20 jul. 2016

ULTIMADO O PROGRAMA DAS FESTAS DE VERÁN

        O Concello de Quiroga xa ten ultimado o programa das festas de verán que se desenvolverán os día 4, 5, 6 e 7 de agosto.

As festas abriranse o xoves día 4 cun festival de música e danza tradicional na praza España, no que actuarán os grupos de danzas San Martiño e Arume da Queiruga e a banda de gaitas San Martiño.

O venres contarase cunha actuación do mago Dani García no parque da Constitución, xunto antes do inicio da XI Festa da Comunidade, para a que xa se poden adquirir as entradas para degustar unha gran paella; e que rematará coa actuación da banda Folk de Ribas de Sil.

Pasada a media noite, tocalle o turno á festa da xuventude, que se desenvolverá na zonas dos pubs, e que nesta ocasión contará coa actuación do grupo Gin Toni’s. Durante esta festa farase a entrega dos premios dos certames de poesía e fotografía da área de xuventude.

O sábado, día 6, pola mañá a banda de música de Xinzo de Limia fará unha alborada e dará un concerto diante da casa do concello. Pola tarde a praza España acollerá un espectáculo e un obradoiro de maxia a cargo de Apren-Deimi. A festa popular correrá a cargo da orquestra The Boys Machine e a verberna contará co grupo Atenas.

O domingo ao mediodía un novo espectáculo de animación de rúa a cargo de Troula Animación, nesta ocasión A Invasión Pirata. E pola tarde unha nova entrega do Concurso pinta con xiz no chan. A festa desta xornada virá da man do grupo Alkar e da orquestra Fania Blanco Show.

Durante estes días tamén haberá actividades deportivas, co II Torneo de Street Soccer; coa presentación do Quiroga nun encontro o sábado contra o Barco e coa disputa do Trofeo Xoiería Zafiro de veteranos entre Quiroga e Monforte.

Como remate das festas celebrarase o día 10 a XXV Mostra do Mel de Quiroga que estará animada pola charanga Terras do Bibei.

ABERO O PRAZO DE INSCRIPCIÓN DA XXV MOSTRA DO MEL

O Concello de Quiroga abriu hoxer mañá o prazo de inscrición para participar na XXV Mostra do Mel de Quiroga que se celebrará o vindeiro día 10 de agosto, mércores.

Os interesados deberán inscribirse na Casa da Cultura antes do venres, día 29 de xullo.


XA SE PODEN RETIRAR AS ENTRADAS PARA A XI FESTA DA COMUNIDADE

       Quiroga acollerá a venres 5 de agosto a XI Festa da Comunidade que un ano máis formará parte do inicio das festas de verán.

A festa, que se desenvolve no parque da Constitución acolle unha cea de paella, que por suposto irá acompañada de pan e bebidas. A sobremesa será unha tarrina de xeado.

Todas as persoas que queiran participar desta cea para a que se instalarán mesas e sillas, xa poden recoller a súa entrada, ao prezo de 6 € e á venda na casa da Cultura, no Centro Social, na librería Carmen, en Todo 100, en Loterías Ana e nos bares As Palmeras, O Portón, Quiper, Lago, Félix, Zorro, O Recuncho de Dino e o bar Dakar.


Como remate da festa, a partir das once da noite, a banda Folk de Ribas de Sil ofrecerá un concerto.

7 jul. 2016

CONCURSO DE DEBUXO INFANTIL: "QUIROGA EN DEBUXO"

A área de infancia do concello organiza un concurso de debuxo infantil para nenos e nenas de entre 3 e 12 anos de idade.
O debuxo terá como tema “Quiroga en debuxo” e deberá ser orixinal e realizado por calquera medio plástico; lapis, tinta, acuarela, acrílico, óleo, “collage”, gravado ou mixtos. O tamaño será de formato A4.     
No reverso do debuxo irán os datos do autor; nome e apelidos, teléfono e dirección. O debuxo presentarase na Casa de Cultura dentro dun sobre pechado coa idade e o nome do/a participante no seu exterior, antes do día 4 de agosto.
Existen tres categoría: A) De 3 a 5 anos. B) De 6 a 8 anos. C) De 9 a 12 anos.
A entrega de premios, que serán tres premios sorpresa por categoría, terá lugar nas Festas de Verán de Quiroga, o domingo día 7 de agosto ás oito do serán.

"quirogadiferente" NOVO CONCURSO FOTOGRÁFICO NAS REDES SOCIAIS

        O Concello de Quiroga  a través da Área de Xuventude e a OMIX de Quiroga convocan para este mes de xullo un concurso fotográfico a través da rede social Instagram e Facebook.
 O obxectivo deste certame, bautizado co nome de “quirogadiferente”, pretende que os veciños/as de Quiroga, mostren uns recunchos ou lugares diferentes ou pouco coñecidos do entorno do noso concello. O concurso consiste na publicación no Instagram e Facebook da Omix de Quiroga, das imáxenes realizadas.
Según as bases do certame, todas as fotografías téñense que publicar coa etiqueta #quirogadiferente ata o 1 de agosto. A organización tamén recomenda xeolocalizar as fotografías ou engadir unha etiqueta do lugar onde se fixo a foto.
A fotografía que ata o día 1 de agosto recolla máis “likes” será a gañadora. O premio para a fotografía gañadora consiste nunha cámara GoPro, cámaras estas, empregadas para gravacións e toma de fotografías en deportes ou ocio ao aire libre. A entrega do premio terá lugar nas festas de verán de Quiroga.

A participación no programa  é aberta, e gratuíta.

QUIROGA ACOLLERÁ O 30 DE XULLO A PRIMEIRA CARREIRA NOCTURNA

O departamento de deportes do concello organiza para o sábado día 30 a primeira Night Trail, ou carreira nocturna, que esta mañá presentaba o concelleiro de deportes, Andrés Novoa.

A carreira que partirá ás dez e cuarto da noite dende a praza España, terá dous recorridos, un que  terá un recorrido de 8km, practicamente urbán. A outra das carreiras, terá un recorrido de 16 km e separarase da primeira á altura de Caspedro. Os inscritos nesta carreira,  precisarán autorización paterna se son menores de 16 anos.

       Previo a carreira nocturna, ás dez da noite, haberá unha proba para nenos cun recorrido pola vila de Quiroga.

      Os interesados en participar nesta actividade, que tamén se pode facer andando, deberán de inscribirse antes do día 12 de xullo e abonar unha cuota de 9 €. Como remate da proba celebrarase unha pancetada para os participantes.

1 jul. 2016

HOXE COMEZA O PLAN DE OCIO XUVENIL PARA OS MOZOS QUIROGUESES

         O Concello de Quiroga  a través da Ára de Xuventude ten programado para este mes de xullo un Programa de Ocio Xuvenil conformado por múltiples actividades (xincannas, xogos deportivos, noites de teatro, Play Station, xogos de distensión,etc).
Entre os  obxectivos perseguidos con estas actividades está o poroporcionar noites de ocio saudable aos preadolescentes evitando así que caian en rutinas de ocio pouco saudables, fomentar a interacción entre os rapaces/as favorecendo a socialización  e  o traballo colectivo.
As actividades, que comezan hoxe, desenvolveránse as noites dos venres e sábados ó longo  de todo o mes en horario de nove da noite ata a medianoite na  Casa da Cultura.

A participación no programa  é aberta,  non é preciso inscribirse antes, e tamén é gratuíta.