30 abr. 2014

CONVOCADO UN CONCURSO DE CUÑAS DE RADIO PARA ESTUDANTES

     Con motivo do Día das Letras Galegas 2014, A Rede de Dinamización Lingüística e o concello de Quiroga convocan un concurso de cuñas de radio orientadas a promover a lingua propia de Galicia O galego na onda. Co obxetivo de promover a reflexión sobre a lingua galega e a súa valoración positiva entre a mocidade do concello de Quiroga, á vez que se difunden as posibilidades da comunicación radiofónica entre a mocidade. No concurso poderá participar o alumnado de Educación Secundaria Obrigatoria e Bacharelato. Tanto individualmente como en grupos de ata catro persoas. Establecéndose catro categorías:
          Categoría A: matriculados no primeiro e no segundo curso da ESO.
          Categoría B: matriculados no terceiro e no cuarto curso da ESO.
          Categoría C: matriculados en Bacharelato.
       As cuñas de radio, que non poderán exceder os 60 segundos de duración, deberán ser inéditas, estar gravadas en lingua galega e estar orientadas a promover o seu uso e valoración social. Poderán incorporar música, sempre que esta sexa orixinal ou conte con licenza.
      Cada participante ou grupo participante poderá enviar un máximo de dúas cuñas ao concurso. As cuñas grabadas en CD deberán de enviarse a Radio Municipal de Quiroga antes do 17 de maio. Cada  CD irá nun sobre rotulado cun título e coa categoría en que compite.  A canda el deberá entregarse un sobre pechado onde consten o nome, apelidos e idade(s) do(s) concursante(s); o centro educativo onde estuda e un teléfono de contacto
      Outorgaranse un primeiro e un segundo premio por categoría consistentes nun obradoiro de radio impartido na radio municipal de Quiroga a partir do mes de setembro. Os gañadores dos primeiros premios, ademais, entrarán nunha segunda fase do concurso en que a súa cuña competirá coas gañadoras dos outros concellos da Rede de Dinamización Lingüística onde se desenvolve esta actividade. Os gañadores da segunda fase do concurso recibirán como premio a realización dun programa radiofónico na Radio Galega coa colaboración de profesionais deste medio e un lote de libros.

COMEZAN AS OBRAS DE CONSTRUCCIÓN DO CENTRO SOCIOCULTURAL DA RIBEIRA

Comezou a obra de destierre para a construcción dun centro socio-cultural na Ribeira. Ata a obra achegouse esta mañá o rexedor local, Julio Alvarez, e a enxeñeira encargada da obra.
A que se vai iniciar agora é a primeira fase do centro para o que se conta cunha subvención do  Plan de Obras e servizos, P.O.S. da Deputación. Esta primeira fase do proxecto está presupostada en preto de 30.000 €, dos que 14.000 serán aportados pola Deputación Provincial e 15.000 polo propio concello.
O concello conta tamén con outra subvención aportada polo GDR Ribeira Sacra para a segunda fase da obra.

A obra ten que estar rematada antes de que remate este ano, ainda que dende o concello barallase que esté rematado coindicindo coas festas de Hospital a finais do mes de agosto.

A CONFEDERACIÓN HIDROGRÁFICA VAI REPARAR OS DANOS DO PASEO FLUVIAL NO RIO QUIROGA

           A Confederación Hidrográfica do Miño-Sil lle colocaba onte os carteis de inicio dos traballos para a execución da obra de reparación de danos no paseo fluvial do regueiro da Ribeira, en Quiroga.
          Estes traballos, cun presuposto aproximado de 40.000 €, encóntranse englobados nas medidas urxentes para reparar os danos causados nos dous primeiros meses de 2014 polas tormentas de vento e mar na fachada atlántica e a costa cantábrica, declarándose de emerxencia con data 12 de marzo de 2014.
          A Confederación Hidrográfica procedeu xa ao peche e á sinalización da obra, permanecendo pechado ao tránsito o paseo lindante co río Quiroga, durante o transcurso das obras.

Estas obras son contestación á petición que o alcalde de Quiroga lle facía ao presidente da Confederación Hidrográfica, Francisco Marín, no mes de decembro, o día 16, cando acudía a comprobar as obras de restauracion hidrolóxico forestal do río Quiroga. Naquel momento estabanse a retirar ramas e arbores secas así como material vexetal acumulado a ambas as duas marxes do río Quiroga, nun tramo aproximado de 3 km, que en momentos de intensas chuvias podían provocar taponamentos e desvordamentos.

24 abr. 2014

O MESÓN ESCALEIRA GAÑA A III EDICIÓN DO QUIROGA DE TAPAS

        O mesón Escaleira alzouse co primeiro premio do terceiro concurso de tapas de Quiroga coa tapa «vieira envolvida en kikos de millo, crema de San Simón e soia e marmelada de tomate». O III concurso “Quiroga de Tapas” fallouse onte na Casa da Cultura.  

          A xerente da asociación provincial de empresaros da hostelería, Beatriz Vila, foi a encargada un ano máis de abrir as urnas e de facer o reconto dos votos emitidos polos participantes no concurso. Para elo contou coa axuda dos concelleiros Rosa Arza e José Luis Rivera.

En total participaron nesta edición 20 establecementos. Todos eles recibiron un diploma de participación. Cada vez que un cliente degustaba a tapa presentada a concurso, o establecemento participante debía selarlle  a cartilla de votación, na casilla correspondente o seu establecemento. Cando o cliente completaba a degustación de todas as tapas presentadas a concurso podía votar a súa tapa favorita utilizando o tapacartón e introducindo o mesmo nas urnas oficiais do concurso. As urnas recolléronse o día seguinte do remate do concurso, non sendo válida ningunha urna que non tivese intacto o seu precinto.

No reconto de votos non se daba por válida ningunha cartilla de votación que non contivese o selo de todos os establecementos participantes; voto, escrito de forma lixible e nome, apelidos e teléfono de contacto da persoa emisora do voto.

          A tapa do Mesón Escaleira, que foi a que recibiu máis votos por parte da clientela, foi galardoada con cen euros e unha placa conmemorativa. O segundo premio do certame foi compartido entre os locais Adega de María e pub Ruxe-Ruxe, xa que conseguiron o mesmo número de votos. O terceiro premio recaeu no mesón Ferreiriño. 


Doutra banda, tres clientes que participaron no concurso resultaron agraciados con diversos premios no sorteo. Os premiados foron María José Valladares Marzabal, con 300 euros cunha cesta de produtos típicos. Javier Núñez Fernández, cunha cea con circuíto termal e aloxamento no balneario de Augas Santas. E Consuelo Pérez Fuentes, cunha cea ou comida na hospedaxe de turismo rural de Rugando.

22 abr. 2014

MULTITUDINARIA UNHA FEIRA DO VIÑO NA QUE SE PRESENTARON UNS VIÑOS EXCELENTES

Quiroga celebrou un ano máis unha multitudinaria Feira do Viño. Ante a posibilidade de chuvascos durante a fin de semana, a comisión organizadora decidiu instalar con bo criterio unha carpa no recinto feiral.
O programa de actos, comezaba o sábado ás seis e cuarto da tarde coa inauguración oficial do recinto feiral. Ainda que dende a mañá xa eran moitas as persoas que se achegaban para probar os primeiros viños da feira. O encargado de cortar a cinta foi o director xeral de desenvolvemento rural, Antonio Crespo Iglesias.
Tras a inauguración os actos trasladábanse ata o Auditorio Municipal, onde actuaba a Coral Polifónica de Quiroga, presentando o seu novo repertorio.
A música e a danza tradicional galega tamén tiveron unha parte destacada coas actuacións da banda de gaitas San Martiño, e dos grupos de danzas Arume da Queiruga e San Martiño.
Os actos no Auditorio Municipal rematarían coa entrega dos premios aos gañadores do certame de Cartas de Amor vila de Quiroga deste ano.


Ás oito e media do serán, chegaría como sempre o momento máis multitudinario da Feira do Viño, cando era case imposible moverse polo recinto feiral. A actriz galega Cristina Castaño, Judith Bécker, na serie de Tele5 La que se Avecina, deu o pregón desta edición, reunindo unha verdadeira multitude. Cristina Castaño naceu en Vilalba, pero criouse en Santiago, e non coñecía Quiroga nin a Ribeira Sacra, pero foise namorada desta zona. O pregón estivo á altura das expectativas e terminou ao grande, demostrando as súas dotes de cantante ademais de actriz, coa interpretación a un tempo do Miudiño por parte da pregoeira e do público. 

          A actriz aseguraba non ter palabaras para resumir a súa experiencia deste fin de semana en Quiroga como pregoeira da Feira do Viño. Xa de volta en Madrid, Cristina Castaño desfacíase en eloxios cara Quiroga e os quirogueses, dos que dixo lle fixeron “un recibimento marabilloso, tanto pola xenerosidade do alcalde como polo cariño da xente en xeral». Palabras parecidas xa as decía diante das nosas cámaras ao remate do pregón.
  
 Tras o pregón desfilaron polo palco os representantes dos participantes no concurso de camisetas. Tras a exposición das camisetas a pregoeira tivo que escoller a gañadora, á que lle entregou un trofeo e 100€ en metálico.

O domingo, a unha menos cuarto, no museo etnográfico, as autoridades políticas que acudían a feira deste ano, facíanlle entrega das medallas aos colleiteiros participantes nesta edición.
A mediodía o recinto feiral voltaba a encherse para seguir disfrutando dos once viños tintos e os once brancos que participaron na feira, e que todos eles recibiran a calificación de excelentes na cata previa á feira.

Antes de emprender camiño de regreso aqueles que nos visitaron estes días e de reposar o corpo tras a festa os quirogueses, voltouse vivir unha animada xornada na que os colleiteiros unha vez máis estiveron satisfeitos coas vendas acadadas.

16 abr. 2014

453 CORREDORES INSCRITOS NA X CARREIRA POPULAR FEIRA DO VIÑO

O departamento de deportes do concello organizou un ano máis a Carreira Popular Feira do Viño. A décima edición da carreira que terá lugar o venres día 18 de abril e conta xa con 453 participantes inscritos.
  Ás catro e cuarto comenzará a carreira na categoría de pitufos, cun recorrido de 100 metros (ata aproximadamente o cruce coa avenida do Caurel). Cinco minutos máis tarde sairán os prebenxamíns e os benxamíns, cun percorrido de 500 metros, é decir unha volta ata a Praza de España. A continuación participará a categoría Alevín cun recorrido de 1.000 metros – 1 volta ata o bar Zorro. E finalmente farano os da categoría Infantil e Cadete, cun recorrido de 2.000 metros, ata as piscinas municipais e volta á meta.
          Ás cinco da tarde comenzará a Proba Absoluta, cun percorrido de 9.400 metros; e que comprende as categorías xuvenil, senior e veteranos; masculino e feminino. O percorrido consta de dúas partes. Na primeira, os corredores sairán de diante da Casa do Concello para ir ata a zona das piscinas para regresar ó lugar de partida. Neste punto comeza a segunda parte, na que os participantes terán que completar 2 voltas por un tramo do paseo fluvial.
          Este ano a proba de adultos estará novamente controlada a través dun CHIP que se entregará a cada corredor no momento da recollida do dorsal e que se colocará na zapatilla antes da saída da proba.
          Haberá trofeos e medallas para os tres primeiros de cada categoría tanto masculino como feminino, e os tres primeiros locais. Cada participante recibirá unha camiseta técnica como obsequio ata esgotar existencias e disporase novamente de servizo de fisioterapeuta na meta para atender calqura problema que surxa ao longo da realización da proba.
          O sistema de cronometraxe usado será o "Championchip", polo que houbo que inscribirse previamente na web Championchip Norte (única forma de inscrición na proba absoluta).

Os corredores que participan nas carreiras das categorias dende pitufos ata cadete  contan coa posibilidade de inscribirse o mesmo día da proba diante da Casa do Concello.

11 abr. 2014

SUSO TALENTO EXPÓN EN QUIROGA

A sala de exposicións da Casa de Cultura acollerá unha exposición de pintura do pintor Jesús Fernández López, natural do Saviñao e máis coñecido polo nome artístico de Suso Talento.

A exposición que acolle unha serie de cadros baixo o nome de Imaxes da Ribeira Sacra,  inaugurarase  o domingo a partir das seis da tarde, e poderase visitar ata o día 22 de abril.

SEGUNDA RUTA DE MOTONÁUTICA POLOS CANÓNS DO SIL

A Federación Galega de Motonáutica e o concello de Quiroga, organizaron a segunda ruta do campionato galego de turismo de motonáutica polos Canóns do Sil, para este sábado, día 12 de abril.
Os participantes sairán ás once da mañá dende Augasmestas para chegar ata o encoro de San Estevo e volta ata o lugar de saída. En total un recorrido de 44 millas, 82 quilómetros.
Os participantes que rematarán a proba sobre as duas da mediodía, disfrutarán o seu remate dunha comida nun restaurante local. Todos os participantes recibirán un recordo conmemorativo da proba e ademais os tres primeiros clasificados levarán un trofeo.

MARÍA DO CEO PRESENTA O SEU NOVO DISCO ESTE DOMINGO EN QUIROGA

Este domingo día 13 de Abril, a cantante María do Ceo presentará o seu último traballo 'Fado com outro acento' no Auditorio Municipal de Quiroga, a partir das sete da tarde. As persoas que esten interesadas en asistir o concerto poden adquirir as entradas o prezo de 10 euros na Casa da Cultura, no concello de Quiroga e no Centro Social, e o propio día do concerto nas instalacións do Auditorio.

No concerto non só haberá lugar para as novas cancións, senón que María do Ceo tamén repasará o mellor da súa traxectoria, pero os 13 temas que compoñen o novo traballo terán presenza destacada. Soarán, entre moitas outras, 'A menina dáscalças pardas', con letra de Armando González, ou a primeira tradución á lingua lusa do famoso 'María a portuguesa'

ARRANCA A TERCEIRA EDICIÓN DO CONCURSO "QUIROGA DE TAPAS"

O Concello de Quiroga, organizou xunto coa Asociación Provincial de Hostelería de Lugo a terceira edición do concurso: “QUIROGA DE TAPAS”, que comezou onte pola tarde e que se prolongará ate o 18 de abril. A presentación do concurso tiña lugar na Adega de María, e contou coa  presenza da corporación municipal e de Cheché Real, presidente da Asociación de Hostalaría de Lugo.
 En total son 20 os locais participantes: Remansiño, Adega da María, Ciber-café A Pedra, Bar Las Palmeras, Bar O Portón, Bar Raposo, Bar Quiper, A Taberna,  Cafetería Quiroga,  Pub Ruxe-Ruxe, Bar O Cantar Miudiño, Bar Lago, Bar Félix, Restaurante O Roxo Vivo, Casa Torres, Bar Chapakuña3, O Recuncho de Dino, Mesón Ferreiriño,  Mesón Escaleira e  A casa de Pedra.
A tapa presentada ó concurso, que terá un prezo de venda ao público de 1,50 € deberá estar a disposición do público consumidor nun número suficiente e razoable de unidades ou porcións, en horario de 12:00 a 14:30 e de 19:00 a 22:30.
Cada vez que un cliente deguste a tapa presentada a concurso, o establecemento participante deberá selarlle, si non o fixera aínda, a cartilla de votación, na casilla correspondente o seu establecemento, non se pode repetir selo do establecemento noutra casilla, si xa estivera cuberto o tapacartón, o local ten a obriga de darlle outro, e así, o cliente, tamén ten a opción de repetir as veces que así o desexe e optar con máis dun tapacartón ó premio.
Cando o establecemento non dispoña da tapa no horario do concurso, está obrigado a selar o tapacartón na casilla correspondente e poderá ser penalizado.
Cando o cliente complete a degustación de todas as tapas presentadas a concurso en todos os establecementos participantes, poderá votar a súa tapa favorita utilizando o tapacartón e introducindo o mesmo nas urnas oficiais do concurso, ubicadas en todos os establecementos participantes. Non será válida ningunha cartilla de votación que non conteña o selo de todos os establecementos participantes; Voto, escrito de forma lixible e nome, apelidos e teléfono de contacto da persoa que emita o voto.
O III concurso “Quiroga de Tapas” fallarase o mércores 23 de abril no Salón de Plenos do Concello ás 12:00 horas. O establecemento gañador recibirá un premio en metálico de 100 €uros, así como unha placa honorífica. O resto dos establecementos participantes recibirán un diploma de participación.

          E entre as cartillas de votación realizaráse o sorteo público para tres participantes no concurso que gañarán diferentes premios. O 1º premio: 300 €uros en metálico+produtos típicos de Quiroga; o 2º: Cea+Estancia+Circuíto termal para dúas persoas no balneario de Augas Santas e o 3º: Comida para dúas persoas na Ferrería de Rugando.

9 abr. 2014

A TERCEIRA EDICIÓN DO CURSO DE TECIDO EN TEAR CONFECCIONARÁ UN MANTELO

        A Delegación de Cultura do Concello de Quiroga organiza nas instalacións do Museo Etnográfico Municipal de Quiroga o 3º curso de tecido tradicional.
         
Aproveitando a recollida e restauración das pezas empregadas no sector téxtil, levada a cabo dende o ano 2007, ofrécese a posibilidade de aprender os segredos dunha técnica milenaria de forte raizame na zona e que co paso do tempo foi quedando no esquecemento.  

      O curso, de 40 horas de duración, será impartido pola tecedeira de Visuña Carmen Barreiro Díaz.
           
      A data prevista de inicio é o día 5 de maio e desenvolverase dende esta data ata o día 9 de xullo, todos os luns e mércores de 18:30 a 20:30 horas.
         
      O prazo para anotarse neste curso estará aberto ata o día 2 de maio, as persoas interesadas poden realizar a súa inscrición ou informarse na Casa de Cultura de Quiroga (teléfono 982435125). O prezo desta actividade é de 10 € ao mes.


    Nesta nova edición está previsto fabricar unha capa tradicional de pastoreo da serra do Caurel, unha prenda da que só quedan hoxe uns poucos exemplares en mal estado. A pesar de que foron de uso común hoxe en día non é fácil atopar exemplares ben conservados dos chamados mantelos. O museo etnográfico municipal de Quiroga posúe algunhas pezas deste tipo, pero por agora non se mostran ao público, xa que están deterioradas pola couza, remendadas de forma defectuosa e moi destinxidas. Os mantelos confeccionábanse cun tecido especialmente mesto e case impermeable, de maneira que non só protexían do frío senón que tamén eran un resgardo bastante eficaz contra a chuvia.

2 abr. 2014

PROGRAMA DE ACTOS DA XXXII FEIRA DO VIÑO

 A comisión organizadora da Trixésimo Segunda Feira do Viño de Quiroga fixo público o programa da feira  que terá lugar os días 19 e 20 de abril.
          O programa ábrese este sábado ás doce e media da mediodía, co desfile dos membros da confraría do viño de Quiroga dende a casa do Concello ata o Museo Etnográfico, onde realizarán a cata oficial dos viños inscritos na feira.
O domingo día 13, inaugurarase na sala de exposicións da casa da cultura a exosición de pintura de Suso Talento, ás seis da tarde. Unha hora máis tarde, no auditorio municipal, a cantante María do Ceo, ofrecerá un concerto.
          Continuando co programa de actos, o xoves 17, ás sete da tarde, na casa da cultura presentarase a Guía do Camiño de Inverno a Santiago, a cargo da presidenta da asociación Camiños a Santiago pola Ribeira Sacra. E o venres 18, a área de deportes do concello organizou a X Carreira Popular Feira do Viño, a partir das catro e cuarto da tarde.
O sábado 19, ás cinco da tarde a banda de gaitas San Martiño fará un pasarrúas para anunciar que estamos de festa. Ás seis e cuarto inaugurarase oficialmente o recinto feiral. O encargado de cortar a cinta será o director xeral de desenvolvemento rural, Antonio Crespo Iglesias. Tras a inauguración os actos trasladaranse ata o Auditorio Municipal, onde actuarán a Coral Polifónica de Quiroga, a banda de gaitas San Martiño, e os grupos de danzas San Martiño e Arume da Queiruga.
          Ás oito e media do serán, a actriz Cristina Castaño, Judith Bécker, na serie de Tele5 La que se Avecina, dará o pregón desta edición. Tras o pregón desfile e entrega dos premios do concurso de camisetas e festa popular co grupo Garibaldi.

O domingo, o grupo de gaitas os do Recanto farán un pasarrúas como inicio da festa. A unha menos cuarto, no museo etnográfico, fareselle entrega das medallas aos colleiteiros participantes nesta edición. A música desta xornada tamén virá da man da charanga Terras do Bibei.