O CONCELLO E O CENTRO SOCIAL POÑEN EN MARCHA A "OPERACIÓN QUILO SOLIDARIO"

O Concello de Quiroga en colaboración co  Centro Social puxo en marcha a Operación Quilo Solidario,”Por un fin social”,  trátase dunha actividade de carácter social dirixida a todas as persoas que queiran  aportar o seu quilo de solidariedade.

     Con esta iniciativa pidese a colaboración dos veciños para participar nesta causa solidaria aportando un quilo de alimentos non perecedeiros, tales como legumes, conservas, galletas, aceite ou productos de aseo persoal.Todas as aportacións serán recollidas nas instalación do Centro Social de Quiroga.

       Por outra banda, o Centro Social tamén é receptor para a recollida de roupa usada en bó uso, a roupa que se entregue ten que estar limpa en un bó estado de uso.

     A Operación Quilo Solidario permanecerá aberta durante o mes de decembro, pero as aportacións poden seguir ata que o Concello de Quiroga dé por pechada a recollida, que se enviará aos destinos que máis o necesiten.

A BIBLIOTECA MUNICIPAL CONVOCA O CERTAME DE POESÍA INFANTIL "NADAL 2016"

                                  

A Biblioteca Pública Municipal de Quiroga convoca o Certame de Poesía Infantil “Nadal 2016”de acordo as seguintes bases :

1- Poden participar tódolos nenos e nenas, con poemas sobre o tema xenérico de “O Nadal”.

2- Establécense tres categorías: A, ata 8 anos, B de 9 a 11 anos,C, de 12 a 16 anos.

3- Cada autor poderá presentar cantos traballos desexe.Os poemas estarán escritos en galego e a súa extensión será como máximo dun folio por una soa cara. Con cada traballo, acompañarase unha folla co nome e demais datos do autor.

4- O prazo de presentación dos traballos rematará o vindeiro día 15 de decembro, debendo ser entregados polos seus autores na Biblioteca Municipal.

5- O xurado, formado por entendidos na materia, seleccionará por cada categoría e modalidade un máximo de tres traballos. Os autores seleccionados recibirán cadanseu diploma e libros.

6- Os traballos premiados nesta fase local participarán na fase provincial do Certame, convocado pola Bilioteca Provincial de Lugo, co patrocinio da Consellería de Cultura e Turismo da Xunta de Galicia.

7- O fallo do xurado local farase público antes de rematar a segunda quincena de decembro de 2016.

8- Os traballos premiados pasarán a ser propiedade da Biblioteca Pública Municipal que se reserva o dereito de publicación dos mesmos.

9- Todas as incidencias non previstas nestas bases serán resoltas polo xurado.

10- A presentación das obras  a este certame supón a aceptación das presentes     bases.

A OMIX DE QUIROGA ORNANIZA XORNADAS INFORMATIVAS DO CARNÉ XOVE

A Oficina Municipal de Infomación Xuvenil de Quiroga, organiza para os días 28, 29 e 30 de novembro, unhas xornadas informativas do carné xove, no IES de Quiroga.

O estudantado poderá recoller información na mesa informativa que se instalará durante os recreos e ademais, quen o desexe, poderá facer alí mesmo o carné xove.

O seu obxectivo, é facilitar unha tarxeta persoal e intransferible á disposición da mocidade galega de 12 a 30 anos, que a acredita como tal, e coa que obtén descontos e vantaxes das entidades colaboradoras en Galicia, no resto das comunidades autónomas españolas e nos 40 países europeos adheridos ao programa do Carné Xove, agás excepcións propias de cada comunidade ou país.

O CONCELLO XA TEN EN MARCHA OS ACTOS PARA A CELEBRACIÓN DO SAN MARTIÑO

O Concello de Quiroga, dende a súa Área de Cultura, xa ten en marcha un amplo programa para a celebración do noso patrono, o San Martiño.

      Os actos comezan o xoves día 10 pola tarde coa disputa de dous encontros de futbol sala no pavillón municipal, entre as EDM.de Quiroga e as da Rúa, os enfrontamentos serán as seis na categoría de prebenxamíns e as sete os Benxamíns.

      O venres, propio día de San Martiño, festa local na vila, comezarase ás once menos cuarto cunha alborada coa banda de gaitas.

     Ás doce do mediodía misa solemne e procesión, encabezada pola imaxe do noso patrono. A unha e cuarto, na Praza Maior, actuacións do grupo de danzas e da banda.

     Ás catro da tarde e de novo na Praza Maior, xogos populares infantís para todos os rapaces que queiran participar. As sete dará comezo un gran magosto onde non faltará o viño novo e a música a cargo do Dúo Camelia.

    Pero os actos de San Martiño continuarán o sábado día 12 no Auditorio Municipal onde terá lugar un festival da Presentación do Cancioneiro Antropolóxico de terras de Quiroga , Ribas de Sil e Montaña do Lor.

    O domingo, ás sete,  tamén no Auditorio e para pechar os actos desta festividade terá lugar a representación teatral “O Menciñeiro á Forza”, interpretado polo Grupo Augas do Sil de San Clodio, dentro do programa Buxiganga da Deputación Provincial.

O PP ACADA O 64,89% DOS VOTOS EN QUIROGA, NUNHA XORNADA CUNHA PARTICIPACIÓN QUE SUPERA O 71%.

        Quiroga segue sendo un dos municipios máis populares do sur da provincia de Lugo, ao acadar o 64,89% dos votos emitidos na xornada de onte, prácticamente a mesma que nas eleccións do 2012. O PP foi a opción elexida pola maioría dos quirogueses, concretamente por 1.340. Seguenlle a moita distancia o Partido Socialista, que con 273 votos obten un 13,22% e En Marea que cos seus 259 votos obten un 12,54%.

          A participación nestes comicios foi alta, dun 71,44%, o que se traduce en que 2.065 quirogueses acudiron ás urnas, nunha xornada sen incidencias, para exercer o seu dereito a voto nestas eleccións autonómicas. Do total de votos acadados 1.340 foron para o Partido Popular; 259 para en Marea; 273 para o Partido Socialista; 95 para o BNG; 46 para Ciudadanos; 4 para o partido Animalista; 3 para Anticorrupción; 2 para Gañemos – Sí se puede; outros dous para Recortes Cero; 1 para Converxencia 21 e outro para Compromiso x Galicia. Ademáis houbo 13 votos en branco e 26 foron nulos.

No noso municipio constituíronse seis mesas electorais: na mesa situada en Vilar de Lor votaron os veciños censados no Lor Alto e no Lor Baixo. Dun censo de 254 veciños emitíronse 180 votos, un 71,26%; deles 131 para o PP; 27 para o Partido Socialista;  14 para En Marea; 5 para o BNG; e 2 para Ciudadanos. Houbo tamén 1 voto en branco.

Na mesa de Soldón de Sequeiros, onde tamén votan os veciños de Montefurado, cun censo de 383 votantes, exerceron este dereito 271, o que supón un 71,02%. Nesta mesa o PP acadou 195 votos; o Partido Socialista 32;  En Marea, 28; BNG 10; 4 para Ciudadanos e 1 para Recortes Cero. Houbo tamén 1 voto en branco.

          Na primeira mesa do Centro Social, na que votaban os veciños censados na parroquia de San Martiño con apelidos comprendidos entre o A e o L, dun censo total de 646 recibiu 437 votos, un 69,50%. Por partidos políticos, o PP acadou 274; En Marea, 65; o Partido Socialista 51, o BNG 25, 7 para Ciudadanos, 1 para o partido Anticorrupción e 2 para Gañemos- Sí se puede. Houbo tamén 8 votos nulos e 4 en branco.

Na segunda mesa situada no Centro Social, onde votaban os apelidos dende o L ata o Z, a máis numerosa de todas, cun censo de 873 acadáronse 601 votos, o que supón un 70,68%. Nesta mesa o PP acadou 369 votos, En Marea 84, o Partido Socialista 76, o BNG 29, 22 para Ciudadanos, 2 para o Partido Animalista, 2 para Anticorrupción e 1 para Converxencia 21. Houbo tamén 13 votos nulos e 3 en branco.

        Na mesa situada na Casa da Cultura, que acollía os veciños das parroquias da Ermida e do Nocedo, dun censo de 200 votaron 156, un 78,50%: destes votos 98 foron para o PP; 31 para o Partido Socialista, 13 para o BNG; 11 para En Marea, 1 para Ciudadanos e 1 para Recortes Cero. Houbo tamén 1 voto nulo.

Finalmente, na mesa situada no Centro Social de Campos de Vila, onde votaron os veciños comprendidos entre as parroquias do Hospital e A Seara, cun censo de 589 persoas, recolleu un 72,67%, 420 votos. O PP acadou 273, En Marea 57; o Partido Socialista 56, o BNG 13, 10 votos foron para Ciudadanos, 2 para o partido Animalista e 1 para Compromiso x Galicia. Houbo tamén 4 votos nulos e 4 en branco.

COMEZA O CURSO 2016/2017 NO CEIP DE QUIROGA CON 147 ALUMNOS

Onte comezou o curso 2016/2017 no Centro de Educación Infantil e Primaria de Quiroga. 147 é o número de alumnos e alumnas que comezaron as clases, un número que se mantén igual que o curso pasado.

Coa volta ao cole comezaron tamén a funcionar os servizos de transpote e comedor do centro educativo.

O curso 2016/2017 prolongarase ata o 23 de xuño. En canto ás vacacións, as do Nadal comezarán o 22 de decembro e os alumnos non volverán ás aulas ata o día 9 de xaneiro. O entroido volverá dar tres días libres a profesores e alumnos, 27 e 28 de febreiro e 1 de marzo do 2017, mentres que a Semana Santa irá do 10 ao 17 de abril do mesmo ano.

Os alumnos manteñen tamén o horario do curso anterior, é decir, entran ás dez menos cinco da mañá e saen a unha e media para comer e voltan ás tres da tarde para retomar as clases ata as catro e media. Agás os venres que soamente teñen clases de mañá saíndo ás tres menos vintecinco, a excepción dos alumnos de comedor, que saen ás tres e media.

Precisamente co servicio de comedor presentase un novo problema para o centro educativo, xa que conta con máis solicitudes das prazas que ten concedidas, en concreto son 13 alumnos os que quedan fora. A directora do centro, Ana Nuñez, mandou unha mensaxe tranquilizadora aos pais xa que o colexio solicitou a Xunta de Galicia a ampliación deste servizo para que ningún neno quede fora.

36 EMPRESAS OPTAN A AMPLIACIÓN DO POLÍGONO INDUSTRIAL

Un total de 36 empresas presentaron as súas ofertas para a execución de obras de urbanización no parque empresarial de Quiroga.

A Xunta licitou en agosto as correspondentes actuacións e o prazo para a presentación de ofertas rematou o pasado 9 de setembro. Estas actuacións licitáronse por un importe de 356.000 euros, cun prazo de execución de dous meses.

Urbanizarase o polígono D do parque empresarial dado que no mesmo existe demanda de solo e as parcelas urbanizadas están esgotadas. As obras consistirán fundamentalmente na prolongación dun vial xa existente ata o límite do parque empresarial, resultando 11 parcelas destinadas ao asentamento de empresas. A ampliación contará cunha superficie de 15.736 metros cadrados.