo, unha delas será hoxe mércores no programa da radio municipal Siglo XXII, no que se emitirá música en contra da violencia de xénero. E tamén na televisión local emitirá durante a fin de semana un video con esta temática.

12 nov. 2012

O DIRECTOR XERAL DE PATRIMONIO DA XUNTA VISITA A IGREXA DE HOSPITAL


O director xeral de patrimonio cultural da Xunta de Galicia, José Manuel Rey Pichel, estivo o pasado venres visitando a igrexa de Hospital. Esta non é a primeira vez que o director de patrimonio visita o templo no que o seu departamente investiu uns 300.000 €, dende o ano 2005, cando comenzaron as obras de restauración.
 
As últimas obras levadas a cabo dende a Consellería de Cultura e Turismo foron as da restauración e acondicionamento da capela de San Xoán de Hospital nas que se invertiron 85.000 €.
 
Rey Pichel tamén estivo contemplando as obras de restauración do retablo maior da igrexa que é de estilo barroco, de finais do século XVII ou algo posterior. Aínda que o seu departamento non realiza estas obras, sí ten que dar as autorizacións pertinentes para poder levalas a cabo.

9 nov. 2012

CONTINÚA O PROXECTO "COÑECE O TEU CONTORNO: APROVEITA OS SEUS RECURSOS"


A área de cultura do concello continuará esta tarde co proxecto “Coñece o teu Contorno: aproveita os seus recursos ”. Nesta ocasión continuarase cun dos abundantes productos da zona: A castaña.
Nesta ocasión, Verónica Núñez, complementará a charla anterior na que explicou a súa experiencia como produtores e vendedores de derivados dá castaña e dos froitos silvestres. Así a partir das seis da tarde, no Museo etnográfico terá lugar unha xornada baixo o nome da castaña na cociña galega.
Verónica Núñez, da empresa Caurelor, ofrecerá aos participantes múltiples xeitos de preparación deste abundante produto na comarca de Quiroga. Os asistentes  poderán degustar distintos pratos  realizados con castañas.

 
A seguinte actividade deste proxecto será  unha nova andaina que levará aos participantes ata o pregamento de Campodola- Leixazós, declarado este ano como monumento natural.
 
A excursión terá lugar o domingo 18 de novembro. O percorrido iniciarase ás nove da mañá diante da Casa da Cultura, onde se collerá dirección a Conchada, para seguir por Mazaira, o alto do Convento, o alto do Boi e o Miradoiro de Campodola. Pola Hermida baixarase novamente ata Quiroga sobre as seis da tarde.
 
En total a ruta considerada de dificultade alta, ten 28 kilómetros. Os participantes deberán levar a súa comida e bebida para o percorrido.
 
Os interesados en anotarse ou solicitar máis información, poden dirixirse á Casa de Cultura ou no teléfono 982.43.51.25, antes do venres 16 de novembro.
 

6 nov. 2012

O MUSEO XEOLÓXICO ACOLLERÁ UN OBRADOIRO DE ARQUEOLOXÍA


A delegación de Cultura organizou un obradoiro de arqueoloxía no Museo Xeolóxico de Quiroga o sábado día 24 de novembro. O obradoiro, que se desenvolverá dende as once da mañá ata a unha e media, estará dedicado á metodoloxía arqueolóxica e mostra e análises de pezas.
 
 Na actividade tomarán parte os arqueólogos Iván Álvarez  e Tania Arias, que explicarán dunha forma prática os diferentes pasos que se seguen habitualmente desde que unha peza arqueolóxica é descuberta e desenterrada polos investigadores ata que acaba sendo exhibida nun museo.  Iván Álvarez ten levado a cabo numerosas investigacións en xacementos galegos, principalmente dás épocas castrexa, romana e altomedieval, mentres que Tania Arias colabora desde hai anos no estudo dos xacementos paleolíticos do sur lucense.
 
As persoas interesadas en participar ou en recibir máis información poden pasar pola Casa da Cultura ou chamar ao teléfono 982.43.51.25.

ORGANIZADOS OS ACTOS PARA CELEBRAR O PATRÓN DA VILA


O concello de Quiroga organizou as actividades a desenvolver o día 11 de novembro, día de San Martiño, patrón da Vila.
 
Oprograma da festa centrarase no domingo día 11. Así os actos comenzarán ás once menos cuarto da mañá cun pasarrúas a cargo da banda de Gaitas San Martiño. Ás once comenzará a carreira popular, soamente de caracter local e na que haberá distintas categorías, dende pitufos ata cadetes.
 
Ás doce da mediodía comenzarán os actos litúrxicos, que se iniciarán coa tradicional procesión na que a imaxe do patrón da vila recorrerá a zona da praza Maior.
 
Á unha e cuarto os actos trasládanse ata a praza, onde o grupo de danzas San Martiño actuará acompañado da banda de gaitas do mesmo nome. Sobre as catro os cativos poderán disfrutar de xogos populares organizados dende a área de educación.
 
E finalmente a partir das sete da tarde poderase degustar o magosto acompañado de viño novo. E a continuación festa co duo local Fondo Tropical.

30 oct. 2012

AS MAMÁS DA COMARCA PODEN PARTICIPAR ESTA TARDE NUNHA CHARLA SOBRE A HIXIENE E OS COIDADOS DA PEL DOS BEBÉS


A Casa da Cultura acollerá esta tarde, a partir das seis e media, unha charla sobre a Hixiene e os coidados na pel de bebés, nenos e mamás, organizada pola Parafarmacia e Perfumería de Quiroga.
 
A charla correrá a cargo de Isabel Romero Torrado, do departamento de Formación de Laboratorios Expansciencie (Mustela) e Olga Otero, directora do Centro de Exd4, especialistas en ecografias en 3 e 4 dimensiones da Coruña.
 
Ao rematar a conferencia todolos asistentes recibirán uns detalles da marca, ademais efectuarase o sorteo dunha canastilla e productos e duas ecografías gratuitas en 3 ou 4 dimensións, valoradas en 135 €.
 
O titular da Parafarmacia e Perfumeria de Quiroga, Nacho Baliña, querelle agradecer, dende este medio, ao Concello de Quiroga a cesión das instalacións para levar a cabo este acto informativo dirixido a todas as mamás da zona de  Quiroga, Ribas de Sil e Caurel.

XUVENTUDE ORGANIZA O VIII CERTAME DE RELATO CURTO


A oficina de xuventude organíza o VIII Certame de Relato Curto, de tema libre, e no que poden participar todas as persoas co desexen con tantos relatos curtos como queiran.
 
Os relatos poden estar escritos en castelán ou en galego cunha extensión máxima de vinte folios e mínima de dous, mecanografados ou a ordenador por unha sóa cara, por duplicado e sen firma.
 
Os datos do autor/a, dirección e teléfono presentaránse dentro dun sobre pechado. No exteriror figurará o título do relato e a categoría na que participa, xuvenil ou adultos dependendo de se o autor ten menos de 18 anos ou máis.
 
Os traballos pódense enviar por correo ou entregalos persoalmente na Casa de Cultura de Quiroga ou na Oficina de Información Xuvenil, antes do 30 de novembro de 2012.
 
Premiaranse os tres mellores relatos de cada categoría. Os premios consistirán nunha placa conmemorativa para todos eles pero os gañadores levarán ademais unha obra de relatos.

 

26 oct. 2012

O CONCELLO DE QUIROGA APROBA A CONTA XERAL DO 2011 E O INCREMENTO DO IPC NA AUGA E NO LIXO


A corporación Municipal celebrou onte pola tarde unha tranquila sesión plenaria ordinaria na que se aprobou a Conta Xeral do Orzamento 2011, cos votos en contra da oposición. Neste punto o PSde G-PSOE destacou a evolución favorable con respecto ao 2010 que recolle o informe de secretaría; mentres que o BNG fixo alusión ao estado crítico no que se atopa a facenda municipal. O Partido Popular pola súa banda agradeceu que a oposición falara dunha evolución favorable e recalcou que o concello de Quiroga é dos que millor paga de toda a zona.

 Coa abstención do BNG e o voto en contra do PSdeG-PSOE aprobouse a  modificación de ordenanzas fiscais por actualización de tarifas segundo o IPC, que se aplicará á auga e ao lixo. José Luis del Pont falou de que se podía aforrar esta subida da auga pola mal estado da economía, porque é moi cara e polo mal servizo da empresa concesionaria. Xavier Castro defendeu que o ideal sería conxelar as tasas. Julio Alvarez, pola súa banda, recalcou que a auga millorou nos últimos meses e que soamente se incrementa no IPC a auga e o lixo, as demais taxas están conxeladas dende hai tres anos.

          Finalmente, por ser un pleno de caracter ordinario, houbo tempo para rogos e preguntas.

A CASA DA CULTURA ACOLLE ESTA TARDE UNHA CHARLA SOBRE A CASTAÑA


Esta tarde, a partir das sete e media, a casa da cultura acollerá unha charla que versará sobre a Castaña. Esta charla forma parte do proxecto da área de cultura do concello, “Aproveita os Recursos do Entorno”.
Neste amplo proxecto teñen cabida distintas actividades, charlas, saídas culturais, xornadas, etc;  pero todas cun denominador común, o coñecemento e a posta en valor dos innumerables recursos dos que dispón o noso concello e que neste momento poden converterse en saídas profesionais.
Despois de varias charlas dedicadas a produtos como o aceite e o viño, esta tarde tocalle a outro abundante produto da zona: A Castaña. Para esta actividade contarán coa  colaboración  da  empresa  Caurelor e os seus responsables, Verónica Núñez e Daniel Arza.

 

 

24 oct. 2012

RUTA DE SENDEIRISMO POLO INICIO DOS CANÓNS DO SIL DA ASOCIACIÓN DA COMARCA DE QUIROGA


          A Asociación Socio Cultural da comarca de Quiroga organizou unha ruta de sendeirismo polo canón do sil para o domingo día 28 de outubro.  A ruta Castro de Abaixo – Torbeo – A Cubela – Castro de Abaixo, ten un total de 16 km cunha dificultade moderada.
 
Para a ruta partirase dende a casa de Cultura ás oito e media da mañá. Dende a ponte de Augasmestas os camiñantes dirixiranse a Castro de Arriba, subindo pouco a pouco ata Torbeo, onde se fará un pequeno descanso antes de emprender a vertixinosa e espectacular baixada ata a Cubela, pasando por Pena Tallada e disfrutando do espectacular meandro do río Sil. Tras o xantar que se farán na Cubela, os camiñantes  continuarán pola parte máis espectacular da ruta, que transcorre pola marxen dereita do río Sil ata o punto de partida.
 
Para máis información ou realizar as inscripcións, os interesados deben dirixirse a tenda Arkine, oficinas Goni ou a fontanería Benja.

22 oct. 2012

O PP ACADA EN QUIROGA O 64,37% DOS VOTOS


Quiroga segue sendo un dos municipios máis popular do sur da provincia de Lugo, ao acadar o 64,37% dos votos emitidos na xornada de onte. O PP foi a opción elexida pola maioría dos quirogueses, concretamente por 1.487.
 
A participación nestes comicios foi alta, dun 73,52%, o que se traduce en que 2.310 quirogueses acudiron ás urnas, nunha xornada sen incidencias, para exercer o seu dereito a voto nestas eleccións autonómicas. Do total de votos acadados 1.487 foron para o Partido Popular; 390 para o PSOE; 165 para o BNG; 126 para Alternativa Galega de Esquerda; 9 para Unión Progreso y Democracia; 10 para Escaños en Branco; e 22 para outras formacións. Ademáis houbo 36 votos en branco e 65 foron nulos.
 
No municipio de Quiroga unha vez máis constituíronse sete mesas electorais: na mesa situada en Vilar de Lor votaron os veciños censados no Lor Alto e no Lor Baixo. Dun censo de 289 veciños emitíronse 205 votos, un 70,93%; deles 147 para o PP,  un 71,70%; 36 para o PSOE;  8 para o BNG; 5 para Alternativa Galega de Esquerda e 2 para outras formacións. Houbo tamén 3 votos nulos e 4 en branco.
 
Na mesa de Montefurado, cun censo de 224 votaron 158, un 70,53%; destes 114 foron para o PP, o que equivale a un 72,15%; 26 para o PSOE;  7 para o BNG; 6 para Alternativa Galega de Esquerda e 1 para outras formacións. Houbo tamén 3 votos nulos e 1 en branco.
 
Na mesa de Sequeiros, cun censo de 236 votantes, exerceron este dereito 181, o que supón un 76,69%. Nesta mesa o PP acadou 135 votos, o que equivale a un 74,58% dos votos; o PSOE 22;  BNG 10; e 6 para Alternativa Galega de Esquerda. Houbo tamén 1 voto nulos e 7 en branco.
 
Na mesa situada na escola de Santa Cubicia, onde votaron os veciños comprendidos entre as parroquias do Hospital e A Seara, cun censo de 634 persoas, recolleu un 77,28%, 490 votos. O PP acadou 295, o 60,20%; o PSOE 106, o BNG 33, 30 para Alternativa Galega de Esquerda e 4 para outras formacións. Houbo tamén 17 votos nulos e 5 en branco.
 
 
Na mesa situada na Casa da Cultura, que acollía os veciños das parroquias da Ermida e do Nocedo, dun censo de 219 votaron 170, un 77,62%: destes votos 110 foron para o PP,  o 64,70%; 33 para o PSOE, 11 para o BNG; 6 para Alternativa Galega de Esquerda e 3 para outras formacións. Houbo tamén 3 votos nulos e 4 en branco.
 
Na primeira mesa do Centro Social, na que votaban os veciños censados na parroquia de San Martiño con apelidos comprendidos entre o A e o J, dun censo total de 646 recibiu 448 votos, un 69,34%. Por partidos políticos, o PP acadou 227, un 61,83%; o PSOE 66, o BNG 41, 34 para Alternativa Galega de Esquerda e 8 para outras formacións. Houbo tamén 17 votos nulos e 5 en branco.
 
E finalmente, na segunda mesa situada no Centro Social, onde votaban os apelidos dende o J ata o Z, a máis numerosa de todas, cun censo de 894 acadáronse 658 votos, o que supón un 73,60%. Nesta mesa o PP acadou 409 votos, o 62,15%; o PSOE 101, o BNG 55, 39 para Alternativa Galega de Esquerda e 23 para outras formacións. Houbo tamén 21 votos nulos e10 en branco.

 

19 oct. 2012

3.142 QUIROGUESES PODERÁN VOTAR ESTE DOMINGO


Este  domingo celébranse unhas eleccións autonómicas nas que están chamados ás urnas 3.142 quirogueses, que serán os que aos parlamentarios que formarán o goberno galego por un período de catro anos.
 
Sete mesas electorais deberán quedar constituídas ás nove da mañá cos seus correspondentes presidentes e vocais para que os veciños maiores de 18 anos poidan exercer o seu dereito a votar ata as oito do serán, momento no que se pecharán oficialmente as mesas.
 
Na mesa A do Centro Social poderán votar 646 persoas, na mesa B, 894. En Santa Cubicia poderán exercer este dereito 634 veciños e en Soldón, 236. 224 poderano facer en Montefurado e 289 en Vilar de Lor. Finalmente, 219 votantes poderán depositar o seu voto na Casa da Cultura.

O C.I.M. ORGANIZA UNHA CAMIÑATA CON MOTIVO DO DÍA CONTRA O CANCRO DE MAMA


O Centro de Información á Muller do concello preparou para a tarde de hoxe unha camiñata polo paseo fluvial con motivo da celebración do día contra o cancro de mama.
 
Para esta camiñata está previsto que todalas persoas que queiran participar se xunten nas inmediacións do Auditorio Municipal ás cinco e media da tarde. Unha vez xuntos os participantes dirixiranse ata o paseo fluvial por Vilaverde, para recorrer o paseo ata a confluencia do río Quiroga co río Sil. Chegado a este punto emprenderase camiño de regreso ata o punto de partida.

11 oct. 2012

4.000 PERSOAS VISITAN OS MUSEOS LOCAIS NO QUE VAI DE ANO


Os museos Xeolóxico e Etnográfico do Concello de Quiroga acadaron no que vai de ano un total de 4000 visitantes; repartidos en 2168 o Museo Etnográfico e 1832 o Museo Xeolóxico. Nesta estatística chama a atención que algo máis do 90 % dos visitantes proceden de fóra do Concello de Quiroga.
 
O 17 % dos visitantes acuden a visitar os museos quirogueses en pequenos grupos o en solitario, sen cita previa; mentres que o 83 % restante intégranse dentro de grupos de máis de 10 persoas que acordan previamente unha visita guiada. Dentro deste último grupo hai que salientar a numerosa presenza de centros de ensino tanto de infantil e primaria como de secundaria e asociacións culturais de toda a comunidade autónoma.
 
O Museo Etnográfico mantén dende a súa apertura no ano 2007 unha afluencia media que supera os 1700 visitantes anuais. Para o Museo Xeolóxico aínda non se pode establecer unha comparación con anos anteriores porque a súa apertura tivo lugar en decembro do ano 2011. O Museo Etnográfico superou amplamente a media dos anos anteriores, máis tendo en conda que aínda faltan dous meses para rematar o ano.
 
Estas cifras veñen apoiadas por unha serie de actividades que dinamizaron os museos. Daquela no Museo Etnográfico ao longo do ano realizouse un primeiro obradoiro de tecido tradicional (17 mulleres inscritas de Monforte, Ribas do Sil e Quiroga) e instalouse a exposición permanente dos decorados da película de animación galega “O Apóstolo”, ademais da colaboración anual co programa “Preescolar na Casa” e a demostración na rúa dun fiadeiro tradicional. Cabe destacar que ao longo do ano 2012 incorporáronse á colección deste museo 23 novas pezas.
 
No Museo Xeolóxico, realizáronse varias xornadas de portas abertas con visitas guiadas e durante as primeiras xornadas de Xeoloxía na Ribeira Sacra organizadas polo GDR “Ribeira Sacra” tamén se realizou unha visita especial.
 
De cara aos vindeiros meses está prevista a realización de novas actividades de dinamización como un Obradoiro de Arqueoloxía no Museo Xeolóxico e a apertura no Museo Etnográfico dunha exposición permanente de fotografías antigas na que se mostrarán aos verdadeiros protagonistas desta colección etnográfica realizando os seus traballos.

10 oct. 2012

QUIROGA CONTARÁ CUNHA NOVA RÉPLICA DO CRISMÓN

O Crismón de Quiroga, un exemplar de arte paleocistiana, pode verse no Museo Centro Gaiás, formando parte da exposición “Gallaecia Petrea”.

          Datado no século V, o crismón de Quiroga é unha obra feita en mármore do Incio e procede da Igrexa parroquial de Santa María dá Hermida. Considerada unha peza excepcional máis alá das fronteiras da Gallaecia, representa a calidade e a coidada elaboración desas expresións nun ambiente aínda restrinxido en cantidade pero culto e con alto poder adquisitivo, que non foi alleo ás preocupacións teolóxicas e doutrinas nas etapas formativas da ideoloxía cristiá. É máis, xogou un papel activo nelas o crismón de Quiroga, que se converte nunha representación en pedra das inquietudes das clases altas galaicorromanas adheridas ao cristianismo. Trátase dun precedente da mesa de altar, a "mensa" de ofrendas paleocristiana, reflexo do carácter colectivo e aberto do culto cristián nos seus primeiros tempos.
         Unha vez remate esta exposición, o obispo de Lugo, Alfonso Carrasco Rouco, enviará a reproducción en pedra deste Crismón que se amosa na exposición, á parroquia da Hermida. Esta será xa a segunda réplica do Crismón coa que contará Quiroga, posto que a primeira pode verse na entrada do Auditorio Municipal dende hai varios anos.

9 oct. 2012

ESTA TARDE COMEZA UN TALLER DE TÉCNICAS NATURAIS


      Esta tarde, a partir das sete e media da tarde comenza o taller de Técnicas Naturais, organizado pola Oficina Municipal de Información Xuvenil do concello en colaboración coa Parafarmacia- Perfumería. O taller desenvolverase ademáis de hoxe os martes 16 e 23 de outubro en horario de sete e media da tarde a nove da noite na casa da Cultura.
 
O Taller consta de tres sesións, a primeira será unha introdución ao mundo das herbas medicinais; a segunda versará sobre as súas aplicación e finalmente a terceria sesión centrarase nas distintas preparacións das herbas medicinais.
 
O taller no que se aprenderá a realizar preparación de xarabes, tisanas, emplastos, baños ou aceites estará impartido por Ignacio Bliña, técnico en titoterapia e técnicas naturais.

4 oct. 2012

32 ALUMNOS COMENZARON AS CLASES DE PIANO E GUITARRA


          As clases de piano e guitarra organizadas dende as áreas de educación e de xuventude do concello comenzaron onte cunha xuntanza do profesor e alumnos para fixar horarios e facer os grupos dos participantes.
          As clases serán impartidas por Alexandro González, coñecido artista do grupo “Capitán Sonoro” e actual voz do grupo “Los Árboles”, tamén foi compositor de coñecidos temas, como:- A banda sonora para o corto "El último trago" para Saga tv. Primeiro premio Mestre Mateo.- O espacio sonoro para a producción teatral “Mundo Lois”.- ou a canción "Os socios unidos" para o programa infantil Xabarín Club de TVG.
          O curso impartirase todos os mércores e debido o alto número de participantes, 32 en total, realizaranse varios grupos. Así en horario de 5 a 6 da tarde as clases de piano e guitarra serán para os nenos de 4 a 7 anos, de 6 a 7 para  os rapaces de 8 a 12 anos e finalmente os maiores repartiranse en dous grupos, un primeiro grupo dende as sete ás oito e un segundo grupo dende as oito do serán ata as nove da noite.

27 sept. 2012

AS ÁREAS DE EDUCACIÓN E XUVENTUDE ORGANIZAN CLASES DE PIANO E GUITARRA PARA TODAS AS IDADES


Dende as áreas de educación e de xuventude do concello de Quiroga, dirixidas por Dna. Ana Núñez García e Dna. Rosa Arza Rodríguez, respectivamente, organízanse clases de piano e guitarra para todas as idades.
          Estas clases serán impartidas por Alexandro González, coñecido artista do grupo “Capitán Sonoro” e actual voz do grupo “Los Árboles”, tamén foi compositor de coñecidos temas, como por exemplo:
 - A banda sonora para o corto "El último trago" para Saga tv. Primeiro premio Mestre Mateo.
- O espacio sonoro para a producción teatral “Mundo Lois”.
- A canción "Os socios unidos" para o programa infantil Xabarín Club de TVG.
  O curso comezará o día 3 de outubro na casa de cultura, e impartirase todos os mércores de 19 a 20 horas para nenos e nenas, e de 20 a 21 horas para adultos. As clases terán un custo por alumno de 15 euros.

          Para apuntarse a ditas clases só hai que pasar pola casa de cultura ou chamar ó 982 435 125.

24 sept. 2012

O CONCELLO DE QUIROGA ORGANIZA UNHA VIAXE A CIDADE DA CULTURA DO MONTE GAIÁS


O sábado, día 6 de Outubro,  o  Concello de Quiroga organiza unha excursión a  Santiago de Compostela.

 
A excursión ten por obxeto visitar a emblemática Cidade  da Cultura do  Monte Gaiás, visita que será complementada coa visita ao museo do pobo galego e a Catedral Compostelana.

 
O  programa e horario da excursión é o seguinte:

 
         -Saída de Quiroga ás 8:00 h

-Visita completa á cidade da cultura con guía oficial ás 11:00 h.

-Xantar nun restaurante de Santiago ás 14:00 h

-Vista ao museo do pobo galego ás 16:30 h.

-Tempo libre para visitar a catedral a partir das 18:00 .

 
A excursión que organiza o Concello de Quiroga a través da Concellería de Cultura e na que colabora o centro social, vai dirixida a todos os colectivos quiroga e ten un prezo especial de 17 € onde se inclúe transporte, xantar e os abonos das visitas a museos ou similares.

 
Os interesados en participar poden anotarse na casa da cultura e no centro social abonando previamente o prezo da excursión.

 
Os participantes na excursión deberán levar documentación segundo sexa que acredite: maiores de 65 anos, carné de estudante , así como tarxeta do paro se fora o caso.

 

15 sept. 2012

QUIROGA ACOLLERÁ O VINDEIRO DÍA 1 DE OUTUBRO UNHA CAMPAÑA DE INFORMACIÓN E CONCIENCIACIÓN SOBRE A RECOLLIDA SELECTIVA E A RECICLAXE DO LIXO


A praza de España de Quiroga vai acoller o vindeiro día 1 de outubro unha campaña de información e concienciación sobre a recollida selectiva e a reciclaxe.
 
Ao longo das últimas décadas, o traballo constante das Administracións Públicas e das entidades que velan pola mellora e conservación do Medio Ambiente, especialmente a prol da reciclaxe e da reutilización dos envases, obxectos, ferramentas e electrodomésticos cotiáns, trouxo consigo unha progresiva concienciación dos consumidores, que cada vez son máis conscientes da importancia de “reciclar, reutilizar e reducir”.
 
Pero paradóxicamente, unido á boa vontade do consumidor concienciado, existe unha tendencia aínda elevada a reciclar erróneamente. É o que se coñece co nome de “impropios”, é dicir, aqueles residuos que son depositados de forma equivocada no contenedor de reciclaxe. Segundo datos de Ecoembes, o 22,9% dos residuos do contenedor amarelo (envases de plástico, latas e bricks) e o 2% do contenedor verde (residuos non reciclables) son impropios.
 
          Desta forma Ancaria SL, xunto coa Consellería de Medio Ambiente, Territorio e Infraestruturas da Xunta de Galicia e  Ecoembes vai levar a cabo unha campaña encaminada a informar e concienciar sobre a recollida selectiva e a reciclaxe en concellos galegos cunha taxa de impropios sitúase entre o 30 e o 35 por cento.
 
          O obxectivo desta campaña é acadar a diminución da porcentaxe de ditos impropios e aumentar a recollida selectiva axeitada dos mesmos. Para elo, prantéxase unha campaña extensiva oriéntada en dúas vertentes: actividades enfocadas a público adulto preferentemente entre 18 e 65 anos e a estudantes de primaria de 10 a 12 anos.
 
          A contará cunha parte informativa teórico-práctica sobre as vantaxes da reciclaxe e da recollida selectiva, a prevención na xeración de residuos, e o adecuado manexo dos mesmos á hora de depositalos no colector apropiado.  Obradoiros creativos con materiais reutilizados, co obxectivo de aportar ideas sobre que facer con moitos residuos antes de tiralos.  E finalmente un exame voluntario aos asistentes co fin de avaliar os coñecementos adquiridos durante a sesión. E tras el, os participantes recibirán un agasallo premiando o seu interese e colaboración.