COMEZA A ORGANIZARSE A XXXVIII FEIRO DO VIÑO DE QUIROGA

O Concello de Quiroga comeza a traballar na XXXVII Feira do Viño, que terá lugar os días 20 e 21 de abril.

A casa consistorial acolleu a primeira reunión na que se organizarán todas actividades que inclúe esta festa do viño, na que se engloban o concurso “Quiroga de Tapas” ou a Carreira Popular. Coincidindo con esta celebración Quiroga acollerá un ano máis o Certame Celtibérico de Bandas de Gaitas,  na que xa será a súa IV edición.

Nesta primeira xuntanza marcouse o prazo que terán para anotarse os colleiteiros que queiran participar e os requisitos esixidos para o seu viño elaborado artesanalmente . Así os viticultores interesados deberán de inscribirse na casa consistorial antes do día 19 de febreiro, fixándose un número máximo de doce colleiteiros para participar nesta XXXVII edición.

         

En canto aos requisitos mínimos que deberán de cumprir os viños será unha graduación alcohólica mínima de 12 º para o viño branco e de 11,5 º  para o viño tinto. E unha acidez volátil máxima de 0,5 gr. acético/l. para o viño branco e de       0,6 gr. acético/l. para o viño tinto.

En canto á cantidade, fíxase unha cantidade mínima de 200 botellas de viño branco e 250 botellas de viño tinto para presentar na feira, e outra cantidade igual ou superior na adega.

O colleiteiro que teña seleccionado o seu viño para participar na feira debe aboar a cantidade de 100 € e entregar mostras do viño inscrito que deberán de superar dúas probas, unha análise organoléptica e unha cata popular polos membros da Confraría do Viño de Quiroga.

COMEZA A PREPARARSE O ENTROIDO

       Esta mañá reuníanse na casa consistorial os encargados de organizar as festas de Entroido no concello.

O Entroido celebrarase en Quiroga o domingo 3 de marzo cun desfile de comparsas como xa é habitual. Tamén os máis pequenos terán unha festa de disfraces o luns día 4 e os máis maiores terán a súa festa o martes día 5.

As bases do concurso de comparsas así como os detalles da festa infantil pormenorizaranse en vindeiras xuntanzas. Non así a festa para os maiores que xa está organizada. Celebrarase no centro social o martes día 5 a partir das seis da tarde, cunha invitación para todos os socios e socias a doces típicos destas festas e un animado baile de disfraces.

O ACEITE DE QUIROGA NA REVISTA GASTRONÓMICA HUM DA VOZ DE GALICIA

A Revista de viños e gastronomía HUM do xornal La Voz de Galicia publicou o pasado domingo unha reportaxe dedicada ao aceite de Quiroga. Baixo o título de Mansa e Brava, as olivas galegas do aceite de Quiroga, o coñecido periodista J.M. Orrióls, autor do artigo, fixo un repaso da importancia do aceite na nosa comarca dende a Idade Media.

Dende o Século XV existe documentación sobre a importancia que na economía do Val de Quiroga tivo o aceite de oliva nesta zona na que abundas as oliveiras centenarias e aínda se conservan vellos muíños, como o de Bendilló, onde se recrea esta historia.

Orrióls destaca a importancia da oliveira Mansa e da Brava durante a Idade Media xa que no noso val marcábanse as fincas con oliveiras en vez de con mouteiras de pedra. Oliveiras que afortunadamente quedaron en pe e que se recuperaron para producir aceite, agora con tecnoloxía máis moderna pero conservando as características organolépticas dos aceites primitivos.

Apunta Orrióls que debido a esa importancia o concello de Quiroga creou un “mini consello regulador” , inscribindo na oficina de patentes a marca “Aceite de Quiroga”. Con isto creouse unha contraetiqueta que leva todo o aceite que se produce no noso concello, despois de pasar exhaustivos controis de todo tipo, entre os que se inclúe a cor, o sabor, a acidez ou o lugar de onde proceden as olivas. Requisitos sen os que non se autoriza a súa venda como Aceite de Quiroga.

O artigo tamén recolle as declaracións do alcalde Julio Álvarez, que afirma que "se está á espera de que a Consellería de Medio Rural, despexe as dúbidas que di ter sobre esta realidade, para solicitar xa á Xunta de Galicia que tramite primeiro ao Goberno Central e despois á Unión Europea, o expediente que presentará o concello para obter a denominación de orixe do noso aceite". O alcalde afirma que "o aceite de Quiroga cumpre todos os requisitos que esixe a Unión Europea, porque temos unha longa e documentada historia, tamén oliveiras que son únicas deste val e ademais, solicítase para un territorio delimitado moi concreto". Tamén remarca que "si se planea facer unha denominación de orixe que se chame de calquera outra forma, estarase cometendo un grave erro e dende o concello de Quiroga loitarase pola nosa denominación".

600 QUILOS DE SAL PARA LOITAR CONTRA AS PLACAS DE XEO NOS CAMIÑOS

      Esta mañá o grupo de emerxencias GES repartiu 600 quilos de sal polos camiños de acceso a distintos núcleos do municipio que se atopaban con placas de xeo e dificultaban a circulación dos veciños.

Esta foi unha nova madrugada xélida en Quiroga con mínimas baixo cero. Onte ás oito menos dez da mañá a Estación Meteorolóxica que a Consellería de Medio Ambiente ten na Conchada marcaba unha temperatura de cinco grados baixo cero. Estas temperaturas propician que as xeadas nas zonas máis sombrizas se manteñan dun día para outro, aumentando a capa de xeo e dificultando o acceso aos núcleos máis afectados.

O grupo de emerxencias traballou esta mañá en Vilar de Mondelo onde foi preciso votar sal en toda a pista de acceso e en puntos concretos de Montefurado, Rugando e Vilañán.

Esta non é a primeira vez  que dende o concello se traballa en retirar as placas de xeo das pistas de acceso aos núcleos, xa que a semana pasada xa se empezou a espallar sal nas zonas máis altas do municipio. Ao que hai que sumar o plan de Emerxencia para facer fronte ás acumulacións de xeo que está levando a cabo a Deputación Provincial nas estradas da súa titularidade.

As temperaturas mínimas baixo cero seguirán aínda durante uns días.  O aire frío do continente europeo comezará a entrar mañá mércores na península Ibérica. As temperaturas mínimas non experimentarán cambios moi apreciables polo que as xeadas seguirán sendo xeneralizadas no interior. As máximas si tenderán a baixar lixeiramente.

Pero a partir do xoves o alivio térmico que se experimenta ao mediodía desaparecerá. Unha masa de aire frío de orixe ártica invadirá a comunidade. Hai que engadir ademais que o vento, practicamente ausente ata hora, comezará a soprar con máis forza e aumentará a sensación de frío, cuxo valor podería estar incluso por baixo do que indiquen os termómetros. Os principais modelos meteorolóxicos coinciden en que ese aire polar quedará en Galicia polo menos ata o domingo.

NOVA LIÑA DE AUTOBÚS DE QUIROGA A MONFORTE

A Consellería de Infraestruturas e Mobilidade vén de autorizar unha nova expedición de transporte público por autocar entre as localidades de Quiroga e Monforte de Lemos.

A nova liña estará operativa todos os días laborais (de luns a venres) con servizos de ida e volta. A saída terá lugar desde Quiroga ás 7,40 horas con chegada prevista a Monforte ás 8,20 horas. O regreso, con saída desde Monforte, está previsto ás 14,30 horas e chegada a Quiroga sobre as 15,10 horas.

 O itinerario percorrerá sete paradas: Quiroga, San Clodio, o IES Francisco Daviña Rey, a estación de autobuses de Monforte, o IES Río Cabe, a E.T. de Monforte e o Hospital Comarcal.

O delegado territorial da Xunta en Lugo, José Manuel Balseiro, explicou que esta nova frecuencia responde ás demandas formuladas desde o Concello e por un grupo de estudantes que cursaban ciclos formativos na cidade do Cabe e que agora serán os principais beneficiarios deste novo horario, ademais de todas aquelas veciñas e veciños que precisan achegarse ata o hospital comarcal.

 A Consellería de Infraestruturas e Mobilidade reforza o servizo de transporte público por estrada dentro do seu compromiso de promover as modificacións puntuais precisas para unha mellor conexión dos diferentes concellos e, en particular, das poboacións da zona rural.

REUNIÓN ANUAL DA CORPORACIÓN COS PEDÁNEOS DOS NÚCLEOS DO MUNICIPIO

Un bo número de alcaldes de barrio reuníronse esta mediodía  nas instalacións do Centro Social da Terceira Idade para participar na xuntanza anual da corporación cos representantes de cada núcleo de poboación do municipio,

Nesta xuntanza anual, que se fai dende hai 32 anos, faise balance do realizado durante o ano, á vez que os pedáneos presentan as necesidades de cada núcleo para que a corporación as encaixe nos presupostos que se elaborarán para o vindeiro exercicio.

O municipio de Quiroga conta nos seus 319 km2 de extensión con 119 núcleos, aínda que non todos están habitados. Nesta xuntanza anual, en base ás peticións que realizan estes delegados da alcaldía nos barrios, prográmanse as obras máis necesarias nestes núcleos para realizar ao longo do 2019.

En canto ao balance do ano que está a piques de rematar, o alcalde Julio Álvarez, informou aos asistentes á xuntanza que se cumpriron todas as expectativas comprometidas cos núcleos, aínda que falta executar unha parte das obras, retrasadas por problemas de administración. Anunciou que esta mesma mañá se contratou o derradeiro paquete de obras pendente, e que afectará basicamente ao arranxo de pistas da zona máis oriental do municipio.

OS CIENTÍFICOS VIDAL ROMANÍ E AURORA GRANDAL VEÑEN COÑECER O PROXECTO DE AMPLIACIÓN DO MUSEO DE XEOLOXÍA E PALEONTOLOXÍA DE QUIROGA

José Ramón Vidal Romaní, director do Instituto Universitario de Geología da Coruña e Aurora Grandal D’Anglade, profesora de paleontoloxía da Universidade da Coruña achegáronse esta mañá ata o Museo Xeolóxico de Quiroga para coñecer o proxecto de ampliación desta edificación. Os dous profesores, implicados dende o primeiro momento co Museo Xeolóxico de Quiroga, apoiaron esta ampliación e aproveitaron a reunión co alcalde, Julio Alvarez, e co director do Museo, Ramón Vila, para aportar ideas e propostas de cómo cubrir os novos espazos.

A ampliación do museo local de Xeoloxía e Paleontoloxía permitirá exhibir unha ampla serie de pezas que agora non poden mostrarse ao público por falta de espazo.  As obras permitirán a ampliación do museo polos dous laterais e tamén pola parte traseira, polo que todas as súas salas terán maior amplitude. Ademais crearase unha nova sala que servirá para proxeccións audiovisuais.

A primeira das cinco salas do museo está dedicada a formación do territorio de Galicia, coa análise do pregamento de Campodola-Leixazós. O contido desta tamén conta cunha colección de minerais e  rochas procedentes da bisbarra, que pretende ampliarase.

A segunda sala centrase na historia paleontolóxica. Aquí amósanse diferentes fósiles animais todos eles poboadores da nosa serra, entre os que destacan o esqueleto completo dun oso das cavernas. O proxecto de ampliación contempla que acolla a colección de fósiles recollida en diferentes puntos da comarca polo biólogo Manuel García Ávila e cedida ao concello.

 A terceira sala é a da idade dos xeos, representada por cantos de depósitos glaciares recollidos na zona da Lucenza, que se ampliará coa estalagmita da Cova de Arcoia, que permitiu estudar a secuencia climática.

 A cuarta das salas centrase nas primeiras ocupacións humanas da zona. Nesta sala pódense ver dez cranios dos primeiros humanos e ferramentas líticas do Paleolítico e do Neolítico, atopadas na zona da Hermida e na que se contempla albergar a reconstrución da muller prehistórica coñecida como Elba (a pastora do Courel), cuxos restos foron descubertos hai anos nunha cova da serra do Courel.

Finalmente a última sala, na que se expoñen bloques de distintos minerais collidos na zona, representa a parte da nosa minería, tamén se ampliará.

O proxecto de ampliación xa está orzamentado en 71.000 euros, cantidade que será sufragada en gran parte  polos fondos Leader que manexa o GDR Ribeira Sacra-Courel. Unha parte da obra estará acometida polos traballadores do obradoiro SilLor.