14 abr. 2016

NOVO CURSO DE TECIDO TRADICIONAL NO MUSEO ETNOGRÁFICO

       O Concello de Quiroga dende o Museo Etnográfico organiza un novo curso de tecido tradicional. Trátase do quinto curso no que se ensinará a elaboración de pezas en tear, para o que se utilizará o tear que se atopa no museo etnográfico. A recollida e restauración das pezas empregadas no sector téxtil, levada a cabo dende o ano 2007, ofrécese a posibilidade de aprender os segredos dunha técnica milenaria de forte raizame na zona e que co paso do tempo foi quedando no esquecemento.

O curso, que se iniciará o 25 de abril, ten corenta horas de duración, polo que rematará o 29 de xuño. As clases impartidas pola tecedeira de Visuña, Carmen Barreiro Díaz, desenvolveranse todos os luns e os mércores dende as seis da tarde ata as oito do serán.

No curso que ten un prezo de 20 €, realizaranse prácticas para familiarizarse coas técnicas milenarias de urdir o fío para configurar a base sobre a que se tece, preparar o fío para tecer (cardar, fiar ao fuso e á roca, torcer, etc) e preparar os flocos para decorar as distintas pezas.

As persoas interesadas en recibir máis información ou en participar deber dirixirse á Casa da Cultura, ben persoalmente ou a través do seu tfno: 982.43.51.25.; antes do 25 de abril.

8 abr. 2016

XVI MOSTRA DO ACEITE DE QUIROGA


Spot da Mostra do Aceite de Quiroga (8 de maio do 2016).





A ELABORACIÓN DE AUGARDENTES, LICORES, CREMAS, SIDRAS E CERVEXAS, NOVO TALLER DA CONFRARÍA DO VIÑO

A Confraría do Viño de Quiroga, en colaboración co concello de Quiroga e a área de cultura da Deputación de Lugo, organiza un taller de elaboración de aguardentes, licores, cremas, sidras e cervexas artesanais; que se desenvolverá os días 2, 3 4 e 5 de maio.
O curso, de dez horas de duración e impartido por Manuel Sánchez, enólogo da adega Alan de Val, desenvolveríase na sala de catas do museo etnográfico en horario de sete e media da tarde a dez da noite.
O curso está deseñado para que os participantes aprendan nocións fundamentais de alcolería, destilación de augardentes e elaboración de almíbares. Así ademais da tradicional augardente de bagazao, aprenderase a elaboración de licor de herbas e licor café.
Outro apartado importantes do taller centrarase na elaboración de cremas e outros licores espirituosos, onde se ensinarán técnicas de elaboración da crema de augardente e de café; e licores como coñac, brandy, ron, whisky, bourbon, tequila, vodka, ginebra, anís, pacharán, pisco e hidromel. Tamén se falará sobre o embotellado e etiquetados destes licores.
O último apartado do curso centrarase na elaboración de sidras e cervexas artesanal.
O curso, dirixido a todo o público en xeral, ten un custo de 40 €. Os interesados en participar ou para recibir máis información deben dirixirse a casa da cultura antes do 27 de abril.

A MOSTRA DO ACEITE SERÁ UNHA HOMENAXE PÓSTUMA A UN DOS IMPULSORES DA RECUPERACIÓN DO ACEITE

        A comisión organizadora  da Mostra do Aceite reuniuse novamente para seguir traballando no programa deste evento que conta co recoñecemento da Xunta de Galicia como Festa de Interese Turístico de Galicia.

A Comisión Organizadora, ante o recente falecemento do colleiteiro  D. Guillermo  Nogueira Veloso;  decidiu  facerlle unha homenaxe póstuma nesta edición.

Guillermo, propietario do muíño das Farrapas no que se realiza a demostración da elaboración artesanal do aceite o día da mostra, foi un dos impulsores da recuperación da producción do aceite  en Quiroga e tamén en toda Galicia. Xunto cos outros colleiteiros, colaborou co  Concello de Quiroga, impulsor e patrocinador do evento,  na organización deste certame dende a súa primeira edición, cando aínda  a colleita de aceite en Quiroga era casi anecdótica.

Dende aquela I edición ata a actualidade,  grazas a esta mostra e ao empeño do Goberno Municipal presidido por D.Julio Álvarez,  a importancia deste singular produto de Quiroga  na economía da cormarca medrou de tal xeito que  a producción de aceite  pasa das economías familiares  a ser un produto comercializado por varias empresas da comarca co distintivo Aceite de Quiroga.

A mostra que celebrou moitas das súas edicións nos meses de febreiro ou marzo, trasladouse nas dúas últimas edicións ao mes de maio. Este cambio na data de celebración do evento responde ao mellor estado do produto para a súa presentación e venda, xa que o aceite está máis decantado e clarificado. A data fixada nesta edición é o domingo 8 de maio.
O Concello xa pechou o prazo de inscripción para os colleiteiros interesados en particiar na  XVI Mostra, foron oito os colleiteiros inscritos e que cumpren unhas condicións esixidas para participar, entre as que se pedía ter unha colleita mínima de 200 litros de aceite; e un resultado aceptable do análise químico e organoléptico que determinará o laboratorio especializado que se dispoña.
Na mostra do aceite poñerase unha vez máis en funcionamento o muiño das Farrapas, para que todos os visitantes poidan ver como é a elaboración tradicional do aceite de Quiroga. Durante a mostra especialista na materia catarán os aceites participantes, estes aceites ademais dos análises químicos e organolépticos tamén serán obxeto dunha cata previa a celebración do certame.

4 abr. 2016

OS QUIROGUESES ASISTIRÁN COMO PÚBLICO AO PROGRAMA SÁLVAME DIARIO DE TELE5

       A dirección do Centro Social dos Maiores, en colaboración co Concello de Quiroga,  organiza unha excursión de 1 día a Madrid.
       O programa da excursión, que terá lugar o xoves día 12 de maio, ten como destiño principal a asistencia ao programa Sálvame Diario de tele5. Conta co seguinte programa: Saída en autocar ás cinco e media da mañá dende Quiroga; parada polo camiño; xa en Madrid farase unha visita  polos  lugares  máis emblemáticos da capital. Sobre a unha do mediodía xantarase nun restaurante da zona e ao remate da comida entrarase ao plató de Sálvame  para participar en directo na grabación do programa. Ao seu remate, a última hora da tarde emprenderase a viaxe de regreso. 
        A excursión aberta a todo o público maior de idade, ten un prezo de 20€  con todo incluído no programa.
      Para participar é necesario apuntarse no bar do centro social, abonar o billete  e deixar o nº do D.N.I. Tamén se poden facer reservas a través do teléfono 982.43.51.76. O número de plazas é limitado e ocuparanse segundo o número da inscripción.